Tashches Samuel 13
13
Israeltyiꞌ vóshiꞌ chutidyeij in filisteotum in
2Aty muꞌ ayoꞌbuꞌyi Saúl chat qui chutidyeꞌcheꞌ dyijyi. Vajmuꞌyaꞌjeyacsi Israeltyiꞌ vóshiꞌ in, chat qui tsimacsi chibin quiꞌ mir yụꞌtacsi muntyiꞌ in väc̣häꞌtyitydyety in. Muꞌin na yoctyiꞌ jutacseban, bäꞌyedyetuban muꞌin in. Päräꞌ quiꞌ mirdyety väc̣häꞌtyity in Saúltum in Micmasĉan in, judyeyaꞌ Betelĉantyiꞌyaꞌ mụcuꞌ in, yiriꞌ mir jutacsi muꞌ Saúl Jonatántum in ạvaꞌ muꞌ, Gabaaĉan jịjcaij in, Benjamínsiꞌĉan jac. 3-4Muꞌ na Jonatán väc̣häꞌtyitytum muꞌ ñutsjeĉunacsi in ijacsi in muꞌin filisteoty väc̣häꞌtyity in Gabaaĉan. Chị́qui muꞌin filisteo in junꞌ chuc ijac väc̣häꞌtyity muꞌin. Mọꞌdyes qui muꞌ Saúl jéyacsi Israeltyiꞌ vóshiꞌ in paj qui yósiꞌdyemꞌ bäꞌyedyeꞌ o, paj meꞌsiꞌ tujjeꞌ in corneta, paj qui vajmuꞌyaij Israeltyiꞌ vóshiꞌ in chutidyeij raꞌ in filisteotum in. Atsij räj muꞌintyiꞌ väc̣häꞌtyity in, Gilgalĉan vajmuꞌyaij in Saúltum in. 5Chimeꞌdye muꞌin vajmuꞌyaij in filisteo in paj qui chutidyeij in Israeltyiꞌtum vóshiꞌ in. Anic muꞌin mujuꞌchaꞌyaꞌ daiꞌyaij in filisteo in, chibin quiꞌtac mir vodoꞌ chutidyedyes careto muꞌin, judyeyaꞌ jäbän mir cavayochety väc̣häꞌtyity in. Uts na yujyaty väc̣häꞌtyity in, junꞌtum raꞌ muꞌin in, jeñej jáman meꞌsiꞌ muꞌin in. Micmasve dyäqui in pamꞌve Betaven.
6Muꞌincheꞌ tŝọij in Israeltyiꞌcheꞌ vóshiꞌ in, jämꞌ ñịbeꞌ cạveꞌ in. Muꞌin na ĉaꞌjoij in, anic ñịbeꞌ cạveꞌ in, jijmuꞌsiti in, pạrej toꞌĉan jijmuꞌsiti in, pạrej noriaĉan roiꞌjeꞌ in, pạrej fadacdyeꞌĉan jịjcaij in, pạrej mijve jijmuꞌsiti chimeꞌ in. 7Pạrej nopej jịjcaij Jordán ĉaꞌjoij in, chaꞌsheꞌ in Gadve judyeyaꞌ Galaadve. Muꞌ Saúl, ayoꞌ muꞌin tacve muꞌ Gilgalve räjtumdye väc̣häꞌtyity muꞌ, anic noiꞌyedyeꞌtum muꞌin in noc̣hoꞌc̣hoyacñi in. 8Muꞌĉan tsanꞌ muꞌ biste muꞌ Samuel, yävätidyeꞌ mạyedyeꞌ biste ĉaĉaij na meꞌquiꞌ tupudyeꞌ muꞌ Samuelsiꞌ. Tyäꞌpäj muꞌ venchuij muꞌyaꞌ, itŝij Gilgalĉan shupqueti. Muꞌin muntyiꞌ in aty yạjquibajte pạrej in. 9Mọꞌdyes muꞌ Saúl jéyacsi:
—Jeshaꞌ tuvac cuꞌdyeꞌ jiꞌcoꞌshayejaꞌ Jenꞌdyes, judyeyaꞌ ujajaꞌ jämꞌjitidyes chimeꞌ tsun —jéyacsi Saúl muntyiꞌ in.
Muꞌdye Saúl jiꞌcoꞌshayeꞌ Jenꞌdyes cuꞌdyeꞌ. 10Aty raꞌ ijaijyaꞌ jiꞌcoꞌshayeꞌ, chat qui shupqueti muꞌ Samuel. Jiꞌrebeĉunꞌte muꞌ Saúl vorjeĉunꞌte. 11Samuel jajiti:
—¿Junꞌ dash meꞌ jiꞌcoꞌshayem?
Vorjete Saúl:
—Ĉaĉaij nash cạvacsi yụ aty muꞌyayaj yajquibun yụ in, judyeyaꞌ itŝijdyemꞌ mi, jiyiꞌ tupudyeꞌ mi. Chimeꞌdye muꞌin filisteo in aty vajmuꞌyaij in Micmasĉan in, 12yụ qui namꞌ dyijyi: "Atyuꞌ raꞌ tsuncheꞌ tŝọij in, uts na jambiꞌ jụꞌñij cọdaqui Ayoꞌcheꞌ yụ." Meꞌ tsanꞌ jam mạꞌjeꞌ yụ, jemoñeꞌ qui namꞌ yụ́dye mọmoꞌ jiꞌcoꞌshayeꞌ Jenꞌdyes —yi muꞌ Saúl.
13Vorjajiti Samuel:
—Anic ĉụiꞌsiꞌ shapudyeꞌ mi meꞌ, uts na jam méquiꞌ chiquepte mi p̂eyacdyeꞌ soꞌminsiꞌ mi jiquej muꞌ Jenꞌ Ayoꞌ tsun. Jeñej chiquete jụijyam, a vuty yuꞌtyin u paj qui yejĉoij räjĉan ayoꞌbuꞌyi mi judyeyaꞌ vóshiꞌ mi Israeltyidyes vóshiꞌ in. 14Q̂uinꞌ chat raꞌ shuban mi, yoctyiꞌ qui raꞌ quevte Ayoꞌ, jụꞌñity chuc maꞌjotyetety, muꞌ qui raꞌ yụꞌte paj qui muꞌ ayoꞌbuꞌyi Israeltyidyes vóshiꞌ in, muꞌin ĉụiꞌtyiꞌ Jenꞌtyiꞌ muntyiꞌ muꞌ. Meꞌdyes qui raꞌ shuban mi ĉaĉaij na jam chiquete Ayoꞌ mi —yi jajiti Samuel.
Currently Selected:
Tashches Samuel 13: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
