Tashches Timoteodyes 2
2
Cọdacdyeꞌ Jenꞌcheꞌ tsun
1Yụ nash jéyac mọjoꞌchaꞌ jemonjaꞌ mọꞌ cọdacdyeꞌ Jenꞌcheꞌ. Cọdyetyetinteyaꞌ muꞌ Jenꞌ jemoñeꞌ jétinte miꞌin jedyeꞌ chuc jemontiñeꞌ miꞌin, judyeyaꞌ cọdyemac räj muntyidyes in, yoshoropaij jémac chimeꞌ muꞌindyes in. 2Cọdyemac muꞌ Jenꞌ ayodyes miꞌin, judyeyaꞌ nọ́taquitydyes muꞌin paj qui dyijyedyeꞌtum ayoꞌbuꞌyi in, chat qui raꞌ maꞌjodyeꞌtum bäꞌjaꞌ, itŝiꞌ chutidyeꞌ. Meꞌ raꞌ chat irijyejaꞌ Jenꞌcheꞌ bäꞌjaꞌ tsun judyeyaꞌ raꞌ rụijsisyaꞌ dyijyedyeꞌ jämꞌjitiĉaꞌ yoctyiꞌtum in. 3Mọꞌ nash mạꞌjeꞌ muꞌ Jenꞌ, muꞌ Jiꞌc̣honsinꞌtyiꞌ tsun paj qui cọdaĉaꞌ muꞌcheꞌ, mọꞌ nash muꞌ maꞌjotyeꞌ. 4Muꞌ mạꞌjeꞌ paj qui räjenꞌ jacchety muntyiꞌ in chị́yepte in mọꞌ rụijsis p̂eyacdyeꞌ muꞌ, paj qui räj c̣hoñi in. 5Yirity mọmoꞌ muꞌyaꞌ Jenꞌ, judyeyaꞌ chimeꞌ yirity mọmoꞌ muꞌyaꞌ muntyiꞌ, muꞌ jämꞌ yuꞌsinꞌtyiꞌ Jenꞌyaꞌ, muꞌ nash Jesucristo. 6Muꞌ ĉụiꞌ jiꞌijati paj qui yaꞌityibusinꞌ juchaj muntyis tsun. Sänꞌdyeꞌ muꞌ jiꞌcaviyisinꞌ aty ayij tupudyeꞌ Jenꞌsiꞌ muꞌ, muꞌ mạꞌjeꞌ paj qui räj muntyiꞌ c̣hoñi in. 7Meꞌdyes muꞌ Jenꞌ yuꞌtyin yụ paj qui mọꞌdye p̂eyacdyeꞌ voroꞌtacsi yụ. Chimeꞌdye yuꞌtyin yụ paj qui yụ jutactyiꞌ muꞌ, paj qui cạyacsi yụ p̂eyacdyeꞌ muꞌ muꞌin jam judío in. Yụ jéyacsi paj qui anicjepte in mọꞌ rụijsis p̂eyacdyeꞌ muꞌ. Anic ọij rụijsis p̂eyacdyeꞌ jéyes yụ q̂uinꞌ, mijam mọꞌ väñädyeꞌ p̂eyeꞌ yụ.
8Yụ mạꞌjeꞌ paj qui sonꞌ in paiꞌ bäꞌyity in cọdaqui Jenꞌcheꞌ in vajmuꞌyaijĉan in. Rụijtyitytum raꞌ ĉojtyiꞌ muꞌin cheꞌjeyaqui un muꞌin cọdacdyeꞌĉan muꞌin, paj qui jam fáquitidyeꞌtum cọdaqui in, mijam chutidyeꞌtum. 9Chimeꞌdye mọꞌin p̂en in paj jam vaꞌbunnacdyeꞌtum quịꞌsiꞌveiꞌ in, mijam raꞌ tsịꞌcaty quịꞌsiꞌ dyịñety quị́te in. Damꞌdye jämꞌ jämꞌsiꞌtum dyijyedyeꞌ bäꞌyiꞌ mọꞌin in, paj jam mọꞌ mọmoꞌ dyijtuiꞌ in jämꞌ yụꞌtacdyeꞌ fin mọꞌin. Paj jam mọꞌ dyijtuiꞌ in jämꞌ yụꞌtacdyeꞌ aꞌ mọꞌin, mijam yaꞌiꞌsiꞌ tyicacdyeꞌ mijam yaꞌijtyiꞌ quịꞌsiꞌ, paj jam joꞌmes dyijtuiꞌ in. 10Damꞌdye jämꞌ mọꞌ dyijtuiꞌ in, paj qui nọ́tacsis bäꞌyiꞌ in, mọꞌ chat anicsis jämꞌ yụꞌtacdyeꞌ mọꞌin aty anicjetes Jenꞌ in. 11Jemoñeꞌ p̂en in camꞌ mọmoꞌ jiꞌchäyitiꞌ in, paj jam jiꞌpenꞌtiꞌ p̂eyacdyeꞌyaꞌ mọꞌin. 12Yụ yi paj qui mọꞌin p̂en in jam jịꞌchiyacsiꞌ in vajmuꞌyaijĉan in, paj jam uyaꞌyaꞌ yụꞌtacsiꞌ sonꞌ in. Jemoñeꞌ c̣huꞌc̣huiꞌ mọꞌin p̂en in vajmuꞌyaijĉan in, 13ĉaĉaij na muꞌ tashcheꞌ jiquej Jenꞌ jämꞌte muꞌ Adán, jäquiꞌve mọꞌ Eva. 14Adán jiquej jam jụjbiꞌ Sọyos väñädyeꞌ mọꞌ jiquej, mọꞌ na p̂en mọꞌ jụjbiꞌ väñädyeꞌ, aty väñätucyaꞌ mọꞌ juchaiꞌ vaꞌquecbite Jenꞌsiꞌ yụꞌtacdyeꞌ muꞌ.#2:14 Génesis 3:1-6 15Meꞌ tsanꞌ meꞌ mọꞌ p̂en jiquej, mọꞌin qui namꞌ c̣hoñis p̂en q̂uinꞌ in mọꞌ raꞌ carijtacdyeꞌ Jenꞌdyes mọꞌin, ạvaꞌyiꞌ raꞌ in, yejĉoiꞌ qui raꞌ anicyiꞌ Jenꞌcheꞌ in, judyeyaꞌ rụij bäꞌyiꞌ in mạꞌjitidyestum, jemoñeꞌ dyijyedyeꞌtum bäꞌyiꞌ in chimeꞌ.
Currently Selected:
Tashches Timoteodyes 2: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
