К Галатам 6

Каюсӣтулъюси

1Ухпықа̄лгутымни, кина сыӷлыҳқылъҳым ка̄тфалъюхтыкагу, лъпыси кияҳлъыҳӣни Таӷныӷагныкун, пинитуңўа̄қ якуқлъюку каюсӣтыху малигунъықихтысқылъюку Атаныӷмун. Лъпысилъю, кылыңаңўа̄ӷлюси лю̄рақ нанӷӣқулъыңнаюкафси. 2Каюткутулъюси сыӷлылӣлъыҳпысини; таўатын қа̄ткылъықаҳси Лӣлиҳтӯсяқ Христосым қылӷутка̄. 3Кина сюмыҳтаӷақуми сяңунилюни, сяңунӷитыӷңа̄ӷми, лъңаның пӯҳтыңъӯқ. 4Йықай тамаҳаӷми югым ювӷӣӷўа̄ӷлигу кияҳта̄лъыни. Ынка̄м пиниқан қуякнакаңа лъми катам апыӷӣқани успутақылъңуна̄н китум апыӷӣқа̄нун. 5Тамаҳаӷми югым иглыӷусяҳқақӣ лъми пияҳқани.

6Кина алңунак апыҳтуқақ Кияӷныӷым апыҳтӯся̄мның, пинилӷӣмың тӯнили апыҳтуӷистыминун.

7Сюмыҳтаӷақувык пӯҳлъықнилюку Кияӷнық лъпынун пӯҳтыңъӯтын. Югым сяңўа̄ пӣтысӣӷақани унатаӷьяҳқақа̄. 8Пӣтысиӷақувык ыфқуҳналюку сыӷлыҳқыңъалӷӣ пиюкылъҳын, та̄хкын унатаҳлъықан туқулъық. Иўырңа пӣтысиӷақувык ыфқуҳналюкык Таӷныӷак, та̄хкын Таӷныӷагның унатаҳлъықан кынлыңилңуқ уңувалъық. 9Ынка̄м қинуягутыхпына̄н пинитун пилъық пилътыху, қаюҳлъяк ӣлъқаюнӷилъкумта пилъыҳқақ ка̄скан акилыҳтӯсяңылъықукут. 10Ынка̄м пилъыҳқалгунымта ӣўлың пинитун пӣқылътыки қамахтыңъўа̄ӷлюки югыт, кияң тама̄кут аңлыгутылӣткапут Христосыкун.

Павелым Киңулиқ Кылыңася̄лъҳа

11Ысҳақаҳтыкиқун я̄хтуҳлъягыт игалъҳынка букват!

12Югыт ысҳаҳсяқсюныҳтуқатлъю қанаткиюныҳтуқатлъю пинитун қыпҳалъыӷмыхның, лъңиңӯт обрезаниясқӯӷўа̄ӷилӷӣт лъпысиның. Таўатын пӣқут қаюҳлъяк алиңақылӷӣт амьюқыта̄ткылъыңнаюкамың уңипақыхкумыхтыху қақӯраҳӣна̄ Христосым, авылӷаӷлюку обрезаниялъық. 13Қайўа обрезанияка̄яӷңа̄ӷмың, лъңит катам қа̄ткусигатут Лӣлиҳтӯсянун. Обрезаниясқысюгақӣси қанаткыпигыснаӷналюси лъмыхнун обрезаниястыкақнилюси. 14Иўырңа хўаңа қанана̄нӷитуңа сямың алңунак иўырңақун қақӯра̄ның Атанымта Иисус Христосым. Туқулъҳакун қақӯрами нуна қақӯра̄ма̄қ хўаңамнун, ынка̄м хўаңа қақӯра̄ма̄ңа нунамун. 15Мыгнунанӷитуқ ю̄к обрезанияка̄куми, налиӷмың обрезаниялъҳилъкуми. Уна мыгнуналӷӣңӯқ: Кияӷныӷым улимакақӣлъю нутаӷа̄люта югни. 16Тамаҳӣтнун қа̄ткулъҳӣнун апыҳтӯсямнун, йықай Кияӷныӷым ныкыхмылъҳалъю, наңлъыхталъҳалъю лъңитнилъи, Израилыңанилъю Кияӷныӷым.

17Хўакын кынлыклъюку китум алңунак алъя сыӷлылӣҳтыстыфқа̄ма пилиңа қаюҳлъяк югусимнилңӯт ма̄мылъҳыт кылгутңўа̄т қыпгаҳтыля̄ӷулъқа Иисусымун.

18Ухпықа̄лгутымни, йықай пиниқиңалӷӣ каюсилъҳа Атанымта Иисус Христосым тамаҳаҳпысинилъи. Аминь.

Currently Selected:

К Галатам 6: ess2

Highlight

Compare

Copy