К Галатам 3

Апалъӣ Лӣлиҳтӯсят

1Налъюҳаӷмың лъпыси Галатияӷмӣни! Китум пӯҳтиси? Пуйгустыхӯ а̄пҳўа̄қақсяқыхка Иисус Христосым туқулъҳа қақӯракун? 2А̄птаҳлъямси: натын алъхыҳтыкақыстыкык Аглыӷналӷӣк Таӷныӷак, қа̄ткутылъыҳпысигун Лӣлиҳтӯсянун налиӷмың ухпықылъыҳпысигун нагаткаҳпысигун? 3Налъю̄пигыстык? Аглыӷналӷӣгныкун Таӷныӷагныкун пӣнлиӷлюку нутаӷақ уңувалъыҳси, апыӷӣӷнақыстыхӯу лъпысиның катам? 4Икфиқылъыҳси тымңиңуфта̄? Ухпықыпыста̄ӷақа тымңиңунӷитуқ. 5Кияӷныӷым тӯныхкақисӣи Таӷныӷагминың, алъя̄ҳлъюхўаҳтика̄ўалъю̄ акулыхпысини қаюҳлъяк қа̄ткыхкыси Лӣлиҳтӯсят, налиӷмың ухпықыхкыси нагақуқаҳси?

6Акузитыт Игақыхкат а̄пқақа̄т Авраамым ухпықыхкақа̄ Кияӷнық, ынка̄м Кияӷныӷым налъҳусяқақа̄ ылъқуӷутңалъыӷминун. 7Ынка̄м лъпыси лӣсимакылъықаси тама̄кут ухпықилъылгыт Кияӷныҳқун Авраамым киңуныҳпигақӣ. 8Акузитыт Игақыхкат а̄пқыстақақа̄т Кияӷныӷмун налъҳусяӷнақнилюки язычнигыт ылъқуӷутңалъыӷминун ухпықилъҳитхун. Ныӷиӷлюку Кияӷныӷым а̄пқақа̄ та̄на Пинилӷӣ Уңипақ Авраамымун, хўатын пӣқңами: «Қамахтыңъўа̄ӷлютың нунам рамкыңи қуястылъыңнақңӯт лъпыгун». 9Авраамым ухпықыхкақа̄ ынка̄м қуястылъыңыхкақ. Таўатыҳпигақ тамаҳаӷми ухпықилӷӣ қуястылъыңьяҳқа̄гуқ лъңатун.

10Иўырңа Кияӷныӷым аӷью̄ӷьяҳқақӣ тама̄кут сиӷималӷӣт қа̄ткутылъыӷмыхтыхун Лӣлиҳтӯсянун налъҳусяҳлъықнилютың ылъқуӷутңалъҳанун. Қаюҳлъяк игақңа̄қ Акузитни Игақыхкани хўатын: «Китум алңунак қа̄ткынӷилъкаки тамаҳӣта игақңалӷӣт игӣтхун Лӣлиҳтӯсят нанқихтылъыңылъықуқ аӷью̄ӷьяҳқа̄люни». 11Хўатыҳлъюўа̄қ лӣгикнаҳтуқ, кина алңунак налъҳусяӷьяҳқа̄нӷитуқ Кияӷныӷым ылъқуӷутңалъҳанун қа̄ткутылъыӷмикун Лӣлиҳтӯсянун. Қаюҳлъяк Акузитыт Игақыхкат пика̄гут: «Та̄на Кияӷныӷым налъҳусяқа̄ ылъқуӷутңалъыӷминун кияҳлъықуқ ухпылъыӷмикун». 12Иўырңа қа̄ткулъҳӣ Лӣлиҳтӯсянун сиӷимаңунӷитуқ ухпылъыҳқун, қаюҳлъяк Акузитыт Игақыхкат пика̄гут: «Сиӷималӷӣ Лӣлиҳтӯсятхун кияҳлъықуқ қа̄ткылъюки».

13Ынка̄м Кияӷныӷым нанқихтыкақӣлъю аӷью̄ӷналюта апалъюқлъюки Лӣлиҳтӯсят, иўырңа Христосым навыҳқылъикақӣлъю нанқихлъыҳқамнъың тугулъыӷмикун аӷью̄лъыҳқаҳпут. Қаюҳлъяк Акузитыт Игақыхкат пика̄гут: «Нанқихтыка̄гуқ аӷью̄ӷьяҳқа̄люни тамаҳаӷми агаҳтыкақ уқфихкун». 14Христос Иисусым навыҳқылъикақӣлъю ынка̄м лъңакун Кияӷныӷым қуястыкақӣ язычнигыт та̄хкын ата̄симың қуястылъыӷмың акықусяқыхкаминун Авраамымун. Ынка̄м ухпылъыҳқун алъхыҳтахпут Таӷныӷак Кияӷныӷым акықусяқыхкакык.

