К Галатам 5

Итымңалъық Христосыкун

1Христосым хўаңкута итымуткақутаңаның, итымыпӣгума̄кут. Ынка̄ңам ныкывӷатык аӷулӣлъка̄люси, қыпҳаҳтыля̄ӷуҳнықихтыхпынаси Лӣлиҳтӯсянун.

2Нагатык! Хўаңа, Павел, уңипа̄тамси: обрезаниястыкуфси Лӣлиҳтӯсям писқылъҳатун, та̄ўа Христосым апыӷӣқа̄ каюткынъа̄нӷитаҳси. 3Алъя кылыңася̄ӷақа тамаҳа̄н ю̄к, обрезаниястыкуми та̄ўа қа̄ткыңъўа̄ӷьяҳқақӣ қамахлъюки Лӣлиҳтӯсят. 4Лӣлиҳтӯсятхун налъҳусяҳтыснақуткыхкуфси Кияӷныӷым ылъқуӷутңалъҳанун, а̄флъықуси лъпысиның Христосымың, унилъықаҳсилъю Кияӷныӷым наңлъыхталъҳа. 5Аглыӷналӷӣгныкун Таӷныӷагныкун утақаңўа̄ҳпут сиӷималъыҳпут апыӷӣӷысқылъюку. Сиӷималъыҳпут та̄наңӯқ: Кияӷныӷмун налъҳусӣсқылъюта ылъқуӷутңалъҳанун ухпықылъымтыхун Христосыкун. 6Христос Иисусым пикңукаңисилъю, ю̄к мыгнунанӷитуқ обрезанияка̄куми налиӷмың обрезаниялъҳилъкуми. Уна ысҳа мыгнуналӷӣ, ухпықилъық Христосыкун пиниқистилӷӣ юлгутымнъың.

7Сивунӷани пинитуңўа̄қ пиңуяҳтуси. Китум қа̄ткунъаниҳтыстиси ипапиҳқылъыӷмун? 8Кияӷныӷым туқлъюӷистыхпыси пилъқынӷита̄. 9Нықамиклъюку: «Закваскаңӣҳа̄м ҳӯҳтыстыҳлъягақа̄ акӯтақ». 10Лъпысилъю, хўаңалъю пикутаңаның Атанӷым, налъюнықсюкынӷитанка ухпықнанифқӣта апыҳтӯсянка лъпысинун писқылъюки. Лӣсимакақалъю Кияӷныӷым аӷью̄ҳлъықа̄ сыӷлылӣҳқилӷӣ лъпысиның, кинаңуяӷңа̄н.

11Ухпықа̄лгутымни, уңипақиңигатуңа югыт обрезаниясқылъюки. Таўатын уңипақиңуяқума Иудеит амьюқыта̄ткынъаниӷнаяӷа̄тңа ынка̄м қақӯра̄ Христосым сюгагнӣӷуткынъаянӷита̄т. 12Тама̄кут сыӷлылӣҳқилӷӣт лъпысиның обрезаниялъыӷмың, лъңитңут обрезаниястыңъулютың евнухыңлялъҳӣт лъңитның.

13Ухпықа̄лгутымни, Кияӷныӷым тахсиқақӣси итымңалъыӷмун Христосыкун. Та̄ўаңинақ атуқыхпына̄н итымңалъыҳси атуӷьяҳқа̄люки сыӷлыҳқыңъалӷӣт пиюкылъҳи югусим. Итупилъ қыпҳа̄тыки иляси пиниқылъыҳпысигун. 14Қаюҳлъяк қа̄ткылъықаси қамахлъюки Лӣлиҳтӯсят қа̄ткыхкуфсигу уна Лӣлиҳтӯсяқ: «Пиниқлъюку юлгутын пиниқылъыҳпытун лъпынун катам». 15Иўырңа лъпысиның қаниқунъақңукуфсилъю пилъюгунъақңукуфсилъю угиҳсялӷӣстун тыӷикусястун, кылыңатык, қаюҳлъяк на̄фқутунъақуси.

Кияҳтык Аглыӷналӷӣгныкун Таӷныӷагныкун

16Хўатын пӣмси, кияҳтык қа̄ткылъюкык Аглыӷналӷӣк Таӷныӷак. Таўатын пикуфси атуқна̄нӷитаси сыӷлыҳқыңъалӷӣт пиюкылъҳи югусим. 17Қаюҳлъяк сыӷлыҳқыңъалӷӣт пиюкылъҳи югусим кипулъыгңа̄т Таӷныӷагнун, пиюкылъҳи Таӷныӷам кипулъыгңа̄т пиюкылъҳанун югусим. Та̄кук аңуякутук ынка̄м атуқна̄нӷитаси пиюкылъыси. 18Таӷныӷам маӷьяҳқӯңукаңиси та̄ўа Лӣлиҳтӯсят атуқсяҳқа̄наниӷаси.

19Югусим сыӷлыҳқылъыҳтуқам пиюкылъҳи налъюнӣтут. Укуңӯт: алңунасыӷақ, сыӷлытун атуқутылъық, нуқысигалңӯт алңунак атуқимун, 20манӣгӯтылъық кияӷныңлъяқанун, уйвӣниқылъық, аңуйиқылъық, пилъюгутылъық, қуңьяқилъық, сякшитылъық, лъңина̄юхтылъық, а̄фқымыра̄лъық, қырңуҳпахта̄тылъық, 21ақиналъық, сю̄мылъық, қырңуӷулъютың аҳсяҳпа̄хтақут сыӷлытун пилъыӷмун, иляңаныңлъю сыӷлыҳқылъыӷның. Кылыңася̄ӷнақлъя̄таӷамси сивунӷани пилъымтун, тама̄кут таўатын кияҳлъыҳӣт илятңана̄нӷитут қуяслъыӷаның Кияӷныӷым Атаныҳпагулъҳан.

22Нақамынрақ Аглыӷналӷӣм Таӷныӷам пӣтыстыкӣ укуңӯт: пиниқылъық, қуямалъық, ныкыхмылъық, нуқынъыҳтулъық, наңлъыхталъық, пинилъық, ата̄сӣӷмытылъық, 23якумаңиңитылъық, нуқытылъықлъю. Та̄кут ӣнӷутылъҳитут алңунак лӣлиҳтӯсяни. 24Христос Иисусым пиңита қақӯра̄ткақӣт сыӷлыҳқыңъалӷӣт пиюкылъҳит югусимың. 25Кияҳтыңъукумта Таӷныӷагныкун, қа̄ткылътыкык Таӷныӷак. 26Қука̄югныӷуфқа̄мта, қинуюхтифқа̄мта, ақинакутыфқа̄мта.

Currently Selected:

К Галатам 5: ess2

Highlight

Compare

Copy