2е Коринфянам 8

Ухпықат Тӯнилъҳат

1Ухпықа̄лгутымни, хўаңкута лӣсимакысюўамси Кияӷныӷым наңлъыхталъҳаның ухпықанун юӷаӷвигитни Македониям. 2Икфиқлъӣҳтылъыҳлъягита нанӷӣҳсяӷалъыңыстыҳлъякақӣт. Қайўа аклъюмаҳлъягьяӷңа̄ӷмың, паниның қуямаҳлъяка̄гут рыпалъ иӷлыхпынатың тӯника̄гут каюсиӷналюки иляңи ухпықат. 3Уңипа̄тамси тӯника̄гут тӯньяҳқаҳтуталмыгыстун, талўа тӯнӣӷатаӷақа̄гут. Таўатын пика̄гут қаюҳлъяк лъңит тӯниюлӷӣт. Китум алңунак писқумаңитӣ. 4Талўа а̄пуқӯтыҳлъяка̄гут тӯнилгусиӷиналютың Кияӷныӷым югитнун. 5Тӯнилъҳат угляқа̄гуқ сиӷимакылъымнъың. Сивуклъютың лъңитның пыхтут Атаныӷмун, та̄хкын хўаңкунъун пиюкылъҳакун Кияӷныӷым. 6Тит лъпысинитақңами пӣнлиӷика̄гуқ қырңуҳтилъыҳпысиның манимың. Ынка̄м кайымаҳпут каюсӣсяҳтӣсқылъюси апыӷӣӷысқылъюку наңлъыкусяҳси тунусяқ. 7Сялъыҳпысигун тамаҳа̄кун пинитун пӣқуси: ухпықилъыҳпысигун, акузилъыҳпысигун, лӣсималъыҳпысигун, каюсиӷиюкысталъыҳпысигун, пиниқилъыҳпысигунлъю хўаңкунъун. Ма̄тымилъю пинитун пӣқитык тӯнилъыҳпысигун.

8Қылӷунӷитамси тӯнисқылъюси, иўырңа уңипа̄тңўа̄мси натын иляңит тӯниматаңи. Ынка̄м тӯнилъыҳпыси ипапиҳқылъықа̄ пиниқилъыҳси ипаңутаңа. 9Лӣсимакаҳси пиниқиңалъыҳлъяга Атанымта Иисус Христосым. Аклъюңиҳлъягмини таўалъӣма лъңаның катам аклъюма̄ҳтыка̄гуқ лъпыси апалъюқлъюси. Таўатын пика̄гуқ аклъюңиӷисқықаҳлъюси аклъюмалъыӷмикун.

10Аўатаңани лъпыси қырңуҳтиюхўа̄қа̄гуси манимың, тӯника̄гусилъю қаюҳлъяк тӯниюлӷӣси. Сюмымни хўатылъюку пияқуфсигу, итагнаӷнаяҳтуси, 11нагныӷусяқуфсигу пӣнлиқаҳси! Сягиқңака̄гуси қырңуҳтиюхўа̄ӷақңафси манимың. Ынка̄м сягиқынқихлъюси апыӷӣҳтыху қырңуҳтыкаҳси. Тӯнитык тӯнилъыҳқаҳпысистун. 12Тӯниюпихтыкуфси Кияӷныӷым тугуклъиҳлъықӣ тунусяси. Пиюкақа̄ ю̄к тӯнисқылъюку тӯньяҳқалгукан, иўырңа аваңискан тӯнинӷисяӷңа̄н.

13Нӯқшахтистысюгунӷитамси иляси нӯқшахтинӷисималюки. 14Ма̄тын лъилыҳлъяглюси аюқуси ынка̄м каюсиӷьяҳқақаси тама̄кут аклъюлӷӣт. Иўырңа аклъюкуфси та̄ўа лъңита каюсиҳлъықӣси. Таўатын пикуфси каюсӣтулъықуси ынка̄м атуным пилъықуси. 15Катам Акузитыт Игақыхкат игақылъҳистун: «Ю̄к сяӷнаҳлъякақ сюйваҳсимаңитуқ, иўырңа ю̄к сяӷнапагумаңилңуқ аклъюна̄нӷитуқ».

Титымлъю Қыпҳалгутңи

16Игамсиқаюгвикақа Кияӷнық қаюҳлъяк Тит каюсиӷиюхтыстыҳлъякаңа лъпысиның катам хўаңкутыстун. 17Тит аңыҳқумака̄гуқ лъпысинун писқысямтыху. Лъпысинун пиюпихтыка̄гуқ, та̄на лъңан Пиюкылъқақа. 18Ухпықа̄лгутфут Титымун малигутыснақаҳпут. Қамахтыңъўа̄ӷлютың ухпықат қырңуӷуткаюгның юӷаӷвигни усюқыпихтақа̄т уңипақилъҳаның Пинилӷӣның Уңипаның. 19Та̄наңина̄хпына̄н, ухпықат накмикыхкақа̄т малигутысқылъюку хўаңкутхун, тӯнияҳтуқумта наңлъыкусямың тунусямың ухпықанун. Таўатын пиңӯкут усюқылъыңысқылъюку Атанық, югнунлъю лӣтысқылъюку каюсиӷиюлъыҳпут.

20Пира̄мсиңӯкут китумун алңунак сыӷлықӯфқа̄мта писқылъюта натын афлъыңакылъыҳпут та̄на тунусяҳлъяк. 21Ынка̄м тама̄кын апалъюқлъюку атуқсюгақаҳпут Кияӷныӷми ылъқуӷутңалӷӣ, югнилъю ылъқуӷутңалӷӣ.

22Титмунлъю малигутыснақаҳпут иляңа ухпықа̄лгутфут. Аўын ысҳаӷналюку натытуляңа пӣқаҳпут, пиялӷӣкут ӣўлың каюсиӷиюкыстаӷлюни аюқыфтуқ. Ўанлыги ма̄тын каюсиӷиюхлъягуҳтуқ қаюҳлъяк ныӷьюкыҳлъякаңиси. 23Тит қыпҳалгуткақа, қыпҳалгусиӷақа̄ңа каюсӣнъалюси. Та̄куклъю ухпықа̄лгутык ухпықат юӷаӷвигнилңӯт каяхтыкақахкыт. Қӯлваҳлъяглюку Христос аюқа̄к. 24Ынка̄м Коринфыӷмӣни, ысҳаҳтыстыху пиниқилъыҳси та̄кугнун югыгнун. Та̄хкын пиниқилъыҳпыси ипапиҳқыслъықӣт ухпықат юӷаӷвигнилңӯт сяңан қанаткылъымнъың лъпыси.

Currently Selected:

2е Коринфянам 8: ess2

Highlight

Compare

Copy