Tashches Timoteodyes 1
1
Tashches voryedyeꞌ Pablosiꞌ
1Yụ nash Pablo Jesucristotyiꞌ jutactyiꞌ muꞌ, muꞌ Jenꞌ Jiꞌc̣honsinꞌtyiꞌ tsun, muꞌ meꞌ yuꞌtyin yụ judyeyaꞌ muꞌ Jesucristo Ayoꞌ tsun muꞌ bisvaꞌquejaty. 2Yụ nash sáñeꞌ ọij q̂uinꞌ p̂eyacdyeꞌ mídyes Timoteo,#1:2 Úñedyeꞌ 16:1-3 mi jeñej buꞌyi anictyity ạvaꞌ yụ ĉaĉaij na vaj meꞌ shupquiꞌ anicyedyeꞌ tsun. Yụ cọdyete Jenꞌ muꞌ Ạvatusinꞌtyiꞌ tsun judyeyaꞌ muꞌ Cristo Jesús Ayoꞌ tsun paj qui muꞌ soꞌmin ñịbeꞌjitidyes mi, judyeyaꞌ paj qui ñịbeꞌ ĉun mi judyeyaꞌ chimeꞌ paj qui soꞌmin maꞌjodyeꞌ ĉojtyiꞌĉandyes mi.
Muꞌin cäjsis jiꞌchäyitidyeꞌ jéyacsity in
3Yejĉova Efesoĉan mi yoj jeyedyemꞌ caꞌ jiquej u aty raꞌ sactiyaꞌ yụ, muꞌĉan jịjcaij yụ Macedoniaĉan. Muꞌĉantyiꞌ in pạrej cäjsis jiꞌchäyitidyeꞌ jịꞌchiyacsity in. Jemoñeꞌ jéyacsi mi muꞌin meꞌ jịꞌchiyacsity in paj qui jam meꞌ jịꞌchiyacsi cäjsis dyijyedyeꞌ in. 4Jéyacseva paj qui jam mọꞌ dyijtucsebi in urucyas p̂eyacdyeꞌ muntyis muꞌin, paj jam chimeꞌ dyijtucsebi in vóshiꞌvunsiꞌ tịj jiquej muꞌin, tyessiꞌcheꞌ paper sánacsiꞌ. Tyi chuc joꞌmes dyijtuiꞌtyiꞌ jụijyaꞌ in, vaj ĉụiꞌ fáquiti in p̂eyacdyeꞌyaꞌ muꞌin, meꞌ buꞌyiꞌ shupquiꞌ mọꞌ muꞌin. Mọꞌ jam damꞌ nọ́tacsiꞌ paj qui anicyedyeꞌyaꞌ muꞌin cäc̣häꞌchupte in Jenꞌsiꞌ dyijyedyeꞌ muꞌ.
5Mọꞌsiꞌ dyijyedyeꞌ jiꞌchäyitidyes yụ, mọꞌ jísinꞌ paj qui anic mạꞌjeyacsejaꞌ bäꞌjaꞌ tsun. Jemoñeꞌ jämꞌtyiꞌtum ĉojtyiꞌ bäꞌjaꞌ tsun, judyeyaꞌ rụijsistum dyijyedyeꞌ judyeyaꞌ fer anicjeja Jenꞌ, meꞌ raꞌ chat anic mạꞌjeyacsejaty bäꞌjaꞌ. 6Pạrej muꞌyaꞌ jam meꞌ cạiꞌ dyijyedyeꞌ in, yocve bäꞌyi in, fibis p̂eyacdyeꞌ muntyis in, mọmꞌ dyijtuiꞌ in. 7Muꞌin meꞌtyity in mạꞌjeꞌ tsanꞌ jịꞌchiyacsi in Jenꞌsiꞌ yụꞌtacdyeꞌ muꞌ, jam qui namꞌ méquiꞌ chiquepte in jedyeꞌ buty cạiꞌ mọꞌ. Meꞌ tsanꞌ yi in, "Anic rụijsis ọij jiꞌchäyitidyeꞌ yụ", mijam qui namꞌ méquiꞌ chịj in jedyeꞌ buty cạiꞌ mọꞌ jiꞌchäyitidyeꞌ.
