К Галатам 4

1Нагныӷутаҳлъякун хўатын, иӷнық пилӣтияҳқақ атами сяӷьяңаның қыпҳаҳтыля̄ӷыстун кияӷуткаюгӯқ мыкыста̄ҳа̄люни, қайўа лъңан пиксяӷңа̄гу сяңўа̄ тамаҳа̄н атами пӣңа. 2Мыкыста̄ҳа̄люку югыт афлъыңакыхкақа̄т, сяңўа̄тлъю тама̄кут лъңан пикаҳқӣ кынляңа атаңан пияҳқа̄ҳнилъҳанун. 3Хўаңкуталъю таўатысяҳтукут. Таӷнуҳа̄люта қыпҳаҳтыля̄ӷуяҳтукут нунам иглыӷутистыңитнун туӷныӷаӷнун. 4Иўырңа Кияӷныӷым накмикыхка̄ аӷнық ка̄сян каяхтыка̄ Иӷныни, алъхықақ аӷнакун. Лъңан қа̄ткыхкақӣ Лӣлиҳтӯсят 5итымунъалюта Лӣлиҳтӯсяның, авақуталӣтысқылъюталъю Кияӷныӷмун. 6Лъпыси авақутақутминың Кияӷныӷым, Иӷныӷми Таӷныӷакык каяхтыкақа̄к илюмнъун, қывулъютык пикак: «Авва, Ата!» 7Ынка̄м Кияӷныҳқун қыпҳаҳтыля̄ӷунаниҳтутын, авақутақа̄тын. Авақутақа̄ҳтутминың лъми пини лъпынун пилӣтыслъықӣ.

Павелым Сюмыӷьялиткыхкаңи Галатияӷмӣт

8Сивунӷани налъюксяӷаҳси Кияӷнық, ынка̄м қыпҳаҳтыля̄ӷуяҳтуси кияӷныӷунӷилңуӷнун. 9Иўырңа ма̄тын лӣсимакаҳси Кияӷнық, налиӷмың ипапыста̄қ Кияӷныӷӯқ лӣсимакистызи. Сяңафсиңам утыҳсюгыстык кая̄лңуӷнун сясӣнӷилңуӷнун иглыӷутилӷӣнун туӷныӷаӷнун? Сяңан тама̄кунун қыпҳаҳтыля̄ӷуҳнықихсюгыстык? 10Паниның қа̄ткақаси апыҳтуӷалъҳит аӷныӷнун, танқинун, аюмиқулъыӷнун аӷныӷнунлъю сялъқумсивикақыхкаңитнун. 11Алиңуткақамси, қамахлъюни қыпҳа̄тилъқа лъпысинун сясӣнӷинъаюкан.

12-13Ухпықа̄лгутымни, туңсиӷвикамси, хўаңамтун лъӣӷысқылъюси қаюҳлъяк хўаңалъю лъпысистун лъӣқа̄гуңа язычнигыстун.

Сивунӷани уңипақитақңамси Пинилӷӣның Уңипаның сыӷлытун пимаңитаҳпысиңа. Нықамикаҳси таўани такукақамси қаюҳлъяк қинуюгулӷӣңа. 14Қайўа қинуюлъыӷма сыӷлылӣҳтысяӷңа̄ӷмиси укаваҳсимаңитаҳпысиңа налиӷмың иҳсякумаңитаҳпысиңа. Йыӷлыги, упуӷатаҳпысиңа никимқун Кияӷныӷым яқулгатун, налиӷмың Христос Иисусытун. 15На̄гу қуяңалъыҳси? Лӣсимакамси пияқлъыгуяқата ийыси нусюглюки тагиваӷнаяӷаси. 16Ынка̄м аңуйӣӷыстыңъа̄ қаюҳлъяк уңипа̄скымси ипапигмың?

