Откровение 8

Ма̄ӷраӷвинлӣтаңи Печатылъҳым

1Пынъӣӷаҳа̄м қылъпыҳтақңамигу ма̄ӷраӷвинлӣтаңа печатылъҳым, қилягми қалъыгнаниӷўа̄ӷутут ынтақун афлъюм авылъҳатун тахка̄н. 2Та̄хкын ысҳаӷанка та̄кут ма̄ӷраӷвинлык яқулгыт ныкывӷалӷӣт Кияӷныӷым сивуңакун. Тамаҳаӷмың қалӷиҳта̄тыңӯтут. 3Та̄хкын иляңа яқулык, тугумӣлык золотамың сягныӷмың, тагилюни ныкывуқ аҳқыфигыгни. Тӯныхка̄т фимиамылӷутмың илятысқылъюки қамахлъюки юӷӣтнун Кияӷныӷым юган. Яқулгым лъӣ золотагнун аҳқыфигыгнун сивуңанилңӯк умӣлгусим ақумутам. 4Фимиамым агыпся̄ маюҳтуқ малигулъюни юӷалъҳитхун Кияӷныӷым югита. Маюҳтут Кияӷныӷмун сягныӷмың яқулгым тугумӣӷаның. 5Та̄хкын яқулгым, тугулюку сягнық, имиӷа̄ кынӷаның аҳқыфигым. Сягныӷым имӣ милю̄тӣ нунамун. Ынка̄м калъюгуҳтыҳлъяхтуқ, кавлыхтаҳлъяхтуқ, ниӷўа̄ҳпахтаҳлъяхтуқ, нуналъю уфсюгутыҳлъяхтуқ.

Қалӷиҳта̄тыт

6Та̄хкын ма̄ӷраӷвинлык яқулгыт, қалӷиҳта̄тылгыт ята̄ҳқут қалӷиҳтиналютың.

7Сивулӣм яқулгым қалӷиҳта̄тни қалӷиҳта̄. Та̄хкын кафтыкшаклъю, кынықлъю акумлютык а̄ўмың нунамун милю̄тахкыт. Ынка̄м пиңаюҳқылъҳа нунам паныҳтуқ, пиңаюҳқылъҳитлъю уқфигыт паныҳтут, қамахлъютыңлъю сюңаӷьюлӷӣт выга̄ӷыт паныҳтут.

8Тӯңлиҳа̄н яқулгым қалӷиҳта̄тни қалӷиҳта̄. Та̄хкын сяңўа̄ на̄йӷаҳлъяхсюгнилңуқ кумаӷугңалӷӣ, милю̄та̄т кылъӣнун. Ынка̄м пиңаюҳқылъҳа кылъӣм а̄ўгуҳтуқ. 9Пиңаюҳқылъҳит кылъӣнилңӯт уңувалӷӣт туқӯт, пиңаюҳқылъҳитлъю аңьяҳпагыт на̄фқыңъўа̄ӷӣ.

10Пиңайӣтаңита яқулгым қалӷиҳта̄тни қалӷиҳта̄. Та̄хкын иӷалықыта̄ҳлъяк, кумаӷуӷңалӷӣ нанистун, қилягамың ифкаҳтуқ пиңаюҳқылъҳитхун кӣўытлъю, сыңъулӷӣтлъю мыӷыт. 11А̄тҳа иӷалықыта̄ӷым «Сюңаӷни». Пиңаюҳқылъҳа мыӷым сюңаӷниҳтыкақ ынка̄м юлӷутыҳлъягыт мыӷлютың туқукат қаюҳлъяк мық сюңаӷниҳтыка̄лӷӣ.

12Стамӣтаңита яқулгым қалӷиҳта̄тни қалӷиҳта̄. Та̄хкын ся̄м тынпӣ сиқинық, танқиқ, иӷалықата̄ӷытлъю, ынка̄м пиңаюҳқылъҳи мамлыхтӣ. Пиңаюҳқылъҳа аӷныӷым мамлыхта̄, пиңаюҳқылъҳалъю унугым.

13Ысҳаӷақалъю, нагақуӷақалъю қаўа̄хпак тыңа̄лӷӣ қӯлвани, игляхтулюни пилӷӣ: «Сыӷлыӷўа̄ӷунақңӯқ! Сыӷлыӷўа̄ӷунақңӯқ! Сыӷлыӷўа̄ӷунақңӯқ! Киңулӣт пиңают яқулгыт қалӷиҳнақыхкумыхтыки қалӷиҳта̄тытың, та̄хкын ынңа̄талъ сыӷлыпыста̄ӷунақңӯқ югнун нунами кияҳлъыҳӣт тама̄ни пилъыӷни!»

Currently Selected:

Откровение 8: ess2

Highlight

Compare

Copy