रूमी 9
9
भगवान अरू सुनावतो होड़कू
1ईंग ईसू मसीरीग हवे अरू सनाताय कता ईंग कतायतना। सुद बिरुवा अगुवाइवायिंतना। हनालगा ईंग जीव कतायतना, ईंग मेरिंग लबरातना, माःआन। 2अरू ईंगरिकुःआ जइत सगाकू, इसराएल होड़कू लगा ईंग जीव ओंगोल हदराः घड़ीन कुहकाःतना। 3होया अवेन दो भगवान ईंग सती-सरापतिरिंगखन ईसू मसीतेयिंग एटाः जुवाः, जेमहा हँकुःआ होड़कू हों ईसू मसीराः दुलारकू सुदी अवे। 4हँकुःआ इसराएल होड़कू भगवानरिकुःआ समुटावतो होड़कू हवे। हँकू एचेरे भगवान तुमिन मरंग इदानिया हना अनँयग एचे उदुःवातेडकुःआ। हाँय हँकू सुदा कता-जमकावतेडखन नियमकूने एमेवातेडकुःआ। हाँय हँकू करा इयाकू जागगेय हना बदीरेय चेडतेडकुःआ अरू हँकू मुरुक बगराय जबानवातेडकुःआ। 5इबराहीम, इसहाक अरू एकूब हँकूरिकुःआ खुटिपरिया होड़कू हवे अरू जमाकूरीग भगवान ईसू मसी होड़राः सुरइत मुरइतरे, हँकूरीग नइड़-बाँस होड़तेय जनमावनेना। सगर सइट होड़कू हाँयकू जागगोड ञवन। आमीन!
6दो अपे ओंगलेतना, इसराएल होड़कू बदीरे भगवान अनँयग जबाने टड़ाव एंडागोतेडा जा? बुरी। इसराएल होड़कू अते मुरुक होड़कू सतायरे भगवानरिकुःआ होड़कू कोवाकुःआ। 7अरू हँकू इबराहीमरिकुःआ नइड़-बाँस होड़कू होयाकियान अते सतायरे हाँयरिकुःआ लइंकू ओरोकू बड़ाँवनेना। इबराहीमरिकुःआ मुरुक बगरा लइंकू दोहोना, मनदो भगवान हाँय एचेरेय कतातेरा,
“आमरीग बेटा इनिसहाकते आमरिकुःआ नइड़-बाँस होड़कू बड़ाँःता।”#रेःएत 21:12
8दो अबू नाःआबू सुदीयतना, इबराहीमरिकुःआ नइड़-बाँस होड़कू अते मुरुक होड़कू भगवानरिकुःआ लइंकू ना लवे। मनदो भगवानराः जबान इयाकू जनमावकिया हँकुःआ लइंकू सतायरे भगवानरिकुःआ लइंकू हवे। 9भगवान इसहाक बदीरे इबराहीम एचेरेय जबानतेरा,
“ईंग कलोम ननानाः महिना आम एचेरेयिंग कुदा वेगता,
अरू हनमेला सराह एचेरे मी होड़ हेरेल होन होयाःता।”#रेःएत 18:10,14
10हनाँय अबूरीग खुटिपरिया होड़ इसहाक दोहोना अरू हाँयरीग अइमी रिबका जवा लइंकिने जनमावतेरा। 11-12हँकिन जनमावगुः अते मनाड़ंग इसराएल होड़कूराः रिती-बिधी अते एनेटाः इया भगवान रिबका एचेरेय कतातेरा,
“मरंगीग हेरेल होन हुडिंगीग हेरेल होनरीग सेवकिया होड़े बड़ाँःता।”#रेःएत 25:23
नाःआ कताते अबू सुदीयता, भगवान तोनोंगीग होड़ नपाय सहे बेलूर बुताय बुताता, हनाते हाँय मेरेय सुनावगेयता। मनदो हाँय अनँयग ओंगोल इया होड़कूय सुनावकूता। 13दो नाःआ कता, भगवानराः कागदरे ओजाःतो इदा, हनानाः उदुःतना,
“ईंग एसाव अते बगरा,
एकूबिंग दुलारतेरा।”#मला 1:2,3
14दो अबू कता अवेयताबू जा, भगवानराः फड़ियाव सताय कोवानेःआ, माःआन? कहियो ओरोबू कता अवेतेरा। 15भगवान मोसेस एचेरे मड़ंगरेय कतातेरा हना कता अपे उहियारगेपे,
“ईंग मयावाय लगायिंग ओंगलेता,
हनायिंग मयावाता,
अरू सोगावाय लगायिंग ओंगलेता,
हनायिंग सोगावाता।”#एचे उडुंग 33:19
16होड़कूराः ओंगोल इया सहे हँकू सेसा-दूराता हना अते भगवान तोनोंगीग होड़ मेरेय मयावायता, मनदो हाँय अनँयग ओंगोलते होड़कूय मयावायता। 17भगवानराः कागदरे भगवान मिसिरी राजा पिरोन एचेरेय कतायतना,
“ईंग आम राजायिंग बड़ाँवकेडमेःआ,
अरू ईंगराः जंगर आमिंग उदुःवारा
जेमहा चउंदीसरिकुःआ जमा होड़कू ईंग जाग घड़ीनकू मान मरजइतगिंग।”#एचे उडुंग 9:16
18दो भगवान मयावा लगाय ओंगलेयता हनाँयग होड़े मयावाता, अरू भगवान जीव केटेगगे लगाय ओंगलेता हनाँयग होड़राः जीवे केटेगगोडता।
भगवानराः रीस अरू मया
