К Галатам 2

Апостолыт Тугуклъиқаңат Павел

1Қуля стамат сӣпнықлъюку аюмиқулъық атуӷлюку утыӷниҳтуңа Иерусалимымун; Варнавам малихта̄ңа Титлъю кылъқақа. 2Кияӷныӷым лӣгикыста̄ңа Иерусалимытысқылъюңа. Ка̄сямта ухпықат иглыӷутистыңинӣт қырңуӷутаҳтысқанка. Таўани уңипамсюгутанка натын язычнигнун уңипақилъымның Пинилӷӣның Уңипаның. Таўатын пика̄гуңа лю̄рақ та̄кут иглыӷутистыт апыҳтуӷилъҳынка тымңиңунинаюкатки сивунӷанилъю, ма̄тынлъю. 3Лӣгиканка апыҳтуӷилъҳынка тугуклъиӷӣт қаюҳлъяк малихтистыка Тит, Грегыңуӷңа̄н, обрезаниясқынӷилъкаңат. 4Иўырңа иляңи ухпықасиӷўа̄ӷыт аксяқлъюку илятут хўаңкунъун рӣрңиналюку итымңалъыҳпут Христос Иисусыкун. Қыпҳаҳтыля̄ӷуҳнықихтысқылъюта пӣлъю Лӣлиҳтӯся̄мнъун. 5Лъңитнун малиҳқутақылъҳитукут талўа натыңӣҳақ алмысиқысқылъюки ипаңулъҳит Пинилӷӣт Уңипат апыҳтӯсяқылъымтыстун лъпысинун.

6Та̄кут ухпықат иглыӷутистыңита алъяңуҳсимаңитӣт Пинилӷӣт Уңипат уңипақақыхкынка. (Иглыӷутистыңуяӷңа̄та, хўаңамни алъяңуӷутңитут қаюҳлъяк Кияӷнық танӣлъҳитуқ.) 7Иглыӷутистыт лӣгикума̄т Кияӷныӷмун ныӷьюкусиманилюки хўаңамнун Пинилӷӣт Уңипат уңипақысқылъюки язычнигнун, катам таўатын ныӷьюкутылъҳатун Петырымун Пинилӷӣт Уңипат уңипақысқылъюки Иудеянун. 8Катам Кияӷнық қыпҳақа̄гуқ Петыркун апостолыкынъалюку Иудеянун, хўаңамкунлъю қыпҳақа̄гуқ апостолыкынъалюңа язычнигнун. 9Ынка̄м та̄кут иглыӷутистыт Иаковым, Петырым, Иоанным ныкывӷатилӷӣт ухпықанун, лӣгика̄т Кияӷныӷмун тунусялисиманилюңа таўатын қыпҳӣсқылъюңа язычнигнун. Тама̄кын апалъюқлъюку Варнавалъю ӣхыпут аӷулятӣт тугуклъиӷнилюку қыпҳа̄ңулъыҳпут язычнигнун, лъңит Иудеянун. 10Та̄наңинақ пуйгуснаниӷа̄т каюсӣтысқылъюки аклъюмалӷӣт, та̄ната нагныӷусюпихтыкыхка.

Павелым Аӷью̄ӷмикаңа Петр Антиохиями

11Тахталми та̄кўани Петр Антиохиямылъюни сямың анахуткақ. Ынка̄м сивуңитни ухпықат аӷью̄ӷмигақа анахутылъҳаның апалъюқлъюку. 12Петр ныӷылгусиӷикаюгуялӷӣ язычнигыт ухпықа̄тның кынляңа Иаковым югыт Антиохиятыстылъҳитнун. Иўырңа ка̄сята ныӷылгусиӷнаниӷӣ язычнигыт, а̄фтыкақлъю лъңитның. Таўатын пика̄лӷӣ қаюҳлъяк алиңылӷӣ та̄кут югыт сягиқутңукаңит язычнигыт ухпықа̄т обрезанияҳқа̄нилюки. 13Та̄хкын қамахлъютың Антиохияӷмӣт Иудеит ухпықа̄т малигуткат Петырым анахутылъҳанун, талўа Варнавалъю илялъюни. 14Лӣгиксямки қа̄ткунъыӷитылъҳит апыҳтӯсӣтнун Пинилӷӣт Уңипат, сивуңитни югыт Петр пӣқа: «Лъпык қайўа Иудейеңуӷңа̄ҳпык кияҳтыңңӯтын язычнигыстун, нака̄н Иудеястун. Сяңитаңам язычнигыт Иудеястун кияҳтыснақуткысики?»

Иудеитлъю, Язычнигытлъю Ухпықилъыҳқун Югулилъыңылъҳат

15Иудеяңулюта алъхықа̄гукут, нака̄н язычнигыт сыӷлыҳқыстыт. 16Нақамлъю лӣсимакаҳпут Кияӷныӷым ылъқуӷутңалъыӷминун налъҳусяӷна̄нӷита̄ ю̄к қа̄ткутылъҳакун Лӣлиҳтӯсянун, таўатыңинақ налъҳусяҳлъықа̄ ухпықилъҳакун Иисус Христосымың. Талўа хўаңкута Иудеяни ухпықыхкақаҳпут Христос Иисус, Кияӷныӷым ылъқуӷутңалъҳанун налъҳусӣсқылъюта ухпықылъымтыхун Христос, нака̄н қа̄ткутылъымтыхун Лӣлиҳтӯсянун. Кина алңунак қа̄ткутылъҳакун Лӣлиҳтӯсянун Кияӷныӷым ылъқуӷутңалъыӷминун налъҳусяӷьяҳқақынӷита̄. 17Иудеяни хўаңкута налъҳусяҳтысюгукумта Христосыкун, нака̄н Лӣлиҳтӯсятхун, иляңита Иудеит сыӷлыҳқыстыңунилъықӣнкут язычнигыстун. Ынка̄м Христосыңуфта̄ сыӷлыҳқыстыңуҳтыстилӷӣ? Йыӷлыгилъю! 18Лӣлиҳтӯсят пыхтыкақанка, атуқынқихсягускумки та̄ўа Лӣлиҳтӯсянун анахулъықуңа. 19Лӣлиҳтӯсятхун туқука̄гуңа Лӣлиҳтӯсянун кияҳсяҳқа̄люңа Кияӷныӷмун. 20Қақӯра̄тка̄гуңа Христосымун малигулъюңа, ынка̄м хўаңаңунанӣма̄қ кияҳлъыҳӣ; Христосыңуҳсима̄қ кияҳлъыҳӣ илюмни. Кияҳтыңуӷңа̄ӷма югусимни, Кияҳтыңӯт ухпықилъымкун Иӷныӷаның Кияӷныӷым. Пиниқыхкаңаңа, тӯныхка̄лӷӣлъю хўаңамнун. 21Ынка̄м пакигигатақа Кияӷныӷым тунуся̄. Ю̄к қа̄ткутылъыӷмикун Лӣлиҳтӯсянун налъҳусяӷьяҳқа̄яқан Кияӷныӷым ылъқуӷутңалъҳанун, та̄ўа Христосым туқулъҳа тымңиңунаяҳтуқ.

Currently Selected:

К Галатам 2: ess2

Highlight

Compare

Copy