Jäqui'ves Crónicas 2
2
Salomón tiyacchuiꞌ jämꞌtyeꞌ Jenꞌdyes acaꞌ
1Salomón dyijyi jämꞌtyeꞌ acaꞌ Jenꞌdyes muꞌ, judyeyaꞌ ĉụiꞌsidyes chimeꞌ acaꞌ muꞌ ayodyes. 2Anic daiꞌ muntyiꞌ in jiꞌcarijtacacsi, yävätidyeꞌ quiꞌtac mir rụiꞌcuꞌ muntyiꞌ in, meꞌsiꞌ in muꞌin jiꞌveñety acadyes in, judyeyaꞌ q̂uenꞌĉan quiꞌtac mir rụiꞌcuꞌ muntyiꞌ in, meꞌsiꞌ in muꞌin jaiꞌdyetety mij acadyety in, mụcuꞌyaꞌ carijte muꞌin in. Chimeꞌdye ĉọjcaquity daiꞌ yụꞌtac in, chibin quiꞌ mir jäbän quiꞌ cien jiyi, meꞌsiꞌ rụiꞌcuꞌ muꞌin ĉọjcacsity carijtaquity in.
3Salomón juteꞌ p̂eyacdyeꞌ Hiramdyes, Tirochety muꞌ ayoꞌ. Yiꞌ mọꞌ p̂eyacdyeꞌ jéte: "Jutiyitiꞌ ram yojdyemꞌ jenꞌvun u yụ jutiyibutiꞌ jiquej um, jutiyise mi jiquej son siyamo acadyes muꞌ. 4Q̂uinꞌ yụ jämꞌtyeꞌ yiris acaꞌ Jenꞌdyes muꞌ Ayoꞌ yụ, muꞌdyes raꞌ jämiꞌ mọꞌ acaꞌ. Muꞌĉan raꞌ tsun jiꞌcoꞌshayeꞌ jẹrejres muꞌdyes, judyeyaꞌ raꞌ pan räjĉan yụꞌtac muꞌĉan Jenꞌyadyety. Chimeꞌdye raꞌ räjĉan mạyedyeꞌ, pamꞌ judyeyaꞌ yómoꞌ, jiꞌcoꞌshayeꞌ cuꞌdyeꞌ Jenꞌdyes tsun, judyeyaꞌ raꞌ räj feshta Ayodyes tsun chimeꞌ jiꞌcoꞌshayeꞌ tsun muꞌdyes, jịꞌjutyitidyes raꞌ feshta, judyeyaꞌ raꞌ mụiꞌsisdyes ịvaj feshta, meꞌ buꞌyiꞌ raꞌ yụꞌtyeꞌ tsun muꞌĉan. Räj buꞌyiꞌ raꞌ ọij yụꞌtacdyeꞌ Jenꞌsiꞌ muꞌ, soꞌminsiꞌ tsun Israeltyiꞌ vóshiꞌ tsun. 5Meꞌdyes qui raꞌ anic därsiꞌ acaꞌ jämiꞌ ĉaĉaij na Jenꞌ tsun anic jiyi mujuꞌchaty, jam jeñej yocsiꞌ jedyeꞌ jenꞌtuiꞌsiꞌ muntyiꞌ in", yi muꞌ Salomón jéte Hiram, jutuyete p̂eyacdyeꞌ.
Currently Selected:
Jäqui'ves Crónicas 2: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
