2е Коринфянам 7

1Пиниқыхкамни илякумта̄мни, Кияӷнық тама̄куның акықусяңлъяқа̄таңаның хўаңкунъун, укмаңиҳся̄лътыки алъя̄ҳӣна̄т нукыхнӣ югусимталъю, таӷныӷамталъю. Пылюңиҳтыңъўа̄ӷылъта қаюҳлъяк аликаҳпут Кияӷнық.

Павелым Қуялъҳа

2Илялӣқаҳқут илюхпысигун. Кина алңунак анагңалӷӣмың пиңигатаҳпут, ухпықилъҳа на̄фқумаңитаҳпут, талўа пӯҳнықхӯсимаңитаҳпут. 3Уңипа̄тңунӷитамси тама̄куның авуткынъалюси. Сивунӷани уңипа̄ткақамси пиниқыпихнилюси, ынка̄м кияҳтылгусиҳлъықамси налиӷмың туқулгусиҳлъықамси. 4Ныӷьюкыҳлъяглюси аюқамси, қука̄югуткыпихтамси. Кайымыҳлъягақаҳпысиңа. Ынка̄м сыӷлылӣлъыҳлъямнъи паниның тывуӷа̄қуңа қуялъыӷмың.

5Ка̄тақңамта Македониямун, мыӷна̄липагниңитка̄гукут. Сыӷлылӣқа̄гукут тамаңани, югыт а̄ҳтӣра̄қагӯтлъю, тыхылъҳӣқа̄гукутлъю. 6Иўырңа Кияӷныӷым илютуҳсяӷақӣ ӣлъқыңъалӷӣт, ынка̄м илютуҳсяӷӣлъю тагистылъыӷмикун Тит хўаңкунъун. 7Илютуҳтыка̄гукут тагӣқңан Тит, иўырңа илютуҳлъыңатаӷаҳтукут уңипа̄силъю лъпысинун илютуҳся̄манилюни. Уңипа̄тӣлъю лъпысинун ысҳаӷьюпихнилюңа, қивӷукнилюңа сыӷлылӣҳқылъыҳпысиның, каюсиӷьюпихнилюңалъю. Таўатын пилъыҳпыси ўанлыги қуястыҳлъяга̄ңа.

8Қайўа посланиямкун қивӷустыӷңа̄мси, авутыҳқуткыңъунӷитанка посланиянка. Сивукун авутыҳқысяҳтуңа қаюҳлъяк посланияма қивӷустаҳтыкаңиси. 9Қуяңунӷитуңа посланиямнун қивӷусиманилюси. Иўырңа қуяҳлъягӯңа қивӷулъыҳпыси алъяңуҳтыстыкақыхкаңи кияҳта̄лъыси. Қивӷулъыҳси Кияӷныӷым атуқыхкақа̄ лъпысинун, ынка̄м натын алңунак хўаңкута ақниҳтылъҳитамси. 10Кияӷныӷым атуқақа̄ қивӷулъық югнун авутыҳқылъюки сыӷлыҳқылъҳитның, югулилъыңысқылъюки. Китум алңунак авутыҳқуткынъа̄нӷита̄ югулилъық. Иўырңа қивӷулъық нунамың пи туқустӣқуқ. 11Ысҳақаҳтыхуқун сяңутаңа Кияӷныӷым апыӷӣқа̄ қивӷулъыҳпысигун. Қивӷулъыҳпыси ыфқуӷутысюхлъягӣси Кияӷныӷмун. Ынңа̄талъ ипапиҳқынъақуткыхка̄яҳтуси анахутылъҳинъилюси. Угумиягуткақаҳси анахутылъық, алиңрӯқа̄гусилъю. Ысҳаӷьюпихтыкақаҳпысиңа, пинитун пика̄гуси, аӷью̄қақаҳсилъю анахуткақ. Таўатын пилъыҳпысигун ипапиҳқыхка̄гуси апалъӣнъилюси.

12Ынка̄м қайўа таўатын письмояӷңа̄мси, апалъюқңунӷитақа анахуткақ, налиӷмың таўавык сыӷлытун пика̄нун. Итупилъ письмокақамси лӣгикңўа̄ӷысқылъюси Кияӷныӷым ысҳа̄манӷани тӯнңўа̄ӷлюси хўаңкунъун аюқылӷӣси. 13Тама̄кын апалъюқлъюку илютуҳтыңъўа̄кут.

Илютуҳтыңъинаҳпына̄мта, иўырңа қуя̄ӷатаӷаҳтукут ысҳаӷлюку Титым қуямалъҳа. Қамахлъюси сюмыӷьялиңӣтысима̄ҳси. 14Қанаткыхкақамси Титымун ыфқуқнилюси. Лъпысинун пӣқңами лӣткақӣ ипаңутаңи сямың пилъҳынка лъпысиның аюқылӷӣт, ынка̄м кайңуягутылъҳитанка қанаткилъҳынка. Ӣўлың ипапиҳқылъюта алыҳқуӷақамси. Таўатыҳпигақ ипаңӯт қанаткилъыҳпут Титымун. 15Ынка̄м Титым ўанлыги пиниқа̄ҳтӣси сюмыҳтаӷа̄ткынъыӷминигу қа̄ткутңалъыҳси лъңанун. Упуӷаткақыхкысилъю алиңылъылиӷлюси, уңылъыхтылъылиӷлюси. 16Қуяҳлъягӯңа қаюҳлъяк ныӷьюкыҳлъяглюси аюқамси сямун тамаҳа̄нун!

Currently Selected:

2е Коринфянам 7: ess2

Highlight

Compare

Copy