2е Коринфянам 4

Югым Кая̄тылъҳа Кияӷныӷымлъю Аҳтуӷьяҳқа̄нӷилъҳа

1Ынка̄м Кияӷныӷым наңлъыхталъыӷмикун қыпҳақалитӣлъю хўакын қыпҳаӷьяҳқамың. Тама̄кын апалъюқлъюку ӣлъқаюгигатукут. 2Иҳсяягуткақапут аксяқыхкатлъю, кайңуналӷӣтлъю. Пӯҳсигатапут югыт, алъяңуҳсигатапутлъю Кияӷныӷым акузитаңи. Хўатыҳлъюўа̄қлъю апыҳтӯсяқақапут Кияӷныӷым ипапилъҳи, ынка̄ңам югыт лӣлъықӣлъю натылңӯтфут ысҳа̄манӷани Кияӷныӷым. 3Уңипақыхкапут Пинилӷӣт Уңипат ся̄пңаката, ся̄пңа̄т ифлъяяҳқаҳӣнаӷнун. 4Лъңита ухпықигата̄т уңипаҳпут қаюҳлъяк Туӷныӷа̄м, ӯм нунам Кияӷныӷын, ая̄стыкақӣ умьюгӣт. Ысҳанӷитыстақа̄ ниӷуга Пинилӷӣм Уңипам ниӷуҳқылъҳаның Христосымың аюқылӷӣ. Христос Кияӷныҳтун аюқуқ. 5Хўаңкунъың катам уңипақңунӷитукут, итупилъ уңипақңўа̄ҳпут Иисус Христос Атанӷунилюку. Қыпҳаҳтыкаҳпысикут Иисус апалъюқлъюку. 6Кияӷныӷӯқ хўатын пикақ: «Йықай ниӷук кӯкхулъи мамлылъыӷмың!» Лъңаңӯқ ата̄сиқ Кияӷнық кӯкхутыстилӷӣ ниӷугмың илюмнъун. Та̄хун ниӷухкун лӣтаҳпут ниӷуҳқылъҳа Кияӷныӷым, кӯкхулъҳӣ Иисус Христосым хина̄ның.

7Иўырңа хўаңкунъун Кияӷныӷым канаҳтыкақа̄ та̄на ниӷук кӯкхутысқылъюку илюмнъи. Хўаңкута қикустун қантаҳқастун аюқукут, ынка̄м тамаңан лӣгикылъықа̄т аҳтуӷьяҳқа̄нӷитыҳлъяк Кияӷныҳта̄нилюку, хўаңкунъың пиңунӷинъилюку. 8Сыӷлылӣлъыңақукут алъя̄ҳӣнатун иўырңа кая̄лъқигатӣлъю. Иляңакун кукшагьюлъыңақукут иўырңа сиӷималъҳӣсигатукут. 9Амьюқыта̄ткылъыңақукут, иўырңа Кияӷныӷым унисигатӣлъю; ақниҳқўа̄лъыңақукут, иўырңа туқуңигатукут. 10Ӣўлың туқулъҳа Иисусым югусимнъитуқ, ысҳӣсқылъюку уңувалъҳа Иисусым югусимнъи. 11Уңуваңулюта ӣўлың якуӷналъҳанитукут туқулъҳым апалъюқлъюку Иисус, ысҳӣсқылъюку Иисусым уңувалъҳа югусимнъи туқукаюгни. 12Ынка̄м хўаңкута якуӷналъҳанитукут туқулъҳым қаюҳлъяк қыпҳа̄тңукыфут Кияӷнық. Иўырңа қыпҳалъымта кынлыңилңуӷмың уңувалъыңыстыңъўӣси.

13Игақңа̄қ Акузитни Игақыхкани: «Ухпықақа Кияӷнық ынка̄м акузиткақақа». Ухпықилъыҳпут таўатытуқ игақыстытун. Хўаңкуталъю ухпықаҳпут Кияӷнық ынка̄м акузиткақаҳпут. 14Лӣсимакаҳпут Кияӷныӷым уңуваҳтыкақа̄ Атанық Иисус. Хўаңкуталъю уңуваҳлъықӯкут Иисусыкун. Та̄хкын агля̄лъықӣнкут қырңа̄мта лъпысилъю таўантылъыӷминун. 15Қамахлъютың тама̄кут апыӷӣқат хўаңкунъун лъпысинун аюқут. Кияӷныӷым наңлъыхталъҳан нуляслъықӣ югыт ухпықилӷӣт Христосыкун. Ынка̄м игамсиқаюлъыҳлъяк Кияӷныӷмун нулялъықуқ, қӯлвалъыңыҳлъяхлъықуқлъю.

Кияҳта̄лъық Ухпықилъыҳқун

16Ынка̄м ӣлъқаюгигатукут. Қайўа югусипут кая̄ликыстаӷьяӷңа̄та, таӷныӷапут нутаҳтыңъӯт аҳутаңа тамаҳа̄н. 17Сыӷлылӣлъыпут сясқуҳа̄гут мулюяҳқа̄нӷитут. Иўырңа тама̄кут ята̄ҳқутңўӣлъю алъхыҳтысқылъюку Кияӷныӷмың кынлыңилңуқ қуялъыҳлъяк. Ынка̄м сыӷлылӣлъыпут аваңилңуӷыстун аюқут. 18Сюмыҳтаӷа̄ткумаңинӣгатапут сыӷлылӣлъыпут. Итупилъ сюмыҳтаӷа̄ткақапут ысҳаҳпагниңилъкыпут. Қантаӷақун сыӷлылӣлъыпут кынлытҳӯлъықут, иўырңа қуялъыҳпут ысҳӣгалъкыфут қӯнпыкаҳқа̄гуқ.

Currently Selected:

2е Коринфянам 4: ess2

Highlight

Compare

Copy