Лӣлиҳтӯсятлъю, Акықусяқлъю

15Ухпықа̄лгутымни, уңипа̄таҳлъямси успутаҳқамың аҳутаңа тамаҳа̄н пӣқылӷӣның: югык акықускумык сямың, игақлъюку игакун, атытыңлъю игақлъюкык, китум алңунак аӷулӣҳсяҳқақынӷита̄ акықутутылъҳак налиӷмың иляяҳқақынӷита̄. 16Кияӷнық акықусяңлъяҳтықа̄гуқ Авраамымунлъю, киңунӷанунлъю. Кияӷныӷым акықусяңлъя̄маңитӣ: «Киңунӷи», Акықусяңлъяҳтықа̄гуқ ата̄сӣнаӷмун киңуныӷмун, та̄на Христосыңӯқ. 17Та̄на лӣгикысюгақсяӷақа: Кияӷнық акықусяңлъяқа̄гуқ Авраамымун ынка̄м акықусяни пинақникақа̄. 430 аюмиқулъҳыт киңуңитның акықилъыӷми, Кияӷныӷым тӯныхкӣ Лӣлиҳтӯсят. Та̄кут Лӣлиҳтӯсят та̄на акықусяқ сятңунаниҳқынъа̄нӷита̄ налиӷмың на̄фқынъа̄нӷита̄. 18Лӣлиҳтӯсятхун алъхыҳнақңукумтыху Кияӷныӷым тунуся̄, та̄ўа акықуся̄кун алъхыҳна̄нӷитаҳпут. Иўырңа акықилъыӷмикун Кияӷныӷым тунусяни тӯныхкақа̄ Авраамымун.

19Сяңамың Лӣлиҳтӯсят тӯныхка̄ўат? Тӯныхка̄гут югнун лӣгикысқылъюки анахутылъҳит сыӷлыҳқылъҳунилюки. Та̄кут Лӣлиҳтӯсят таўатытка̄гут кынляңа киңунық тагилъҳанун. Лъңаңӯқ Кияӷныӷым акықусяңлъяқа̄. Та̄кут Лӣлиҳтӯсят Кияӷныӷым яқулыхтыхун тӯныхкақӣ Моисейемун. Та̄хкын Моисейем уйгукутистым тӯныхкақӣ югнун. 20Иўырңа уйгукутистысюӷнӣтуқ ата̄сиқ акықикуми. Кияӷнық ата̄сиҳа̄тминың уйгукутистысюӷнӣтуқ.

Апалъӣ Лӣлиҳтӯсят

21Лӣлиҳтӯся̄т тыңвимун аюқаткӣ Кияӷныӷым акықусӣ? Нака̄, йыӷлыгилъю! Лӣлиҳтӯсям уңувалъыңысяҳқақсяқумикут, та̄ўа Кияӷныӷым налъҳусяӷнаяӷӣлъю ылъқуӷутңалъыӷминун та̄хун Лӣлиҳтӯсякун. 22Иўырңа Акузитыт Игақыхкат пика̄гут қамахлъюки нунам юги сыӷлыҳқылъҳым анусимиңлъяӷақӣ. Ынка̄ңам Кияӷныӷым акықусяқыхкани тӯнылъықа̄ ухпықикаҳӣнаӷнун Иисус Христосымың.

23Сялин ухпылъҳилъюку анусимиңлъяӷа̄яҳтукут Лӣлиҳтӯсянун. Лӣлиҳтӯсят а̄ҳқутақңуяӷӣлъю кынляңа Кияӷныӷым хўаңкунъун лӣтыстылъҳанун ухпылъық. 24Лӣлиҳтӯсят апақутистыксяӷапут кынляңа Христосым тагилъҳанун. Ынка̄м ма̄тын ухпықилъымтыхун Христосыкун, Кияӷныӷым налъҳусяӷьяҳқа̄ҳтӣлъю ылъқуӷутңалъыӷминун. 25Ухпылъық тагитаңаның Христосыкун Лӣлиҳтӯсят апақутистыкнаниӷапут.

26Ухпықилъыҳпысигун Христос Иисусыкун, қамахлъюси Кияӷныӷым авақутақӣси. 27Крестиӷақңафси Христосымун, а̄лъҳӣстун Христос пикақаҳси таўатын пиюлюгугақылъыҳпысистун. 28Алъяңуӷутңитут Иудеитлъю, язычнигытлъю; алъяңуӷутңитут қыпҳаҳтыля̄ӷытлъю, қыпҳаҳтыля̄ӷунӷилңӯтлъю; алъяңуӷутңитут югытлъю, аӷнатлъю, қаюҳлъяк қамахлъюси атуным аюқуси Христос Иисусыкун. 29Христосым пикңукаңиси та̄ўа Авраамым киңунқӣси. Ынка̄м лъпысилъю пилӣлъықаҳси Кияӷныӷым акықуся̄ Авраамымун.

Currently Selected:

К Галатам 3: ess2

Highlight

Compare

Copy