Tashches Crónicas 22
22
David jäꞌmij jämꞌ yụꞌtyeꞌ Jenꞌsidyes acaꞌ muꞌ
1David yi:
—Ọĉan raꞌ jämꞌtac mọꞌ Jenꞌsiꞌ acaꞌ muꞌ Ayos tsun, chịmoꞌĉandye raꞌ jiꞌcoꞌshayacdyeꞌ, yócheꞌdyemꞌ raꞌ jiꞌcoꞌshayeꞌ Jenꞌdyes u in uts Israeltyiꞌ vóshiꞌ in —yi muꞌ David.
2Meꞌdye muꞌ räj jiꞌvorvacsi muꞌin yoctyiꞌdye muntyiꞌ in Israelĉan bäꞌyity in, muꞌ carijtacdyeꞌ soꞌmacsi. Pạrejdye muꞌin yụꞌtac in jaiꞌdyetety raꞌ mij in acadyety in. 3David soꞌmacsi shach fiyero cravodyes, judyeyaꞌ chụiꞌdyeꞌyadyes, judyeyaꞌ yocsiꞌdyes jedyeꞌ chimeꞌ. Bronce chimeꞌ soꞌmacsi acadyes, chichimesdye soꞌmacsi, mijam mọꞌ tuputuc. 4Chimuꞌdye cọdyetacsi son muꞌin Sidónĉantyiꞌ in judyeyaꞌ Tiroĉantyiꞌ in, yedyej siyamo cọdyetacsi, junꞌtum raꞌ säräꞌ tuiꞌ in.
5David dyijyi yi: "Anic raꞌ därsiꞌ Ayoꞌsiꞌ acaꞌ muꞌ, anic raꞌ jiyiꞌ mọjoꞌchaꞌ jämꞌsiꞌ, yósiꞌdyeꞌ muntyiꞌ u in, meꞌsiꞌ raꞌ äjjepte in, mijam raꞌ yocsiꞌ joꞌmeiꞌ acaꞌ cạveꞌ in. Uts ạvaꞌ yụ Salomón nanatydyemꞌ, jambiꞌdyemꞌ dyijyedyeꞌtum, mọꞌdyes yụ raꞌ jämiiꞌtyeꞌ jäꞌmiij tashcheꞌ jedyeꞌ in räj acadyedyes." Meꞌdye muꞌ David, tsạꞌdyemꞌ jiquej, räj jämꞌ yụꞌtyeꞌ Jenꞌsidyes acaꞌ muꞌ.
6Chat qui muꞌ David jiꞌvorvaqui ạvaꞌ muꞌ Salomón, ferdyeꞌ jéyaqui paj qui muꞌ jämꞌtyeꞌ Jenꞌsiꞌ acaꞌ muꞌ, Ayoꞌsiꞌ muꞌin Israeltyiꞌ vóshiꞌ in.
Currently Selected:
Tashches Crónicas 22: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
