Jäqui'ves Crónicas 5
5
1Aty meꞌsiꞌ ijaij in Ayoꞌsiꞌ acaꞌ muꞌ, räjtumdye acadyes jedyeꞌ in, yoj jeyacsidyemꞌ jiquej Salomón u. Salomón tuiꞌ räj jedyeꞌ Jenꞌsidyes acaꞌ soꞌmetes Jenꞌ jiquej muꞌ Davidvun Salomónvuntyiꞌ jenꞌ jiquej muꞌ, mọꞌ jämiꞌ in oro judyeyaꞌ plata. Mọꞌĉan muꞌ yụꞌtacsi muꞌ Salomón vavdyeꞌĉan acas, yóĉandyemꞌ jämꞌ yụꞌtacdyes o.
2Chat qui muꞌ Salomón jiꞌvorvacsi muꞌin tashcheꞌ buꞌyity in Israeltyiꞌ vóshiꞌ in, cäts ñuruꞌ jịjcaij in, Jerusalénĉan vajmuꞌyaij in, Sión tịj mọꞌ yocsiꞌ, Davidsiꞌ bäꞌyedyeꞌ muꞌ. Mọꞌdyes muꞌ jiꞌvorvacsi paj qui yocĉan jeꞌ in mọꞌ cajón yụꞌtacdyeꞌtumsiꞌ Ayoꞌsiꞌ muꞌ, yụꞌtyeꞌ qui in mụiꞌsisĉan acaꞌ Jenꞌsiꞌ muꞌ. 3Mọꞌdye mạyedyeꞌ yävätidyeꞌyity ịvaj mọꞌ feshta dyijtucdyes junꞌ chuc pusujsuquensiꞌĉan acaꞌ bäꞌyi jiquej in. Aty meꞌsiꞌ muꞌ Salomón vajmuꞌyaꞌjeyacsi räj miꞌin in. 4Aty muꞌin muꞌyaꞌ buꞌyi muꞌin tashcheꞌ buꞌyity in, chat qui muꞌin Levítyiꞌ vóshiꞌ in cheꞌtiyeꞌ in mọꞌ cajón yụꞌtacdyeꞌtumsiꞌ, 5yocyaꞌ yụꞌtyeꞌ in Jenꞌsiꞌyaꞌ acaꞌ muꞌ. Chimeꞌdye muꞌin Levítyiꞌ vóshiꞌ in judyeyaꞌ muꞌin cudyitity Jenꞌcheꞌ in, jäqueꞌ in tuiꞌ in Jenꞌsiꞌ acaꞌ muꞌ, mọꞌ tinates jiquej, räjtumdye jedyeꞌ mọꞌĉansiꞌ in. 6Muꞌ Salomón räjtumdye Israeltyiꞌ vóshiꞌ in tashcheꞌ buꞌyi in muꞌyaꞌ cajónyaꞌ yụꞌtacdyeꞌtumsiꞌ. Muꞌyaꞌ jiꞌcoꞌshayeꞌ Jenꞌdyes in, anic daiꞌ cuꞌdyeꞌ jiꞌcoꞌshayeꞌ mọꞌyaꞌ in, junꞌtum raꞌ vodoꞌ jiꞌcoꞌshayeꞌ in, oveca in judyeyaꞌ vaca in. 7Chat qui muꞌin cudyitity Jenꞌcheꞌ in quivij cheꞌbanꞌ turebanꞌ in mọꞌ cajón yụꞌtacdyeꞌtumsiꞌ, chịmoꞌĉan jéban in Jenꞌsiꞌĉan acaꞌ, yocsiꞌĉan qui vavdyeꞌ yụꞌbanꞌ in, mọꞌ jeꞌ in: Mọjoꞌchaꞌ Tsäquiꞌsis vavdyeꞌ, jeꞌ in, mọꞌĉan yụꞌbanꞌ in mọꞌ cajón, ọĉanyaꞌ yụꞌbanꞌ in muꞌinsiꞌyaꞌ pavaj querubinsiꞌyaꞌ in, 8jatsaꞌ buꞌyi muꞌin mọꞌcheꞌ in judyeyaꞌ chuquischeꞌ buꞌyiꞌ son in. 9Anic moc̣haꞌmunsiꞌ mọꞌ son in, tupuj nạijtyeꞌ in muꞌin tashcheꞌ buꞌyity in mọꞌ Mọjoꞌchaꞌ Tsäquiꞌsis vavdyeꞌ, muꞌin na jorojyaty in jam nạijtyeꞌ in. Mọꞌ son in yejĉoiꞌ mọꞌyaꞌ q̂uinꞌ in. 10Muꞌĉan cajónĉan yụꞌtacdyeꞌtumsiꞌ muꞌĉan muꞌ mọmoꞌ in päräꞌ jaiꞌdactyiꞌ mij in, sánacdyeꞌtumtyiꞌ in. Moisés yụꞌtety cajónĉan mụcuꞌyaꞌ Horebcheꞌ yóquiꞌdyemꞌ muꞌ Ayoꞌ yụꞌtyeyacsi p̂eyacdyeꞌ u muꞌin Israeltyidyes vóshiꞌ in, aty yacchuiꞌyaꞌ Egipto jiquej in.
