2е Коринфянам 10

Павелым А̄пқаңа Қыпҳақани

1Иляңита юхпыси пӣқа̄тңа тытухтаӷнилюңа лъпысининъымни, иўырңа тытугиганъӣқа̄тңа лъпысининъыӷинъымни. Хўаңа Павел, хўаңамның катам, Христосым қусывыгңалъҳакунлъю, пиниқылъҳакунлъю, 2тытухтысныӷитаҳнакыфсиңа ля̄лиҳфикынқихтыкумси. Иўырңа тытугьяҳқақынӷилъкумки тама̄кут югыт пилӷӣт кияҳтыңъунилюңа нунам югыстун, ынңа̄талъ тытугна̄нӷитанка. 3Нунамытңуӷңа̄мта пилъюўӣгатукут нунам юган пилъюўалъҳистун. 4Гӯтутыт пилъюўа̄сипут нунам юган гӯтуткынӷитӣ. Гӯтутыпут Кияӷныӷым аҳтуӷьяҳқа̄нӷилъҳаның пилгӯт. На̄фқысяқлъыгўӣт айыпсюгилңӯт миңлъютыт аңуягым ныкыфқуқӣ югыт увитаңитхун. 5Та̄кутхун гӯтутытхун на̄фқақапут аңуягым иқлъыңӣ, сюмыӷныӷитлъю а̄ңа̄югныӷыт. Апыҳтуӷилъҳита амигиӷақӣт югыт лӣтылъыҳқӣтның Кияӷныӷмың. Катам пилъюўаҳтыт тугутылъҳистун анусимиңлъяӷьяҳқамың, хўаңкуталъю тугўа̄қапут қамахлъюки сюмыӷныӷыт қа̄ткутысқылъюки Христосымун. 6Христосымун қа̄ткутңъўа̄қуфси, та̄ўа аӷью̄ӷияҳқа̄ҳлъықукут қа̄ткунъыӷилңуӷнун.

7Нанқихтӣқуси ысҳалъҳӣнаҳпысигун. Христосымун пикыпыста̄ӷникуфси, нықамиклъюку хўаңкуталъю Христосым пикӣлъю, лъпысистун. 8Кайңукигатақа қанаткивлыӷапалъқа Атанӷым иглыӷутистыңуҳтыстыкаңаңа лъпысинун. Таўатын пика̄гуқ хўаңкунъун кайымысқылъюку ухпықилъыҳси, нака̄н на̄фқынъалюку. 9Сюмыҳтаӷаҳпынаси алиңыснақуткыңъунилюси посланиямкун. 10Иляңита пӣқӣт Павелым посланияңи сыӷлыҳлъягунилюки аҳся̄ӷмикаӷңанилюки, нақам хўаңкунъинъыӷмини, аҳся̄н аюқақуқ, акузийӣтақуқлъю! 11Тама̄кут югыт таўатын пикат лӣгиклъитху сямың пилъыҳпут посланиятхун, тама̄куңӯт ата̄сит пияҳқапут лъңитнун пикумта.

12Иңлюнъақуткынъа̄нӷитукут тама̄кунун а̄ңа̄юхлъыҳӣнун. Сюмыҳтаӷаӷақут а̄ңнилютың қаюҳлъяк уңипа̄тутақылӷӣт а̄ңнилютың. Налъю̄ҳаӷмың! 13Қука̄югуткынъа̄нӷитаҳпут алңунак қыпҳақақ Кияӷныӷым каягусимаңилъкаңа хўаңкунъун. Иўырңа қука̄югуткыңъинаҳлъықаҳпут қыпҳақақ каягутка̄ хўаңкунъун. Лъпысилъю илятңа̄си қыпҳақамнъун. 14Сивулиҳпига̄гукут уңипақияҳтуқани лъпысинун Пинилӷӣның Уңипа̄мың Христосым. Ынка̄м алъпагигатаҳпут қыпҳақақ Кияӷныӷым каягутка̄ хўаңкунъун. 15Қука̄югуткылъықаҳпут та̄наңинақ қыпҳақақ пикаҳпут, нака̄н иляңита қыпҳақа̄т. Ухпылъыҳтуҳтыкуфси сиӷима̄кут каюсиӷатаӷӣсқылъюта қыпҳақамнъың. 16Ынка̄м уңипақияҳтуҳлъықукут Пинилӷӣның Уңипаның иляңитнун нунат. Қука̄югуткысюгунӷитаҳпут қыпҳақақ иляңита апыӷӣқа̄т.

17Иўырңа игақңа̄қ Акузитни Игақыхкани хўатын: «Кина алңунак қука̄юхсюкуми, қука̄югуткылъигу Атанҳӣнақ». 18Атанӷым тугуклъӣгатӣ пиниӷнилӷӣт. Итупилъ Атанӷым тугуклъиӷақӣ тама̄кут пиниӷнилюки пикани.

Currently Selected:

2е Коринфянам 10: ess2

Highlight

Compare

Copy