К Галатам 1

1Укут посланият Павелымың пиңӯт, апостолымың. Югыт накмикылъҳита̄тңа апостолыңулюңа, талўа каяхтылъҳита̄тңа. Апостолыңӯҳтыка̄гуңа Иисус Христосыкунлъю, Кияӷныҳқунлъю Атакун, уңуваҳтыстикақ лъңаның туқулъыӷмың. 2Письмоӷақамси ухпықани Галатиямылңуӷни. Қамахлъютың ухпықа̄лгутма ма̄нлыңӯт пиниқӣсиңук хўаңамнун малигулъютың.

3Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

4Христос лъңаның аҳқуткыхка̄гуқ сыӷлыҳқылъымнъун, итымунъалюта хўакын сыӷлыӷмың кияҳта̄лъыӷмың. Кияӷнымта Атам пиюкылъҳатун пика̄гуқ. 5Ынка̄м Кияӷнық усюқылъыңли қӯнпырухлъяк кынлыңуна̄н. Аминь.

Ата̄сӣна̄гуқ Пинилӷӣ Уңипақ

6Сяӷӣӷаягутамси а̄ўалъю пыхтаҳтаҳси туқлъюӷистызи наңлъыхталъҳакун Христосым, тугуклъиӷӣси алъяның «пинилӷӣның уңипаның». 7Авақшахӣтуқ алъя «пинилӷӣның уңипаның». Иўырңа иляңита югыт тыхылъҳӣҳтыстақӣси алъяңуҳнақуткылъыӷмыхтыхун Пинилӷӣтнъың Уңипаның Христосымың аюқылӷӣт. 8Қайўа яқулык қилягмың, налиӷмың налимта хўаңкута уңипақыхкумтыки «пинилӷӣт уңипат» алъяңулюки уңипақыхкамнъың лъпысинун, та̄на Уңипақилӷӣ Кияӷныӷым нанқихлъигу аӷью̄лъыӷмун. 9Сивунӷани уңипа̄ткақамси, хўа̄ уңипа̄нъақлъя̄таӷамси, китум алңунак уңипақыхкумики «пинилӷӣт уңипат» алъяңулюки ухпықыхкаҳпысиның, Кияӷныӷым нанқихлъигу аӷью̄лъыӷмун.

10Таўатын акузилъымкун ыфқуҳнақуткыңъунӷитанка югыт. Нака̄, Кияӷныҳӣна̄гуқ ыфқуҳсюкақа. Паниның югнун ыфқуҳтинақуткыңъукума, Христосымун қыпҳаҳтыңуна̄нӷитуңа.

Натын Павелым Апостолыңуҳтылъҳа

11Ухпықа̄лгутымни, уна лӣсимакысюгақа лъпысинун, Пинилӷӣт Уңипат уңипақақыхкынка югның пиңунӷитут. 12Нагақуқақынӷитанка югның, талўа китум алңунак апыҳтӯткумаңитӣ хўаңамнун. Иисус Христосым алӣҳтыкақӣ хўаңамнун.

13Нагақуқақаҳси натыся̄тка малихтыңъулюки Иудеит кияҳта̄лъҳит. Ынңа̄талъ наңлъыгьюлъңунаңа амью̄ткыхкақанка ухпықат, та̄куңинаҳа̄гның авӣӷутыснақуткыхкақанка. 14Иңьяқақанка алъюлъюки аңта̄лгутынка атуқңулюки Иудеит кияҳта̄лъҳит, қаюҳлъяк сягиқныҳлъягуяҳтуңа сивунымта наңаӷныӷитнун.

15Иўырңа алъхыӷумаңилъюңа Кияӷныӷым накмикыхкақа̄ңа, наңлъыхталъыӷмикун туқлъюқақа̄ңа. 16Ынка̄м хўаңамнун алӣҳтыкақа̄ кинаңутаңа Иӷныни уңипақысқылъюку язычнигнун. Кинкунун алңунак акузиткысяҳтулъҳитақа та̄на, 17талўа Иерусалимытылъҳитуңа акузиткынъалюку апостолыңуҳтыканун сивумни. Йыӷлыги Аравиямун пӣңа. Тахталми утыӷниҳтуңа Дамаскымун. 18Тама̄ни пиңают аюмиқулъҳыт атуӷлюки Иерусалимытуңа алыҳқуӷналюку Кифа (Петр). Лъңанитуңа акимигақ унук. 19Кина алъя апостол алыҳқунӷитақа иўырңақун Иаков, Атанӷым аңлыгутаңа.

20А̄пқанка укут ипаңӯт, Кияӷныӷым лӣсимака̄ңа иқлъыңиқңунӷитуңа.

21Та̄хкын иглыӷа̄ңа Сириямунлъю, Киликиямунлъю. 22Тама̄ни Иудеями ухпықат Христосыкун сялин налъӣгалъкаңатңа хинасяҳқуӷлюңа. 23Та̄ўаңинақ лӣсимака̄т нагақулъыҳтың хўатын: «Ю̄к амьюқытиқыстыкыхкаҳпут, на̄фқӣнақуткыхкақлъю ухпықилъымнъың Христосымың ма̄тын хўа̄ уңипақӣқуқ ухпықилъыӷмың Христосыкун!» 24Ынка̄м Кияӷнық усюқақа̄т хўаңа апалъюқлъюңа.

Currently Selected:

К Галатам 1: ess2

Highlight

Compare

Copy