2е Фессалоникийцам 3
3
Юӷа̄ткитыкут
1Ухпықа̄лгутымнъи, та̄қнӣткун сямың пӣӷа̄тақаӷлямси. Юӷа̄ткитыкут Атанӷым уңипа̄ миңишахкӣӷысқылъюку, югнунлъю қӯлвӣсқылъюку, катам лъпыси пилъыҳпысистун. 2Юӷа̄ткитыкутлъю Кияӷныӷмун югулисқылъюта сыӷлыӷның югның, қаюҳлъяк углялӷӣ ю̄к ухпықилъылгунӷитуқ.
3Иўырңа Атанық ата̄сӣӷмытуқ; икнақуҳсяҳлъықӣсилъю, пақнӣҳсяҳлъықӣсилъю Туӷныӷаӷмың. 4Атанӷым налъюнықнӣӷума̄ хўаңкунъун қа̄ткутңӯси қылылъымнъун, қа̄ткумаңинаҳлъықаҳсилъю.
5Атанӷым лӣгикыслъиси ўатақа̄ӷақ Кияӷныӷым пиниқылъҳаның, Христосымлъю нуқытутиныҳтулъҳаның.
Қамахлъютың Ухпықат Қыпҳаӷлит
6Ухпықа̄лгутымнъи, а̄тҳакун Атанымта Иисус Христосым қылӷамси иқитңасқылъюси тамаҳӣтның ухпықа̄лгутыхпысиның иҳсяниталӷӣныңлъю, малиҳқутақигалңуӷныңлъю апыҳтӯткамнъың лъпысинун. 7Лъпыси катам лӣсимакаҳси аюқысиӷаӷьяҳқақсяӷаҳпысикут; лъпысинилъюта иҳсянитиқумаңитукут. 8Тугуклъӣгатапут нықыт кинкуның алңунак тукфилъңунаки. Иўырңа унухтӯма̄н, аӷныҳтӯма̄н қыпҳақа̄гукут, уӷлыӷӣқа̄гукут уқихтуқутңуюнӷитутымнъың налиҳӣнаҳпысинун. 9Лъпысинун а̄псяқлъыгуяҳтукут каюсӣтысқылъюта, йыӷлыги қыпҳақа̄гукут афлъыңакналюта хўаңкунъың успута̄налюта лъпысинун аюқысиӷӣсқылъюта. 10Талўа лъпысинилъюта хўатын қылъқақыхкымси: «Кина алңунак қыпҳаӷьюнӷилңуқ ныӷыстыхпына̄н».
11Таўатын пика̄гукут қаюҳлъяк нагақуӷақукут илясиңуқ иҳсянитаҳтут, қыпҳаӷьюгигатут, йыӷлыги янутқўа̄қӣңуқ югыт. 12А̄тҳакун Атанӷым Иисус Христосым қылӷапутлъю, кайымапутлъю таўатылңӯт югыт иҳсянитиқыфқӣта алъҳыӷутысқылъюки кияӷусиҳқӣтның.
13Ухпықа̄лгутымнъи, қинуягутыхпынаси пинитун пиныӷмың. 14Кина алңунак қа̄ткусюнӷилъкан сямың пилъымнъун укутхун письмотхун, сю̄мқынъакыси кинкуңутаңи. Ынка̄м иқитңалӷа̄си лъңаның кайңуюгысқылъюку анахутылъҳаның. 15Иўырңа кияӷутыхпына̄н аңуягулюку, итупилъ кылыңася̄ҳтыху ухпықа̄лгуткылъюку.
Та̄қнӣтыт
16Атанӷым лъңаның катам ныкыхмылъылитикаюгым, ныкыхмылъылисилъи ӣўлың сями тамаҳа̄ни. Атанық тамаҳа̄ҳпысинилъи.
17Хўаңа, Павел хўаңа катам ӣхымның игақақа пиниқилъқа лъпысинун. Таўатын игаӷақуңа қамахлъюки посланиямкун лъпысинун лӣсимакысқылъюки хўаңамның пиңутаңи.
18Наңлъыхталъҳа Атанымта Иисус Христосым тамаҳаҳпысинилъи.
Currently Selected:
2е Фессалоникийцам 3: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
