रूमी 10
10
1दो ईंगरिकुःआ अजी बोपोहकूतिंग, ईंगरिकुःआ जइत सगा इसराएल होड़कू सडाः लगा मुरुक चहाः घड़ीनिंग अरजीतना। 2ईंग सुसुदीतना, हँकुःआ होड़कू भगवान सेवा लगा मुरुक ओसताज इदानकुःआ। मनदो हँकू भगवानराः ओंगोल इया सेवागे लगा मेरकू सुदीयतना। 3भगवान करा उड़ी होड़कू बेगर गारबार होड़कूय बड़ाँवकूता, हना हँकू मेरकू सुदीयतना। अरू हँकू अँननकू अँकूते बेगर गारबार होड़कू बड़ाँः लगाकू कुरनिसगेतना। हनते हों हँकू भगवानराः ओंगोल इया बेगर गारबार होड़कू मेरकू बड़ाँव अवेगना। 4ईसू मसी मोसेसराः जनामा नियमकूने पुराव एंडागोतेडा। हनालगा हाँय एचेरेकू बिसवासगेता हँकुःआ होड़कू भगवानराः ओंगोलरे बेगर गारबार होड़कूकू बड़ाँव जुवाःता।
भगवान जमा जइत होड़कूय सडावकूता
5नियम मनाः अते भगवानराः ओंगोलरे बेगर गारबार होड़कू बड़ाँः लगाकू ओंगलेता हँकुःआ होड़कू बदीरे मोसेस ओजाःतेरा,
“जमा नियमकून इयाय सलाःता हाँयग होड़,
हनानाः नियमते जिनियते दोहोनता।”#लेवी 18:5
6अरू बिसवासते भगवानराः ओंगोलरे बेगर गारबार होड़कूकू बड़ाँः लगा अपे अँननपेराः जीवरे अहापे कताय, ईसू चउंदीसरे उतराव अगूगेय लगा इये सेरमो देसरेय देग अवेनता, 7अरू हाँय पतालपूर अते जियाव रेमकिडिगखन उडुंग अगूगेय लगा इये सेनता, माःआन?#दो. नि. 30:12-13 8बिसवासराः सरवनले परसारगेता अरू हनानाः बदीरे भगवानराः कागदरे ओजाःतो इदा;
“सरवन अअयूम लगा अपे एचेरे इदा,
अरू हना सरवन अपेराः अलंगरे ककता लगा इदा
अरू अपेराः इंदरीरे हों दोहोत इदा।”#दो. नि. 30:15
अरू बिसवास बदीरेले परसारगेता हनानाः सरवन ननानाः हवे; 9अपे ईसू मसी, परबू हवे माःआन अरू भगवान हाँय गोएगतो होड़कू अतेय जियाव रेमकिडिया, माःआनपे बिसवासगेता, अरूपे कबुलाःतान दो अपे सडाव जुवाःतापे। 10मी होड़ अनँयग जीवरे बिसवासकेडखन भगवानराः ओंगोलरे फड़ियावतो होड़े बड़ाँव जुवाःता अरू हाँय कबुलाः घड़ीने सडाव जुवाःता। 11भगवानराः कागदरे ओजाःतो इदा हनन इया,
“भगवान एचेरेय बिसवासगेता हाँयग होड़,
कहियो ओरोय गियूनेना।”#एस 28:16
12भगवानराः ओंगोलरे एहूदाकू अरू बेगर एहूदाकू जमाकू मिनी इदानकुःआ, अरू तोनोंगीग एटाः कोवाकुःआ। जमाकू लगा मिनीटोंग परबू इदानिया अरू हाँय एचेरेकू अरजीता, हँकुःआ होड़कू मिनी जीवकियानखने सडावकूता। 13भगवानराः कागदरे एटाःरे नाःआ इया ओजाःतो इदा,
परबूराः ञाव गोःकेडखनकू रगेयता,
हँकुःआ जनामा होड़कू सडाव जुवाःताकू।#ओवेल 2:32
14मनदो हँकू हाँय एचेरे मेरकू बिसवासकेः दो करा इया हाँय एचेरेकू अरजीकेःआ? अरू हँकू हाँय बदीरे मेरकू अयूमकेः दो करा इया हाँय एचेरेकू बिसवासकेःआ? अरू तोनोंगीग हँकू एचेरे हाँय बदीरे मेरकू कताकेः दो करा इयाकू अयूमकेःआ? 15तोनोंगीग हँकू मेरकू वारकेकुः दो हँकू करा इया एटाःकू एचेरेकू कता उदुः अवेकेःआ? हनालगा भगवानराः कागदरे हँकुःआ होड़कू बदीरे नाःआ इया ओजाःतो इदा,
“नपाय सरवनकू उदुःता हँकुःआ होड़कूराः काट तुमिन सुघर इदा!”#एस 52:7
16मनदो मुरुक होड़कू नपाय सरवन मेरकू मनेवागाड। भगवानराः बड़रा कतायीग होड़ एसयाह कतातेरा,
ने परबू, इये अलेराः सरवनकू बिसवासकेरा?#एस 53:1
17दो तोनोंगीग होड़ बिसवासगे लगा इदान दो, हाँय मड़ंगरे मसी बदीरे नपाय सरवन अअयूम लगा इदा। 18मनदो ईंग होंबरेतना, हँकू सरवन मेरकू अयूमगाड जा? हाव, अयूमकेराकू।
“हँकूराः अरो जमा चउंदीसरिकुःआ होड़कू अयूमकेरा,
अरू हँकूराः सरवन जमा चउंदीसरे सेड़यावयना।”#सेरेंगकून 19:4
19ईंग अरूयिंग होंबरेतना, इसराएलरिकुःआ होड़कू सताय मेरकू सुसुदीःआ जा? हाव, हँकू सुसुदिःआकू। मड़ंगरे मोसेसराः जूगरे भगवान एचेरेय कतातेरा,
“ईंग बेगर एहूदाकूयिंग मयावाकूतानते,
अपेराः जीव इराते पेरेग जुवाःता,
अरू ईंग मेरकू सुदीगींगतना हँकुःआ होड़कूते
अपेराः जीव रीसते कटकटाःता।”
20तयोमरे भगवानराः बड़रा कतायीग होड़ एसयाह बेगर बोरते भगवान लगाय कता उदुःतेरा,
“ईंग मेरकू ञामगिंगा, हँकुःआ होड़कू ईंगकू पवावयान
अरू ईंग मेरकू होंबोरगिंगा हँकुःआ होड़कू ईंग एचे उदुःवातेडकुःआ।”#एस 65:1
21मनदो इसराएल होड़कू बदीरेय कतातेरा,
“जमा बेला ईंग हँकू सुदा हेल-मेलगुः लगा सपड़ावतोयिंग दोहोना,
मनदो हँकू ईंगराः कता मेरकू मनावगान,
अरू केटेग जीव इयाकुःआ होड़कू होयायान।”#एस 65:2
Currently Selected:
रूमी 10: kfp
Highlight
Copy
Compare
Share
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
