Откровение 7
7
144,000 Израилыӷмӣт
1Тама̄кут киңуңитның ысҳаӷанка стамат яқулгыт ныкывӷалъҳӣт ыстамани каңиӷӣтни нунам. Яқулгыт нуқнықыфтӣт стамат ануқыт ануқлъинӷитысқылъюку нунами налиӷмың кылъӣни налиӷмың алңунак уқфигни. 2Та̄хкын ысҳаӷақа иляңа яқулык маюлӷӣ асиваӷмың тугумӣлык налъюнӣӷутаңаның уңувалӷӣм Кияӷныӷым. Яқулгым акилӷӯгӣ стамат яқулгыт Кияӷныӷым тӯныхкӣ аҳтуӷьяҳқа̄нӷилъыӷмың на̄фқысқылъюку нуна, кылъӣлъю. 3Яқулгым пӣ: «На̄фқыхпына̄н нуна налиӷмың кылъӣ налиӷмың уқфигыт! Утақӣтык кынляңа печатылъымнъун қаўӣтхун қыпҳаҳтыңи Кияӷнымта». 4Та̄хкын нагақуӷанка қафснгутаңи югыт печаталяҳтуқӣт қаўӣтхун. Югыт угляҳталяңит 144,000ңуфтут тамаҳӣтның рамкыңаның Израилым.
5Иудам рамкыни 12,000ңуфтут,
Рувимым рамкыни 12,000ңуфтут,
Гадым рамкыни 12,000ңуфтут,
6Асирым рамкыни 12,000ңуфтут,
Неффалимым рамкыни 12,000ңуфтут,
Манассиям рамкыни 12,000ңуфтут,
7Симеоным рамкыни, 12,000ңуфтут,
Левийем рамкыни, 12,000ңуфтут,
Иссахарым рамкыни, 12,000ңуфтут,
8Завулоным рамкыни, 12,000ңуфтут,
Иосифым рамкыни, 12,000ңуфтут,
Вениаминым рамкыни, 12,000ңуфтут.
Юлгуӷутыҳлъягыт Манигуқаңат Кияӷнық
9Та̄м киңуңаның ысҳаӷанка угляпыста̄ҳлъягыт юлӷутыҳлъягыт китум алңунак кыстыпагниңилъкаңи! Тамаҳӣтның пиңуфтут нуната̄ның, рамкының, югның, улюныңлъю. Ныкывӷатңуфтут умӣлгусим ақумутам, Пынъӣӷаҳа̄млъю сивухкынкун. Қӣпаӷа̄лъютың қатылӷӣның, тугумӣӷлютыңлъю пальмам уқфиган авайӣтның. 10Акилӷӯтыҳлъяхтут:
«Югулилъық Кияӷнымта пика̄ умӣлгусигни ақумутагни ақумгалӷӣ, Пынъӣӷаҳа̄млъю!»
11Қамахлъютың яқулгыт ныкывӯтут увитаңитни умӣлгусим ақумутам, утфатлъю, стаматлъю уңувалӷӣт. Та̄хкын сыкықӯтут нунамун сивуңакун умӣлгусим ақумутам, манигуӷа̄т Кияӷнық. 12Пӣт:
«Аминь! Кияӷныҳпут тамаҳаӷми усюқлъигу,
ниӷуҳқылъигу, игамсиқаюгвиклъигу,
қӯлваӷлигу қаюҳлъяк лъңаңӯқ пыҳқинылъылык,
аҳтуӷьяҳқа̄нӷилъылык, икнақылъылыклъю.
Лъңа таўатытуқ қӯнпырухлъяк кынлыңуна̄н!
Аминь!»
13Та̄хкын ата̄сим утфитның а̄пта̄ңа: «Кинкуңа̄ўат қатылӷӣмың қӣпаӷаӷңалӷӣт, накынлъю пиңўа̄т?»
14Кӣмсиӷақа: «Югунӣқ, лъпык лӣсимакатын». Утфам пӣңа: «Та̄куңӯт сюфлъюӷуткат сыӷлылӣӷрукута̄ҳлъягмың. Пынъӣӷаҳа̄м а̄ўакун аӷвиглюки қӣпаӷатың, қатыҳтыстыкақӣт.
15Тама̄кын апалъюқлъюку ныкывӷатңӯт сивухкыни Кияӷныӷым умӣлгусӣн ақумутахкыни.
Манигуӷақа̄т аӷныҳтӯма̄н унухтӯма̄н Храмыңани.
Ақумгалӷӣм умӣлгусигни ақумутагни азигутиҳлъықӣ наю̄тңалъыӷминың.
16Игатиқнаниҳлъықут,
налиӷмың мықсюгьюгнаниҳлъықут.
Сиқинӷым налиӷмың алңунак угуқнаҳлъялӷӣм угунъа̄нӷитӣ.
17Пынъӣӷаҳақ умӣлгусим ақумутам ся̄ӷўанилңуқ пынъӣӷнӣҳтыкылъықа̄т.
Маӷьяҳқуҳлъықӣ сыңъулӷӣнун мыӷнун уңувалъылитикаюгнун, Кияӷныӷымлъю қуниңиҳтуҳлъықӣ».
Currently Selected:
Откровение 7: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