8Chị́jaꞌ jämꞌsiꞌ nash mọꞌ Jenꞌsiꞌ yụꞌtacdyeꞌ muꞌ, meꞌ tsanꞌ meꞌ jemoñeꞌ qui namꞌ tsun tashcheꞌ jämꞌ chị́jaꞌ tyídyes buty mọꞌ yụꞌtacdyeꞌ. 9Dyijyeva, mọꞌ yụꞌtacdyeꞌ yụꞌtac jam rụijtyitydyes muntyiꞌ in, mọꞌ nash yụꞌtac ac̣hiꞌyitydyes in. Muꞌindyes mọmoꞌ in tyi chuc jam chicacsity in jacchety ayoꞌ in judyeyaꞌ muꞌin ac̣hiꞌ bäꞌyity in jam dyijtutety Jenꞌ in, mijam chiquetety in, judyeyaꞌ ijacsity in, judyeyaꞌ ijaquity jenꞌ in judyeyaꞌ tseꞌ muꞌin, 10judyeyaꞌ voꞌvoijtyiꞌ in, judyeyaꞌ vaj sonꞌ meꞌtity in, judyeyaꞌ jiꞌmincacsity muntyiꞌ in, judyeyaꞌ väväjñity in, judyeyaꞌ väñädyeꞌyaꞌ jiꞌmeꞌtacsity ayoꞌyaꞌ in, räj muꞌin meꞌtity in, vaꞌquecbitety in rụijsis jiꞌchäyitidyeꞌ Jenꞌsiꞌ muꞌ, muꞌindyes in mọꞌ yụꞌtacdyeꞌ Jenꞌsiꞌ muꞌ. 11Ọij rụijsis jiꞌchäyitidyeꞌ, mọꞌ meꞌchuiꞌ mọꞌ jämꞌsiꞌ p̂eyacdyeꞌ Jenꞌsiꞌ muꞌ voroꞌtacsis yụ, ĉaĉaij na muꞌ mujuꞌchaꞌ jämꞌyedyeꞌtumtyiꞌ Jenꞌ, muꞌ yuꞌtyin yụ paj qui meꞌ voroꞌtacsi yụ.
Pablo yoshoropaij jéte Jenꞌ ñịbeꞌ ĉọcsity
12Yụ yoshoropaij jéte Jesucristo Ayoꞌ tsun, muꞌ soꞌmintyiꞌ ferdyedyes yụ paj qui yụ carijtaqui muꞌdyes. Yụ yoshoropaij jéte ĉaĉaij na muꞌ cavin yụ anic chiquetety raꞌ yụ judyeyaꞌ muꞌdye tsimꞌtyin yụ paj qui úñi muꞌdyes yụ. 13Meꞌ tsanꞌ aꞌc̣his p̂eyacdyeꞌ jiꞌshupqueyete yụ jiquej judyeyaꞌ jịꞌñibeꞌcacsi yụ muꞌin cäc̣häꞌchutety in, anic fer ñịbeꞌtacsi jiquej yụ. Meꞌ tsanꞌ meꞌ, Jenꞌ qui namꞌ ñịbeꞌ ĉun yụ ĉaĉaij na yụ jambiꞌdyemꞌ anicjete Jesús yụ, jambiꞌdyemꞌ chị́yete jiquej yụ muꞌdye Jesús meꞌse yụ. 14Muꞌ na Ayoꞌ tsun därsiꞌ ñịbeꞌjitidyes soꞌmin yụ judyeyaꞌ chimeꞌ ñútyin yụ paj qui mujuꞌchaꞌ anicjete yụ judyeyaꞌ paj qui mạꞌjeyacsi yụ, mọꞌ anicyedyeꞌ tsun judyeyaꞌ mọꞌ mạꞌjitidyeꞌ tsun mọꞌ Jesucristoyaꞌ jijtuiꞌsiꞌ.