19दो अपे अते तोनोंगीग ईंग एचेरेय कतायता, “भगवान जमाकून अनँयग ओंगोल इयाय एचेयता दो अबू चिला लगाय बदीबूता अरू इये हाँयराः ओंगोल अते एटाः इयाय सलाव अवेनता?” 20दो आम मी होड़ होनोड़ हवे अरू आम भगवान सुदाम अड़ा-चउकी अवेनता जा? कहिसाः तुलात जिनिस तुलादार एचेरे नाःआ इया कता अवेयता जा, ईंग नाःआ इया चिला लगाम तुलागोतेडिंगा? 21अरू मी होड़ कुंभार अनँयग ओंगोल इया गोलहात हासते ननपाय बुता लगा अरू सगर दिनराः बुता लगा भंडाकून तुला लगा हाँय एचेरे हातपात कोवानेःआ जा? 22हनन इया भगवान हों इदानिया। हाँय एचेरे अनँयग ओंगोल इया एएचे लगा हातपात इदा। कसूरकेडखन डंडकू पवावकुःआ, हँकुःआ होड़कू एचेरे भगवान रीसकियानखन अनँयग जंगरे उदुः अवेकेःआ, मनदो हाँय हँकू एचेरे सहाव घड़ीने दोहोना, 23जेमहा हाँय मान मरजइतकू लगा मनाड़ंगतेय सपड़ाव दोहोतेडकुःआ हँकुःआ होड़कू हाँय तुमिन मरंग इदानिया, हनाय एचे सुदी अवेकू। 24दो अबू एहूदाकू सहे बेगर एहूदाकू दोहोन अते भगवान मनाड़ंगतेय ओंगोल दोहोकेडखन अबू जमा होड़कूय सुनावकेडबुःआ। 25भगवान अनँयगराः बड़रा कता होड़ होसेराः कागदरेय कतायतान इया,
“ईंगरिकुःआ होड़कू मेरकू दोहोगान,
हँकुःआ होड़कू ईंग राःकूता, ईंगरिकुःआ होड़कू, माःआन
अरू ईंग मेरिंग दुलारगाडकुःआ,
हँकुःआ होड़कू ईंग राःकूता, ईंगरिकुःआ दुलारतो होड़कू, माःआन।”#होसे 2:23
26अरू,
“अपे ईंगरिकुःआ होड़कू ना लवे,
माःआने कता उदुःतेरा
हँकुःआ होड़कूकू राःकूता,
अपे जीयत भगवानरिकुःआ लइंकू हवे, माःआन।”#होसे 1:10
27भगवानराः बड़रा कता होड़ एसयाह हों इसराएल होड़कू बदीरे हुमइसकेय कतातेरा,
“इसराएलरिकुःआ होड़कू समुंदरराः बितील इयाकू बनागराबाः जुवाःतान हों,
हनामिन अते अनादोम होड़कू बनसाःता।
28भगवान चउंदीसरिकुःआ जमा होड़कू एचेरे अनँयग कता इयाय एचेयता,
अरू हाँय सतायते ओहेने फड़ियावकूता।”#एस 10:22,23
29अरू ननानाः कता एसयाह मड़ंगरेय कतातेरा,
“मरंग जंगरदार भगवान अबू लगा नइड़-बाँस होड़कू मेरेय बनसावकेकुः दो,
अबू हों सोदोम सहर अरू अमोरा सहररिकुःआ होड़कू इयाबू लाय एंडा जुवाःकुःआ।”#एस 1:9; रेःएत 18:16
इसराएल होड़कू भगवान एचेरे मेरकू बिसवासगाड
30दो नाःआ बदीरे चेले माःआनबू कताय? बेगर एहूदाकू भगवानराः ओंगोल इया बेगर गारबार होड़कू बड़ाँः लगा मेरकू कुरनिसगेःआ। मनदो हँकू बिसवासकेडखन भगवानराः ओंगोल इया बेगर गारबार होड़कूकू बड़ाँवयना। 31अरू इसराएल होड़कू भगवानराः ओंगोल इया बेगर गारबार होड़कू बड़ाँः लगा मुरुककू कुरनिस सोतेडा, मनदो मेरकू बड़ाँव अवेगान। 32चिला लगा नाःआ इया होयायना? इसराएल होड़कू भगवान एचेरे बिसवासकेडखन बेगर गारबार होड़कू बड़ाँः लगा मेरकू ओंगोलगाड, मनदो नियम मनाः लगाकू कुरनिसगे अते बेगर गारबार होड़कू बड़ाँः लगाकू ओंगोलतेड। हनालगा हँकुःआ इसराएल होड़कू, होड़कू एचे तामकूता हनानाः खुंटातेकू तोहोडयना, 33ईसू बदीरे भगवानराः कागदरे ओजाःतो इदा,
“ईंगपे अयूम, होड़कू एचे तोहोडकूता हना खुंटा ईंग सियोनरेयिंग बीडगोडता,
अरू हान होड़कू एचे तामगोडकूता।
अरू हाँय एचेरेकू बिसवासगेता,
हँकुःआ होड़कू कहियो ओरोकू गियूनेना।”#एस 8:14; 28:16#9:33 इसराएल होड़कूराः मरंग सहर एरुसलेमराः एटाः ञाव दोहोना सीयोन। होड़कू एचे तोहोडगोडता हना खुंटा ईसू मसी हवे। ईसू मसी भगवानरीग बेटात हवे, अरू चउंदीसरिकुःआ होड़कूराः कसूर बदलारे गुजुः लगाय वेगनेना हाँयग होड़ हवे माःआन इसराएल होड़कू मेरकू बिसवासगाड। हनालगा ईसू मसी हँकुःआ होड़कू एचे तामकूता हना खुंटा इया इदानिया।
Currently Selected:
रूमी 9: kfp
Highlight
Copy
Compare
Share
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.