Jenꞌsiꞌ ferdyeꞌ acaꞌĉan tŝọiꞌ
11Chat qui muꞌin cudyitity Jenꞌcheꞌ in muꞌĉantyiꞌ shuban in Tsäquiꞌsisĉantyiꞌ vavdyeꞌ in. Räj muꞌin cudyitity Jenꞌcheꞌ ñuruꞌtyity in aty jäꞌmij jämꞌ yuꞌti in Jenꞌsiꞌyaꞌ vej muꞌ. 12Chimeꞌdye muꞌin muꞌyaꞌ in Levítyiꞌ vóshiꞌ muꞌ, jimaquity muꞌin in. Tịj muꞌinsiꞌ in Asaf, judyeyaꞌ Hemán judyeyaꞌ Jedutún, räjtumdye ạvaꞌ muꞌin judyeyaꞌ chätidyeꞌ muꞌin, muꞌin rụiꞌquequenꞌ in pamꞌvetaque jiꞌcoꞌshayacdyeꞌ. Yedyej jaiꞌbabaty quịꞌsiꞌ muꞌin lino, judyeyaꞌ yoc yoc vịcdyes mọꞌyaꞌ muꞌin jimacdyeꞌtum vịꞌ in. Chimeꞌdye muꞌyaꞌ daiꞌ cudyitity Jenꞌcheꞌ in pejtyety boñedyeꞌ in, yiriꞌ cien päräꞌ quiꞌtac rụiꞌcuꞌ in, meꞌsiꞌ muꞌin yụꞌtac in.
13Yiriꞌyaꞌ jeꞌ in pejtyeꞌ in mọꞌ boñedyeꞌ muꞌin, judyeyaꞌ vịꞌ in vịcdyes muꞌin, judyeyaꞌ jimaqui in, meꞌ buꞌyi timaꞌquete Ayoꞌ in yi in: "Timaꞌqueja muꞌ Ayoꞌ ĉaĉaij nash jämꞌtyiꞌ muꞌ, tsuncheꞌ buꞌyiꞌ räjĉan mạꞌjitidyes muꞌ", yi in. Vátyequej tŝọiꞌ Ayoꞌsiꞌ ferdyeꞌ muꞌ, sät vatyquej tŝọiꞌ mạijquedyeꞌtumsiꞌ dyicbaꞌbadyeꞌ acaꞌĉan. 14Muꞌin cudyitity Jenꞌcheꞌ in räj tyumumuj tyeij in, judyeꞌdye junꞌ ijaij carijtacdyeꞌ Jenꞌdyes in ĉaĉaij na Ayoꞌsiꞌ mạijquedyemꞌ sät mọꞌĉan tŝọiꞌ acaꞌĉan muꞌ mọꞌdyes qui muꞌin jam junꞌ in.#5:14 Daiꞌ yómodyeꞌ jiyiꞌ aty jam jämꞌjiti in Israeltyiꞌ vóshiꞌ in aty jiꞌchetiti in päräꞌ buꞌyiꞌ jac muꞌin. Yiris jac jätisve buꞌyiꞌ, Judá, jeꞌ in, Jerusalén mọjoꞌchas bäꞌyedyeꞌ mọꞌĉansiꞌ. Yocsiꞌ jac rocve buꞌyiꞌ, Israel, jeꞌ mọꞌ in. Samaria mọjoꞌchas bäꞌyedyeꞌ mọꞌĉansiꞌ. Meꞌ tsanꞌ yedyej Israeltyiꞌ vóshiꞌ in, päräꞌ qui namꞌ bäꞌyedyeꞌ muꞌin, Israel judyeyaꞌ Judá.
Currently Selected:
Jäqui'ves Crónicas 5: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