15Anic rụijsis ọij p̂eyacdyeꞌ tupuj tsun anicjejaꞌ, yiꞌ: Muꞌ Cristo Jesús atsij úcheꞌ jaccheꞌ jijtuij paj qui jiꞌc̣honsinꞌ tsun juchajtumtyiꞌ muntyiꞌ tsun. Yụ anic mujuꞌchaꞌ juchajtumtyiꞌ, meꞌ buꞌyi shupqui yụ, uyaꞌyaꞌ yoctyiꞌ in. 16Meꞌ tsanꞌ meꞌ yụ, Jenꞌ qui namꞌ ñịbeꞌ ĉun yụ paj qui räj muntyiꞌ in cạvepte yụ́yaꞌ in Jesucristos mạꞌjitidyes muꞌ, junꞌ chuc vayacjibun juchaj yụ judyeyaꞌ jiꞌc̣hoñin yụ, paj qui meꞌ tupuj yoctyiꞌ muntyiꞌ in yụ́yaꞌ cạvepte in Jenꞌsiꞌ ñịbeꞌjitidyes muꞌ, paj qui muꞌin chimeꞌ meꞌ in, yódyemꞌ yụ u vayacjibun yụ mọꞌ därsiꞌ juchaj yụ, meꞌdye raꞌ muꞌin chimeꞌ in vayacjeyacsebi juchaj muꞌin, anicjete jụijyaꞌ in, chat qui raꞌ Jenꞌyadyety in. 17Timaꞌqueja Jenꞌ, mumꞌ yirity tạꞌcaty anictyity Jenꞌ, muꞌ jam jorojĉantyiꞌ, tạꞌcaty muꞌ ayoꞌbuꞌyi, räjĉan raꞌ meꞌ. Muꞌ raꞌ jam jụꞌñisĉan mạyedyeꞌ mọtsity. Irijyejaꞌ raꞌ muꞌcheꞌ judyeyaꞌ raꞌ yejĉojaꞌ timaꞌqueja, ¡paj jam mọtsiꞌ timaꞌcacdyemꞌ!
18-19Mi Timoteo, mi jeñej buꞌyi ạvaꞌ yụ, yụ́dye soꞌmeye q̂uinꞌ ọij yụꞌtacdyeꞌ. Fer raꞌ carijtaqui Jenꞌdyes mi, mọꞌ jeñej buꞌyiꞌ chutidyeꞌ Jenꞌdyes, meꞌ raꞌ jam farajjeꞌ mi anicyedyeꞌ Jenꞌcheꞌ, meꞌchuvamꞌ rụijsis dyijyedyeꞌ mọꞌ ĉojtyiꞌĉansim. Meꞌ raꞌ chat cạ̈tsiꞌ míyaꞌ mọꞌ p̂eyacdyeꞌ soꞌmacsis Jenꞌ vojity tsun jiquej, mọꞌ seꞌves jiquej mi, mi jiꞌjäquintyiꞌ jiquej in, mi tsimꞌtactyiꞌ Jenꞌtyiꞌ, yi in. Pạrej qui namꞌ jam meꞌ dyijyi in, jam cäc̣häꞌchuqui in rụijsis dyijyedyeꞌ ĉojtyiꞌĉansiꞌ muꞌin, chat qui meꞌĉandye penjan Jenꞌdyes in. 20Meꞌdye muꞌin chimeꞌ in muꞌ Himeneo judyeyaꞌ Alejandro. Yụ vaꞌtacdyeꞌ soꞌmacsi, soꞌmete yụ Sọyoꞌ Satanás paj qui muꞌ jịꞌñibeꞌcacsi muꞌin in paj qui quivij dyijyeban juchajcheꞌ in, aty meꞌ jụijyaꞌ in aty qui raꞌ jam meꞌ aꞌc̣his p̂eyacdyeꞌ jiꞌshupqueyebajte Jenꞌ in.
Currently Selected:
Tashches Timoteodyes 1: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