17Тама̄кут югыт қа̄ткутысюкаңиси Иудеит Лӣлиҳтӯсӣтнун, пиюкыпихтӣси лъмыхнун малиҳқутақысқылъюси, иўырңа апалъя̄т пининӷитуқ. Лъңита а̄фтысюгӣси хўаңамның, лъңинаӷмың малихтысқылъютың. 18Пиниҳтуқ югыт сю̄мқыхкумыхтыки юлгутытың, та̄ўаңинаҳақ апалъӣт пиниқата. Қӯнпың та̄на ипаңӯқ, авӣсяӷңа̄ӷма. 19Таӷнуҳаҳамни, катам аӷнам ақниҳқылъҳатун иӷниюлъыӷмини хўаңалъю таўатын ақниҳқуткынъықихтыңъўа̄мси кынляңа Христосытун лъӣлъыҳқаҳпысинун. 20Хўа̄туқ ма̄тын лъпысинилъҳиңа ынка̄м лӣсимакнаялӷӣңа натын алыҳқуӷьяҳқа̄люси. Сюмыӷьялиткыҳлъяўа̄мси.

Успутаҳқак Агарылъю, Сарралъю

21Лъпыси атуқиюлӷӣни Иудеит Лӣлиҳтӯсӣтның, талўа лӣгикигатаси Лӣлиҳтӯсят сямың писӣтаңи. 22Игақңа̄қ Акузитни Игақыхкани Авраамыңуқ ма̄лӷугыгның иӷнылгӯқ, а̄лъҳа қыпҳаҳтыля̄ҳқун аӷнакун, иляңа қыпҳатыля̄ӷунӷилңуҳқун аӷнакун. 23Иӷныӷа қыпҳаҳтыля̄ҳқун алъхықа̄гуқ югыстун китутун алңунак. Иўырңа иляңа иӷныӷан қыпҳаҳтыля̄ӷунӷилңуҳқун алъхықа̄гуқ қаюҳлъяк Кияӷныӷым акықусяқыхкаңа. 24Та̄кук аӷнак успута̄гук ма̄лӷугыгнун акықусяхкынун Кияӷныӷым. Қыпҳаҳтыля̄қ Агарь акықуся̄тун Кияӷныӷым аюқуқ Синайым найӷаҳани ынка̄м алъхықа̄гут қыпҳаҳтыля̄ҳқа̄лютың. 25Агарь Синайым найӷаҳақңулюни аюқуқ, Аравиямылңуқ. Аӷныӷмимлъю Иерусалимыңатун аюқуқ, қаюҳлъяк авақутақулъҳӣт қыпҳаҳтыля̄ӷӯт Лӣлиҳтӯсянун. 26Иўырңа па̄мна Иерусалим қыпҳаҳтыля̄ӷитуқ, лъңа на̄каҳпут. 27Акузитыт Игақыхкат пика̄гут:

«Қуяҳлъяги, лъпык қумиңигалңӯтын,

ақниҳқигалңӯтын иӷниюлъыӷмың.

Угихпык унитыӷңа̄тын,

ара̄ қуяҳлъягым аңталяңаның қаюҳлъяк таӷнуҳаҳта̄ӷасяҳқа̄гутын аӷнамың угилыгмың».

28Ухпықа̄лгутымни, Исаакытун аюқуси қаюҳлъяк авақутақӣси Кияӷныӷым апалъюқлъюку акықусяни Авраамымун. 29Тама̄ни аӷныӷни та̄на иӷнық алъхықақ югыстун китутун алңунак амьюқыта̄ткыхкақа̄ иӷнық алъхықақ Таӷныӷам пилъҳакун. Паниның ма̄тын таўатытуқ. 30Иўырңа Акузитыт Игақыхкат сямың пӣтху? «Қыпҳаҳтыля̄қ аӷнақ, иӷныӷалъю аӷуляқыстыкык. Қаюҳлъяк қыпҳаҳтыля̄ӷым аӷнам иӷныӷа ныңиӷна̄нӷитуқ атами сяӷьяңаның малигулъюни иӷныӷанун қыпҳаҳтыля̄ӷунӷилңӯм аӷнам». 31Ухпықа̄лгутымни, хўаңкута авақутақынӷитӣнкут қыпҳаҳтыля̄ӷым аӷнам, иўырңа авақутақӣнкут қыпҳаҳтыля̄ӷунӷилңӯм аӷнам.

Currently Selected:

К Галатам 4: ess2

Highlight

Compare

Copy