2е Коринфянам 9

Каюсиӷилъық Ухпықа̄лгутнун

1Письмоткынӷисяӷңа̄мкун аюқақа тунусяқ туюӷьяҳқаҳси Кияӷныӷым югитнун Иерусалимым. 2Лӣсимакамси каюсиӷиюглюси аюқуси ынка̄м қанаткақамси ухпықӣтнун Македониям. Хўатын пика̄гуңа: «Аўатаңани има ухпықа̄лгутыт Ахаиямылңӯт ята̄ҳқыхка̄гут тӯниналютың». Сягиқылъыҳпыси алъюлъюки ухпықат ма̄нлыңӯт тӯниюхтыстыкақӣтлъю. 3Иўырңа каяхнақанка иляңи ухпықа̄лгутыпут лъпысинун. Апалъюқақа қанаткилъқа лъпысиның тымңиңуфқа̄н писқылъюку. Ята̄ҳқысқысюгамси катам хўаңа писқылъымтун лъпыси, 4лю̄рақ Македонияӷмӣт иляңита малихнаюкаңатңа Коринфымун. Ысҳақумиси ята̄ҳқылъҳилъюси тунусяҳқаҳпысиның, та̄ўа хўаңкута кайңуся̄кылъықӣлъю, лъпысилъю кайңуюхлъықуси. 5Ынка̄м сюмыҳтаӷаҳтуңа сивумни каяхтыкыстаӷналюки иляңи ухпықа̄лгутыпут. Таўатын каюсӣлъықӣси ята̄ҳқысқылъюку акықусяқыхкаҳси тунусяқ. Та̄хкын ка̄скума тунусяҳси апыӷӣӷңалъықуқ, ынка̄м югыт лӣсимакылъықа̄т тӯниюлъыҳси, нака̄н қаюҳлъяк тӯнияҳқа̄тыхпысиның.

6Нықамиклъюку уна, ю̄к паляҳаӷмың пӣтутмың пӣтысиӷақуми, паляҳа̄н сяӷналъықуқ. Ю̄к угляӷлюку пӣтутмың пӣтысиӷақуми, угляӷлюку сяӷналъықуқ. 7Тамаҳаҳпыси сюмыҳтаӷа̄ткитыху тӯнилъыҳқаҳтуталыси. Иӷлыгумаҳпыси тӯнихпынаси налиӷмың тӯнияҳқа̄тыхпысиның. Иўырңа қуякусиқлъюку тӯнӣқитык қаюҳлъяк Кияӷныӷым пиниқӣ таўатылңӯт тӯнистыт. 8Кияӷныӷым тӯньяқлъыгўӣси аклъюкыхкаҳпысиның қа̄йӷулъюку. Ынка̄м ӣўлың сямың алңунак пилгулъықуси, сӣпңа̄нлъю каюсӣтысқылъюки иляси. 9Акузитни Игақыхкани игақңа̄қ:

«Иӷлылъңунани тӯнӣқуқ аклъюмалӷӣнун;

пинитун пималъҳа нагныӷьяҳқа̄гуқ қӯнпың».

10Кияӷныӷӯқ тӯникаюк пӣтутмың пӣтысиӷаҳтымун, нықмыңлъю ныӷьяҳқамың. Тӯнылъықа̄ қамахлъюку пӣтун аклъюкыхкаҳси, нагуслъықӣлъю. Ынка̄ңам унатаҳлъяхлъықуси қаюҳлъяк иӷлыгилңӯси. 11Сякун тамаҳа̄кун аклъюңиӷислъықӣси, наранңуна̄н тӯнисқылъюси сялъыӷми тамаҳа̄ни. Ынка̄м тӯнилъыҳпысигун хўаңкутхун углялӷӣм игамсиқаюгвикылъықа̄т Кияӷнық. 12Кияӷныӷым югита Иерусалимымылңӯт алъхыҳлъықӣт аклъюкыхкатың тунусяҳпысигун. Ынка̄м юлӷутыҳлъягыт игамсиқаюлъыӷмың тывуӷалъықут Кияӷныӷмун. 13Тӯньяҳқаҳпысигун ипапиҳқылъықуси ухпықиңанилюсилъю, қа̄ткутңанилюсилъю Пинилӷӣнун Уңипа̄нун Христосым. Тама̄кын апалъюқлъюку югыт усюқылъықа̄т Кияӷнық. Усюқылъықа̄тлъю иӷлылъңунаси тӯнилъыҳпысиның Иерусалимыӷмӣнунлъю, иляңитнунлъю. 14Ынка̄ңам пиниқыпихлъюси юӷа̄ткылъықӣси апалъюқлъюку пиниқылъыӷрухлъяк Кияӷныӷым тӯнңакаңа лъпысинун. 15Йықай игамсиқаюгвикылътыху Кияӷнық тунуся̄нун акузитыт апыҳпагниңилъкаңат.

Currently Selected:

2е Коринфянам 9: ess2

Highlight

Compare

Copy