रूमी 8

सुद बिरुवाते नँवा जीव

1भगवान अबू सडावकेडबूखन ईसू मसी सुदाय मिनीगोतेडबुःआ, दो भगवान अबू ओरोय डंडियावतेडबुःआ। [अबू होड़कूराः ओंगोल इया कोवान, मनदो सुद बिरुवाराः ओंगोल इयाबू सलाःता।] 2अबू ईसू मसीरिकुःआ होड़कू हवे। हनालगा भगवानराः बिरुवा नँवा जीवे एमेकेरा अरू हाँय अबू कनासूर जीवते एचे अड़ाःकेडबूखन गुनुजुःतेय सडावकेडबुःआ। 3दो अबू मोसेसराः नियमकून जमालेःआ मनाः लगाबू कुरनिसगे। हनते हों अबूराः कसूर लूर-नेवन मेर टुटीगगुःता। मनदो भगवान अबूय सडाव अवेता। हनालगा जमा होड़कूराः कसूर बराव एंडागे लगा, हाँय अनँयगरीग मिनी होड़ बेटात ईसू मसी, कसूरतो मनुवाराः सुरइत मुरइतरे, नाःआ चउंदीसरेय वारगोतेडीग। हनते हाँय जमाकूराः कसूर लगा डंडियावतेडखन ईसूय एचे बलिदानगोतेडीग। 4दो नुँहू अबू कसूर जीवराः ओंगोल इया मेरबू सलाःतना। मनदो सुद बिरुवाराः ओंगोल इयाबू सलाःतना। ननानाः लगा नुँहू अबू जमालेःआते नियमकूनबू मनाव अवेनता।

5कसूर लूर-नेवन इयाकू सलाःता, हँकुःआ होड़कू हनानाः कसूर कताकूनकू ओंगोलगोड ञवनता। मनदो सुद बिरुवाराः ओंगोल इयाकू सलाःता, हँकुःआ होड़कू, हनन इयाकू ओंगोलगोड ञवनता। 6कसूर लूर-नेवन इयाकुःआ होड़कू भगवान अते एटाःकियानखनकू गोएग जुवाःता। मनदो सुद बिरुवाराः ओंगोल इयाकुःआ होड़कू सलसत जीव अरू ओरो टुटीगनेना हना जीवकू पनावाःता। 7कसूर लूर-नेवन इयाकुःआ होड़कू नियमकून मेरकू मनाःता अरू ओरोकू मनाव अवेनेना, 8अरू हँकुःआ होड़कू भगवान ओरोकू ननाय अवेतिडिया।

9भगवानराः बिरुवा अपे जीवरेय दोहोनता दो अपे कसूरराः लूर-नेवन इया मेरपे सलाःता, मनदो सुद बिरुवाराः ओंगोल इयापे सलाःता। अरू ईसू मसीराः बिरुवा अनँयग जीवरे कोवानेःआ हाँयग होड़, ईसूरीग होड़ ना लवे। 10नुँहू ईसू मसी अपे जीवरे इदानिया दो, अपेराः देह कसूर बदीरे गोएगतो इया इदा। मनदो भगवान अपे बेगर गारबार होड़कूय बड़ाँवकेडपे अते, अपेराः बिरुवा जिनियत इदा। 11भगवानराः बिरुवा, ईसू मसी गोएगतो होड़कू अतेय जियाव रेमकिरिया। अरू हनाँयग सुद बिरुवा अपे जीवरे होंय दोहोनता। भगवान ईसू मसी गोएगतो होड़कू अतेय जियाव रेमकिरिया। हनन इया हाँय हनाँयग सुद बिरुवाते अपेराः गुजुः इयाःआ देहकूने जियाव रेमता।

