К Ефесянам 1

1Укут посланият Павелымың пиңӯт. Христос Иисусым апостолыка̄ңа Кияӷныӷым пиюкылъҳакун.

Письмоңӯңа Кияӷныӷым югитнун Ефесымылңуӷнун, ата̄сӣӷмылңӯт малихся̄ҳтыңи Христос Иисусым.

2Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

Кияӷныӷым Накмикыхкақӣлъю Христосыкун

3Усюқылъыңли Кияӷнық, Атаңа Атанымта Иисус Христосым! Христосыкун Кияӷныӷым қуястыңъўӣлъю тамаҳа̄ның тунусямың қиляхтамың. 4Нуна улималъҳилъюку Кияӷныӷым накмикыхкақӣлъю Христосыкун пылюңитысқылъюталъю, авутңитысқылъюталъю лъңанун. 5Қаюҳлъяк Кияӷныӷым пиниқыхкаңилъю, ныӷиӷлюку алъюҳқинакыхкақӣлъю авақута̄люта Иисус Христосыкун. Таўатын пика̄гуқ қаюҳлъяк пиюкыхкаңа, ыфқуқыхкаңалъю. 6Ынка̄м усюқаҳпут Кияӷнық қаюҳлъяк иӷлыхпынани наңлъыкыҳлъягӣлъю пиниқыхкамикун Иӷныӷмикун.

7Христосым а̄ўакун, Кияӷныӷым итымуткақӣлъю сыӷлыҳқылъымнъың. Сыӷывутӣ сыӷлыҳқылъыпут апалъюқлъюку наңлъыхталъыҳлъяни 8ақыҳқусиқыҳлъякаңа хўаңкунъун. Пыҳқинӷустӣлъю, лӣгикыстӣлъю 9успықылъыӷминың сялин алӣҳсигалъкымъиның сивунӷани. Та̄наңӯқ Кияӷныӷым успықыхка̄, пикақа̄ Христосыкун. 10Кияӷныӷым успықылъыни апыӷӣҳлъықа̄ пилъыҳқаҳлъюгўа̄ӷми. Қамахтыңъўа̄ӷлюки улима̄ни қилягмылңӯтлъю, нунамылңӯтлъю қырңуҳлъықӣ, Христосымун иглыӷутысқылъюки.

11Христосыкун Кияӷныӷым накмикыхкақӣлъю лъңанун югулюта. Аюмирухлъяк пиюкылъыӷмитун ухпықыхкақа̄. Лъңан сяңўа̄ тамаҳа̄н пиюкылъыӷмитун пистақа̄. 12Хўаңкута Иудеяни ухпықани сиӷимакиюхўа̄қа̄гукут Христосыкун. Ынка̄м кияҳта̄лъымтыхун усюқыслъықаҳпут Кияӷнық а̄ңылъыҳлъяганун.

13Христосыкун лъпысилъю нагақуқақаҳси ипапик уңипақ. Пинилӷӣңӯқ Уңипақ уңипа̄тилӷӣ югулилъыҳпысиның. Ухпықақңафсигу Христос, Кияӷныӷым налъюнӣқақӣси Аглыӷналӷӣгның Таӷныӷагның, акықусяқыхкаминың тӯнылъықнилюкык. 14Аглыӷналӷӣм Таӷныӷам ипапиҳқыстӣлъю пагитаҳқамнъың кынляңа хўаңкута пилӣтылъыҳқамнун. Ынка̄м усюқылъықаҳпут Кияӷнық а̄ңылъыҳлъяганун!

Павелым Юӷӣ

15Нагақӯма̄қа ухпықилъыҳси Атаныҳқун Иисусыкун, пиниқылъыҳсилъю тамаҳӣтнун Кияӷныӷым югитнун. Тама̄кын апалъюқлъюку, 16нықамикақамси юӷанымни, игамсиқаягунъыӷмың та̄қигатамси Кияӷныӷмун. 17Атаҳлъяка̄ Атанымта Иисус Христосым. Лъңанун туңсӣтақамси пыҳқинӷусқылъюси Таӷныӷахкынкун, лӣгикатаӷӣсқылъюси Кияӷныӷмың. 18Юӷа̄ткақа ниӷук кӯкхутысқылъюку илюхпысинун, лӣгикысқылъюку сиӷималъық Кияӷныӷым лъпысинун пикыстыка̄ қаюҳлъяк накмикыхкақӣси. Юӷа̄ткамсилъю лӣгикысқылъюки кымнаҳлъягыт қуястылъыҳлъягыт Кияӷныӷым акықусяқыхкӣ югминун. 19-20Юӷаҳтуңалъю лӣгикысқылъюку сыӷлыҳлъягӯқ Кияӷныӷым аҳтуӷьяҳқа̄нӷилъыҳлъяга қыпҳалӷӣ хўаңкунъи ухпықилӷӣни. Та̄на аҳтуӷьяҳқа̄нӷитылъыҳлъяк ата̄сӣгуқ Кияӷныӷым уңуваҳтисиқыхка̄ Христосымун туқулъыӷмың. Та̄хкын қилягми Кияӷныӷым ақумысима̄ аӷынқигныӷмикун. 21Кияӷныӷым қулиҳпига̄ҳтыстыкақа̄ Христос тамаҳӣтның иглыӷутистының, қылӷикаюгның, аҳтуӷьяҳқа̄нӷилъылыгның, умӣлыгныңлъю. А̄тҳа иңья̄тңаҳлъяхтуқ атыӷьяхаӷның нунами хўани, нунаӷраӷаҳқамилъю. 22Кияӷныӷым лъикақа̄ сяңўа̄ қамахтыңъўа̄ӷлюку Христосым итыга̄н асиңанун, на̄сқӯтистыңлъяқақа̄лъю сямун тамаҳа̄нун апалъюқлъюки ухпықат. 23Қамахлъютың ухпықат югусиқӣ Христосым, ынка̄м лъңа ӣӷўиҳтуқ. Христосым ӣӷўиҳта̄ сяңўа̄ қамахлъюку нани алңунак.

Currently Selected:

К Ефесянам 1: ess2

Highlight

Compare

Copy