2е Коринфянам 13

Киңулӣт Кылыңася̄лъҳыт

1Уна пиңайӣтка̄ ля̄лиҳнақылъыӷма лъпысинун. Акузитни Игақыхкани игақңа̄қ хўатын: «Ю̄к анахусимаңиткатху, ма̄лӷук налиӷмың пиңают лӣсимакистыт ипапиҳқысяҳқақа̄т анахутылъҳа». 2Тӯңлиҳа̄ни ля̄лиҳфикақңамси кылыңася̄қақамси тама̄кут сивунӷани сыӷлыҳқылӷӣт. Иляңитлъю кылыңася̄қақанка, тагинқихтыкума аӷью̄ӷмихлъықнилюки сыӷлыҳқумаңинақата. Тама̄нъыӷитыӷңа̄ӷма кылыңася̄ӷнақанка. 3Хўаңамнун ипапиҳқыстысюкыси Христос акузӣқутаңа хўаңамкун. Христос кая̄нъыӷитуқ аӷью̄ӷмикумиси, итупилъ аҳтуӷьяҳқа̄нӷитуқ. 4Қайўа Христос кая̄тка̄яҳтуқ қақӯраӷақңамыхтыху, ма̄тын кияҳтыңъӯқ Кияӷныӷым аҳтуӷьяҳқа̄нӷилъҳакун. Хўаңкуталъю кая̄тукут катам Христосым кая̄тка̄ялъҳатун. Иўырңа лъпысиниткумта каюсӣлъықамси Кияӷныӷым аҳтуӷьяҳқа̄нӷилъҳакун.

5Ювӷӣҳтык лъпысиның лӣгикысқылъюку ухпықылъыҳси Иисус Христосымун. Лӣгикынӷистыхӯу Иисус Христос кияҳтыңъутаңа илюхпысини? Илюхпысининъыӷитңукан, та̄ўа ухпықыпӣлъҳитаҳси. 6Сюнаңуқ лӣгикитыху Кияӷныӷмун итагнақуманилюта. 7Юӷаӷақукут Кияӷныӷмун каюсӣтысқылъюси анахутыфқа̄фси писқылъюси. Иўырңа юӷа̄ңунӷитукут ипапиҳқынъалюку лъпысинун Кияӷныӷмун итагнақуманилюта. Итупилъ хўаңкута юӷа̄ткақамси ылъқуӷутңа̄н писқылъюси, қайўа югыт пиӷңата̄лъю итагнақылъҳинъилюта Кияӷныӷмун. 8Кипулъхина̄ҳпагниңитаҳпут ипапилъық; итупилъ иляпхаяҳқақаҳпут. 9Қуя̄қукут кая̄нъымта, икнақңуныҳпысини. Ынка̄м юӷа̄ткақамси выӷунъықихтысқылъюси кияҳтысқысюлъҳанун Кияӷныӷым. 10Тама̄кын апалъюқлъюку письмокақамси лъпысинун пивагилгама қаюҳлъяк нанқихсюнӷилъкымси аӷью̄ӷмигьяҳқа̄люси. Атанӷым қылъқақа̄ңа нанқихтыстыңулюңа лъпысинун. Ынка̄м нанқихсюгамси каюсӣнъалюси ухпықилъыҳтуҳтысқылъюси, нака̄н кая̄лисқылъюси.

11Ухпықа̄лгутымни, таўатынңам пӣңа. Қуяңатык. Выӷутык кияҳтысқысюлъҳанун Кияӷныӷым. Писқысюлъымтун питык. Кияҳтык итагнақулъюси, ныкыхмытулъюси. Ынка̄м Кияӷнық тынымыңа пиниқылъҳымлъю, ныкыхмылъҳымлъю лъпысинилъи.

12Қуякутутақитык аглыӷналӷӣкун на̄лъыҳқун.

13Қамахлъютың ухпықа̄лгутыт пиниқӣсиңут. 14Наңлъыхталъҳа Атанӷым Иисус Христосым, пиниқылъҳалъю Кияӷныӷым, қырңаӷмытылъҳалъю Аглыӷналӷӣм Таӷныӷам лъпысинилъи.

Currently Selected:

2е Коринфянам 13: ess2

Highlight

Compare

Copy