12दो ईंगरिकुःआ अजी बोपोहकूतिंग, अपे कसूर लूर-नेवनाः ओंगोलकून इया सलाः लगा कोनोवानेःआ। 13अपे हनन इयापे सलाः दो गोएग एंडा जुवाःतापे। मनदो अपे सुद बिरुवाराः जंगरते कसूर लूर-नेवनाः ओंगोलकूनपे अड़ाः एंडागोड दो, अपे जिनियावगोड ञवनता। 14सुद बिरुवा अगुवाइकूता हँननकुःआ होड़कू भगवानरिकुःआ लइंकू हवे। 15अपे सुद बिरुवापे पवावकियानते पोंकाहा बेगारी होड़कू इया दोहोन लगा कोवानेःआ, मनदो भगवान आँयगराः बिरुवाते अनँयग लइंकू इयाय समुटावकेडपेःआ। नाःआते अबू हाँय, ने अबबा, ने अपांग, माःआन चइड़ घड़ीनबू राःगेयता। 16अरू हनाँयग सुद बिरुवा अबूय एचे सुदीबूता, अबू भगवानरिकुःआ लइंकू हवे, माःआन। 17अबू हाँयरिकुःआ लनाइंकू हवे दो अबू हों ईसू सुदा भगवानरिकुःआ इताडदारबू बड़ाँवकिया। अरू ईसू मसी सुदा कटसियाबू सहाव दो हाँय सुदा मान मरजइत हों पनावाःताबू।

भगवारिकुःआ होड़कूराः मान मरजइत

18ईंग सुदीबाःगोतेडिंग, अबू तयोमरे भगवान एचेरेबू पवाःता हना मान मरजइत अते नुँहूबू सहाव पारता हना कटसिया तोहोड घाव मिन हों कोवानेःआ। 19भगवान अनँयगरिकुःआ होड़कूय मान मरजइतता हनानाः दिन लगा अबू मनुवाकू एकला कोवान, मनदो भगवान जेहो सकालाःए तुलाकेरा हना जनामा उंभराव घड़ीन दोहोनतना। 20हाँय जेहो सकालाःए तुलाकेरा हना जमा आडयना। अरू हना जमा अननते मेर आडगना, मनदो भगवान हनन इया होया लगाय ओवाडा। 21मनदो नुँहू असरागे लगा इदा। जमा सकालाः अनाडतोते उडुंगकियानखन भगवानरिकुःआ होड़कू सुदा नपाय होयाः लगा उंभराः घड़ीन इदा। 22अबू सुसुदीतना, मी होड़ अइमी लँइग होयाः मेला हसूतेय केहराःता हनन इया भगवान जेहो सकालाःए तुलाकेरा हना जमा नुँहू वरी केहराःतना। 23जमा सकालाः एकला कोवान मनदो अबू हों इंदरीरेबू केहराव ञवनतना। भगवान अबू एमेवा लगाय जबानतेरा हना जबानराः चिनहा इया आँयगराः सुद बिरुवाय एमेवाडबुःआ। अरू भगवान अनँयग लइंकू इया जमालेःआ समुटावकेडबूखन बेगर कसूरतो नँवा देहे एमेवाबूता। हनानाः दिन लगाबू टकागोड ञवनतना। 24भगवान अबूय सडावकेडबुःआ। हनालगा नुँहू अबू जीवरे असरा इदा। तोनोंगाः जिनिस अबू एचेरे इदान दो हनानाः जिनिस लगा अबू असरागे लगा कोवानेःआ। 25मनदो नुँहू अबू एचेरे कोवानेःआ, हनानाः लगाबू असराता दो, हन अरीनबू पवाः वरी सहाव घड़ीनबू तंगीगोड ञवनतना।

26हनन इया सुद बिरुवा अबूय संघरावाबूता। अबू अबड़ इदानबुःआ, हनालगा अबू करा उड़ी अरजीगे लगा इदा हना मेरबू सुदी तजाः अवेयतना। हना कताकून सुद बिरुवा केहराः घड़ीन अरजीगे लगा अबूय संघरावाबूता। 27सुद बिरुवा भगवानराः ओंगोल इया बिसवासी होड़कू लगाय अरजीता। भगवान जमाकूराः ओंगोले सुदीयता, अरू हाँय सुद बिरुवाराः ओंगोल होंय सुदीयता।

