2е Коринфянам 6
6
1Қыпҳалгуткутутымнъың Кияӷнықлъю, та̄ўа кайымамси Кияӷныӷым наңлъыхталъҳа тугуклъиҳпына̄н тымңитхўаңулюку. 2Кияӷнық пика̄гуқ:
«Пилъыҳқаҳлъюўа̄ӷми нагақуқақамкын,
аӷныӷани югулилъҳым каюсиқақамкын».
Уңипа̄тамси, ма̄тыңӯқ Кияӷныӷым пилъыҳқаҳлъюўа̄ӷа; нагатык, ма̄тыңӯқ аӷныӷа югулиӷилъҳым! 3Кияҳта̄лъымтыхун на̄хсяӷаңлъӣгатапут югыт, сыӷлықӯфқа̄н писқылъюку қыпҳақаҳпут Атаныӷмун. 4Иўырңа сялъымтыхун тамаҳа̄кун лӣгикыстақукут югнун Кияӷныӷмун қыпҳаҳтыкнилюта. Тама̄кын апалъюқлъюку нуқытутималъымтыхун сюфлъюҳтаӷақапут сыӷлылӣлъҳыт, пияқлъӣлъҳыт, икфиқылъҳыт. 5Қывутқуқа̄гукут, анусимиңлъяқа̄гукут, угля̄тылъыңыхка̄гукутлъю. Уӷлыӷӣқа̄гукут, қавалъқумаңитукут, игатақа̄гукутлъю. 6Лӣгикыстыңъӯкутлъю Кияӷныӷмун қыпҳақаҳпут пинитун кияҳта̄лъымтыхун, лӣсимакилъымтыхун, нуқытутилъымтыхун, наңлъыхталъымтыхун, пиниқипилъымтыхун, Аглыӷналӷӣгныкун Таӷныӷагныкун. 7Қыпҳа̄тңўа̄ҳпут Кияӷнық уңипақылъымтыхун ипапилъық. Атуқақаҳпут Кияӷныӷым аҳтуӷьяҳқа̄нӷилъҳа, ылъқуӷутңалъықлъю гӯтуткылъюку аӷынқигныӷымлъю, сяӷумигныӷымлъю. 8Қӯлвалъыңақукутлъю, укаваҳлъыңақукутлъю; сыӷлықӯҳсиӷақукутлъю, усюқылъыңақукутлъю. Иқлъыңалӷӣңунӣқӣлъю, иўырңа акузӣқукут ипапигмың. 9Югыт налъюкниқӣтлъю, нақамлъю лӣсимаклъюта; угляӷңа̄н туқувзиӷақукут, иўырңа паниның уңува̄кут. Аӷью̄ӷьяӷңа̄мталъю, туқусигатӣнкутлъю. 10Қивӷуңуӷңа̄мта, нақамлъю қуяңаҳлъяўа̄қукут; аклъюмаӷңа̄мта, нақамлъю аклъюңиӷистақапут югыт; авақшахӣтыӷңа̄мта, нақамлъю пилўа̄қукут сямың тамаҳа̄ның.
11Ухпықа̄лгутымнъи, Коринфыӷмӣни, ипапиҳқылъюси аюқамси. Уңипа̄тамси пиниқыпихтамси. 12Нуқныӷусимаңитамси пиниқылъымнъың, иўырңа лъпысиңӯт нуқныӷутикат пиниқилъыҳпысиның хўаңкунъун. 13Ма̄тын алыҳқуӷамси авақутақыпихлъыҳӣстун, пиниқаҳтикут катам хўаңкута пиниқылъымтыстун лъпыси.
Кылыңася̄лъық Ухпықа̄нӷилңӯт Аюқнӣҳқилъҳитның
14Иңлюкыхпынаки ухпықа̄нӷилңӯт. Ылъқуӷутңанӷилңуқлъю, сыӷлыӷықлъю иңлюкутыпагниңитук. Ниӷуклъю мамлыклъю қырңаӷмытыпагниңитук. 15Христосым итагнақсяҳқақынӷитңўа̄ӷа̄ Туӷныӷақ. Ухпықат пиюкылъҳит алъяңӯт ухпықа̄нӷилңуӷның. 16Кияӷныңлъяқат манигуӷьяҳқа̄нӷитут Кияӷныӷым Храмыңани. Қаюҳлъяк хўаңкута Храмыкӣлъю уңувалӷӣм Кияӷныӷым, Кияӷнық пика̄лӷӣ:
«Лъңитнилъықуңалъю, акулңитнилъықуңалъю; Кияӷнықылъықа̄тңа, лъңитлъю юкылъықанка».
17«Тама̄кын апалъюқлъюку Атанық пика̄лӷӣ:
Унитыки тама̄кут югыт, а̄фтык лъңитның.
Ся̄фтыхпынаки укмаңинъыӷилңӯт;
ынка̄м тугуклъиҳлъықамси.
18Атакылъықаҳпысиңа,
ынка̄м лъпыси иӷнықылъықамсилъю, паникылъықамсилъю»,
пӣқ Атанық Аҳтуӷьяҳқаҳа̄нӷилңуқ.
Currently Selected:
2е Коринфянам 6: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
