1е Тимофею 1

1Укут посланият Павелымың пиңӯт апостолаңаның Христос Иисусым. Апостолыңуҳтыка̄гуңа қылылъҳакун Кияӷныӷым Югулиӷистымта, Христос Иисусымлъю сиӷимакыхкамта.

2Тимофейемун; иӷныпикамкын ухпықилъымтыгныгун. Кияӷныӷым Атам, Христос Иисусымлъю Атанымта қуяслъитын, наңлъыклъитын, ныкыхмылъылгуслъитынлъю.

Кылыңася̄лъҳыт Апыҳтуӷистысиӷўа̄ӷның

3Аӷуляқнақумалюңа Македониямун Ефесымытысқыхкақамкын. Иляңи югыт тама̄нлыңӯт апыҳтуӷиңӯт ипаңунӷилңуӷмың апыҳтӯсяның. Қылыҳқи та̄қысқылъюки 4сяңилъҳа̄ткыхпынакиңуқ акузимҳуткылъюки уңипаӷа̄тыңлъяқат, сивунылӷутыҳлъягытлъю а̄тҳит. Тама̄кут а̄ҳтӣра̄ӷусиҳӣна̄гут, каютңунӷитут қыпҳақа̄нун Кияӷныӷым. Лъңан қыпҳақа̄ апыӷӣӷақуқ ухпықилъҳӣнаҳаҳқун. 5Қылылю̄гуткақа ухпықат пиниқутыпӣгысқылъюки, умьюгақыхлъюки, ипапигмың ухпықилъылгулюки. 6Иляңита югыт пыхтыкақӣт тама̄кут ынка̄м а̄ҳтӣра̄ӷақут тымңимың. 7Апыҳтуӷистыңуюгақут Кияӷныӷым Лӣлиҳтӯся̄мнъун. Иўырңа лӣгикигатӣт акузиткыхкатың қайўа апыҳтӯсяқыӷңа̄ӷмыхтыки ипасюгнилъюки.

8Лӣсимакапут Лӣлиҳтӯсят пиниҳтут ылъқуҳлъюки атуқылӷӣни. 9Лӣсимакапут Лӣлиҳтӯсят улима̄ӷунӷитут пинилӷӣнун югнун. Улима̄ӷӯт лӣлиҳтӯсяның на̄фқӣкаюгнун, қа̄ткусигалңуӷнунлъю. Улима̄ӷӯт Кияӷныӷьюгигалңуӷнун, сыӷлыҳқыстынунлъю. Улима̄ӷӯт ўа̄кигалңуӷнун Кияӷныӷмың, лыгасӣӷўа̄ткилӷӣнунлъю аглыӷналӷӣнун. Улима̄ӷӯт туқутикаюгнун атамыхның налиӷмың на̄мыхның, юхтаҳтынунлъю. 10Улима̄ӷӯт блудникыстынун, югнун юлгутмыхның атуқикаюгнун, югнун акикикаюгнун югмың қыпҳаҳтыля̄ӷулюки, иқлъыңиқыстынун, иқлъыңалӷӣнун лӣсимакистынун, кипулъхина̄лӷӣнунлъю Кияӷныӷым апыҳтӯсӣтнун ипапиҳқыңъалӷӣнун. 11Та̄кут апыҳтӯсят пинӣпихлъыҳӣның Пинилӷӣның Уңипаның пиңӯт. А̄пҳўа̄т усюқналӷӣ Кияӷнық, ныӷьюкуткақӣ хўаңамнун а̄пҳысқылъюки.

Иқамсиқаюлъық Кияӷныӷым Наңлъыхталъҳанун

12Игамсиқаюгвикақа Христос Иисус Атаныҳпут, икнақуҳсяқақа̄ңа қыпҳақамнун. Игамсиқаюгвикақа ысҳақақа̄ңа ата̄сӣӷмылъюңа накмиклъюңа қыпҳа̄тысқылъюни. 13Сивунӷани сыӷлыпыста̄тун акузиткыхкақақа Христос, сыӷлыпыста̄тунлъю пикақақа. Амьюқыта̄ткақңамки малихся̄ҳтыңи таўатытыфтуқ амьюқыта̄ткыңъуфтақа лъңа. Таўалъӣма Кияӷныӷым наңлъыкыхкақыхкаңаңа қаюҳлъяк сялин ухпықигалъкыхка Христос, лӣгикумаңилъкыхка ся̄қутка. 14Иўырңа Атанымта наңлъыкыҳлъякақа̄ңа! Ухпықилъылиткақа̄ңа, пиниқылъылиткақа̄ңалъю Христос Иисусымылңуӷмың. 15Сямың пилъыҳқақа ипаңӯқ ынка̄м қамахлъюни ухпықсяҳқа̄гуқ: «Христос Иисус тагика̄гуқ нунамун югулиналюки сыӷлыҳқыстыт». Хўаңа сыӷлылъыҳпига̄гуңа сыӷлыҳқыстының. 16Нақамлъю Кияӷныӷым наңлъыгьягуткақа̄ңа. Ынка̄м успута̄гуңа натын тахка̄н Христос Иисусым утақӣлъыҳқа̄ның сыӷлыҳқыстының ухпықысқылъюни. Та̄на успутақ тама̄кунун аюқуқ ухпықияҳқанун лъңаның уңувалъыңысқылъюки кынлыңилңуӷмың. 17Умӣлыгмун кынлыңилңуӷмун, туқупагниңилңуӷмун, алӣнъыӷилңуӷмун, лъңина̄ Кияӷныӷӯқ; лъңа қӯлвалъыңлилъю, усюқылъыңлилъю қӯнпырухлъяк кынлыңуна̄н! Аминь.

18Тимофейеми иӷнымни, қавңақ иляңита ӯкналиқистыт акузиткыхкақа̄тын. Ынка̄м ма̄тын қылӷамкын акузитаңит гӯтуткики пилъюўамун. Таўатын пинитун пилъюўаҳлъықутын Христосымун. 19Ухпықикыста̄ Христосыкун атуқлъюку лӣсимакыхкан ылъқуӷутңалӷӣ. Иляңита югыт атуқигатӣт лӣсимакыхкатың ылъқуӷутңалӷӣт ынка̄м на̄фқақӣт ухпықилъытың катам аңьяҳпагӣлъҳӣстун. 20Именейелъю, Александрлъю тама̄кут акулңитнитук. Тӯныхкақахка Туӷныӷаӷмун лӣтысқылъюкык сыӷлыпыста̄тун акузиткыфқа̄н Кияӷнық писқылъюку.

Currently Selected:

1е Тимофею 1: ess2

Highlight

Compare

Copy