28दो अबू सुनुदीबाःगोतेरा, अबू भगवानबू दुलारता अरू भगवानराः ओंगोल इया राः अगूतो इदानबुःआ। दो अबूराः जीवरे होयाःता हना जमाकून अते अबू जीवरे नफा होनोया जुवाःता। 29भगवान मनाड़ंगतेय सुनावकेडकुःआ हँकुःआ होड़कू आँयगरीग बेटा ईसू मसी इया होनोयाः लगा जूग परियातेय ओंगोल दोहोकातेरा, जेमहा ईसू मसी जमा बिसवासी होड़कूरीग वगातुकूय बड़ाँव जुवाः। 30भगवान मनाड़ंगतेय सुनाव दोहोकेडकुःआ हँकुःआ होड़कू अनँयग एचेरेय राः अगुकेडकुःआ अरू फड़ियावतो होड़कूय बड़ाँवगोतेडकुःआ। हनते हाँय हँकू होंय मान मरजइतकेडकुःआ।

भगवानराः दुलार

31भगवान अबू लगा नाःआ इया ननपाये एचेकेरा दो हना बदीरे अबू चेले माःआनबू कतायता? सतायरे, भगवान अबू अगी इदानिया, दो इये अबूय घंटाव अवेबूता? 32भगवान, अनँयगरीग मिनीटोंग निकता बेटात, गुजुः लगा ओरोयिंग जिमातिडिया, माःआन मेरेय ओंगोलगाड, मनदो अबू जमाकू लगाय जिमागोतेडीग। दो हाँय, आँयग बेटात सुदा अबू लगा जमा बरानाः चिला लगा मेरेय एमेकेःआ? 33अबू भगवानरिकुःआ सुनावतो होड़कू हवे, दो इये बदी अवेबूता? भनगवान हमा अबू फड़ियावतो होड़कूय बड़ाँवकेडबुःआ। हनालगा तोनोंगीग अबू ओरोय बदी अवेतेडबुःआ। 34अरू इये अबूय डंडियाव अवेबूता? ईसू मसी अबू लगाय गोएगनेना अरू गोएगतो अतेय जियाव रेमकिया, हनाँयग भगवानराः खउना तिःई गतररे मान मरजइत सुदा दुडुःकियानखन अबू लगा असे घड़ीने अरजीतना। हनालगा तोनोंगीग अबू ओरोय डंडियाव अवेतेडबुःआ।

35ईसू मसी अबूय दुलारता अरू हना दुलार अते तोनोंगाः एटाः अवेबूता जा? ओरो! तोनोंग इयाःआ कटसिया, सहे ओंगोल अदरुजी, सहे संताव, सहे ञेड गोएगबू लगा दिरुवा, सहे कतकाल, सहे ओयोन तुसिंग लगा हुडिंग-बगरा, नाःआ जमाकून हाँयराः हना दुलार अते अबू ओनोरो एटाः अवेतेडबुःआ। 36भगवानराः कागदरे ओजाःतो इदा,

“अले आमरिकुःआ होड़कू होयाकियानते सगर दिन गुजुः दूररेले सेने पारतना;

अरू पुजा ञेड एंडा लगाकू गोःकूता हँकुःआ भेड़ाकू इया इदानलेःआ।”#सेरेंगकून 44:22

37मनदो नाःआ इयाःआ जमा कताकूनरे, अबूय दुलारकेरा हाँयग ईसू मसीते, अबू जिनितावबाः जुवाःता। 38दो ईंग सुनुदीबाःगोतेडिंग भगवान, परबू ईसू मसीते अबूय दुलारता। हना दुलार अते तोनोंगाः अबू ओरो एटाः अवेतेडबुःआ। अबू गुजुःबू सहे जियाःबू, हाँय सगर सइट अबूय दुलार ञवनता। तोनोंगीग सेरमो देसरिकुःआ बराहीलकू सहे हातपात इदा हँकुःआ भूतकू, हँकू भगवानराः दुलार ओरोकू लाय एंडा अवेतेरा। 39नुँहू होयाःतना सहे अरीन होयाःआ, अरू सेरमोरे सहे ओतरे भगवान तुलाकेरा हना जमा जिनिसकून, अबू भगवानराः दुलार अते ओरो एटाः अवेतेडबुःआ।

Currently Selected:

रूमी 8: kfp

Highlight

Copy

Compare