Jäqui'ves Reyes 25
25
1Muꞌ qui ayoꞌ Nabucodonosor atsij muꞌ väc̣häꞌtyitytum, ĉọshseti muꞌin Israeltyiꞌ vóshiꞌ in, cọtoij buꞌyi tŝọ́tyeꞌ Jerusalén in. Mọꞌ mạyedyeꞌ yiriꞌtac, chiyiriꞌtacyitydye ịvaj atsij muꞌ, aty arajtac yómodyeꞌ tyiti muꞌ ayoꞌbuꞌyi Sedequías. Muꞌ Babiloniaĉantyiꞌ ayoꞌ ñutsjeĉunacsi Jerusalénĉantyiꞌ in, 2yiriꞌtac jäbän jiyi ịvaj meꞌ buꞌyi cọtoij buꞌyi in. 3Chaꞌsheꞌ in mọꞌ arajtac mạyedyeꞌ, vạjpedyeꞌ ịvaj, jämꞌ dáqui muꞌin Jerusalénĉantyiꞌ in, aty itŝiꞌ säcsedyeꞌ aijvun muꞌin. 4Chijämꞌ pạrej Babiloniaĉantyiꞌ in verꞌjeꞌ in bäꞌyedyes naꞌru mọꞌ. Meꞌ tsanꞌ muꞌin Babiloniaĉantyiꞌ väc̣häꞌtyity in cọtoij buꞌyi in mọꞌ bäꞌyedyeꞌ, muꞌin qui namꞌ Israeltyiꞌ väc̣häꞌtyity in tsedyedyeꞌ muꞌin shupqui muꞌĉantyiꞌ in ĉaꞌjoij in. Ayosĉan tyeban cätidyeꞌ in, chụiꞌdyeꞌyaꞌ shuban in yóyaꞌdyemꞌ päräꞌ buꞌyiꞌyaꞌ naꞌru o, ĉaꞌjoban in, ayoꞌmun chimeꞌ Sedequíasmun. Chụiꞌ mọmoꞌ tyeban tsanꞌ in mojijĉan Jordánsiꞌ. 5Cäc̣henꞌ muꞌin jäquiꞌdye jijchacacseban in muꞌin Babiloniaĉantyiꞌ väc̣häꞌtyity in. Muꞌĉan chaꞌshejicacseban in mojij Jericós. Räj ĉaꞌjoij in väc̣häꞌtyity in, räj ficaj tyeij in, farajjetacte in muꞌ ayoꞌ Sedequías. 6Muꞌdyety tapjete in cạbajte in yocve qui jịjijcayete in Babiloniaĉantyiꞌyaꞌ ayoꞌ, Riblaĉantyiꞌ muꞌ. Muꞌĉan p̂eijbite vaꞌtacdyedyes muꞌ. 7Mọꞌ vaꞌtacdyeꞌ muꞌ ĉụiꞌsiꞌyaꞌ vej muꞌ ijapte ạvaꞌ in, judyeyaꞌ qui fóñetyete vej in, chat chọcoꞌtac cadenayaꞌ chat cạte in Babiloniave jịjijcayete in.
Räj jịvaꞌchapte in Jenꞌsiꞌ acaꞌ muꞌ
8Aty yiriꞌtac arajtac jiyiꞌ yómodyeꞌ tyiti ayoꞌbuꞌyi Nabucodonosor, Babiloniaĉantyiꞌ ayoꞌ, mọꞌ yävätidyeꞌyis mạyedyeꞌ, ĉanamꞌyity ịvaj, muꞌin Babiloniaĉantyiꞌ väc̣häꞌtyity atsij in ayoꞌtum muꞌin, dạquiteꞌ in Jerusalénĉan, Nabuzaradán tịj muꞌ ayos, muꞌ jutactyiꞌ muꞌ mujuꞌchaty ayoꞌ Babiloniaĉantyiꞌ, Jerusalénve venjoij in. 9Jiꞌcoꞌshayeꞌ in Jenꞌsiꞌ acaꞌ muꞌ judyeyaꞌ ayosmun chimeꞌ jiꞌcoꞌshayeꞌ in, judyeyaꞌ räj acaꞌ yocsiꞌ chimeꞌ in, dadamꞌ muꞌinsiꞌ in fer buꞌyitysiꞌ acaꞌ muꞌin, meꞌsiꞌdye jiꞌcoꞌshayacsebi in. 10Väc̣häꞌtyity Babiloniaĉantyiꞌ in tas muꞌin jịvaꞌchabiꞌ in Jerusalénsiꞌ naꞌru mọꞌ. 11Chat qui muꞌ ayoꞌ Nabuzaradán cạcseban Jerusalénĉan bäꞌyity in, ĉụiꞌsituban bäꞌyedyeꞌ Babiloniave cạcseban muꞌ. Muꞌ cạcsi muꞌin chịj carijtyety jedyeꞌ in, judyeyaꞌ muꞌin mạꞌjeꞌ ayotutety in Babiloniaĉantyiꞌ ayoꞌ, räjtumdye muꞌin Jerusalénĉan bäꞌyity in, jịjijcayacsi Babiloniave in. 12Taĉantyiꞌdyety tacyaꞌ in muꞌin mujuꞌchaꞌ ñịbety in, paj qui muꞌindyes ĉọjcaiꞌ in mọꞌ sicdyeꞌ judyeyaꞌ ova chimeꞌ.
Currently Selected:
Jäqui'ves Reyes 25: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
