2е Коринфянам 3

Қыпҳаҳтыңи Нутаӷам Акықусям

1Хўаңкута усюқыся̄юхнақлъя̄таӷыста̄ хўаңкунъың катам? Налиӷмың иляңистун аклъюкиңуста̄ посланиямың а̄пҳысқылъюта лъпысинун, налиӷмың лъпысиның? 2Лъпыси, лъпыси катам хўаңкута письмокамси, игақңа̄си илюмтыхун тамаңанун лӣсимакысқылъюсилъю атиҳтӣсқылъюси. 3Хўатыҳлъюўа̄қ посланияңӯси Христосымың пикат хўаңкунъун туюқӣ. Письмоткыхка̄нӷитуси чернилакун налиӷмың лъӣвнықыхтатхун уйӷахтыхун. Письмоткыхка̄гуси югыт илюңитхун Таӷныӷахкынкун уңувалӷӣм Кияӷныӷым.

4Таўатын пӣкут қаюҳлъяк ныӷьюлъылгӯкут Кияӷныӷми Христосыкун. 5Хўаңкунъың пикнина̄нӷитаҳпут қыпҳаӷьяқлъыгунилюку та̄на қыпҳақақ. Кияӷныӷым пияқлъыгуҳтыстақӣлъю қыпҳақамун. 6Лъңан қыпҳаӷьяқлъыгуҳтыстӣлъю нутаӷамун акықусямун. Та̄на нутаӷақ акықусяқ игақңалӷӣңунӷитуқ лӣлиҳтӯсяқ, иўырңа Таӷныӷагның аюқуқ. Игақңалӷӣм Лӣлиҳтӯсям тагита̄ туқулъық, иўырңа Таӷныӷам тӯна̄ уңувалъық. 7Лӣлиҳтӯсят игақыхка̄гут уйӷахтыхун, ынка̄м Кияӷныӷым ниӷуҳқылъҳа алӣқа̄гуқ Лӣлиҳтӯсят тӯнақңата. Моисейем хина̄ кӯкхутка̄гуқ та̄хкын ниӷуҳқылъыӷмың, қайўа ӷывыӷңа̄н Израилыӷмӣт ысҳаҳпагниңитка̄т хина̄. Лӣлиҳтӯсят туқустияҳқа̄гут қаюҳлъяк югыт қа̄ткынӷилъкаңит. Лӣлиҳтӯсят ниӷуҳқыстиҳлъягумаката, 8натынми аңка̄н қыпҳалъҳа Кияӷныӷым Таӷныӷахкынка ниӷуҳқыстӣӷатаӷаҳлъықа! 9Лӣлиҳтӯсяқ нанқихтияҳқа̄кан югмың аӷью̄ӷьяҳқа̄люки ниӷуҳқыңъаяҳтуқ; анахутылъҳинъилютың югыт пилӷӣт натынми аңка̄н ниӷуҳқыңъалъыҳтулъықат! 10Таўатын пиңӯкут қаюҳлъяк ниӷугатаӷалӷӣңуҳтуқ ниӷуҳқылъық ма̄тын, та̄на ниӷуҳқыңъаялӷӣ сивунӷани авӣӷусима̄қ. 11Ниӷуҳқылъылгуяқан таўатын мулюӷра̄камың, натынми аңка̄н ниӷуҳқылъылгулъықа мулюҳлъягьяҳқамың қӯнпырухлъяк!

12Та̄на сиӷимакутымнъың тытугигатңўа̄ҳтукут. 13Моисейитун аюқынӷитукут, хинани ся̄путиқа̄ ынка̄м Израилыӷмӣт ысҳа̄маңита̄т ниӷухлъяк авӣӷулъҳӣ. 14Умьюгӣт лӣгикыпагниңӣтка̄гут, хўавымун кынляңа умьюгӣт ся̄пңа̄т та̄хкын ата̄симың ся̄путамың, атиҳтуныӷмыхтыки ныӷиҳтат акықусят. Та̄на ся̄путақ иқисяҳқа̄гуқ Христосыңинаҳаҳқун. 15Талўа аӷныӷми хўани, атиҳтуныӷмыхтыки Лӣлиҳтӯсят Моисейемун тӯныхка̄т, умьюгӣт ся̄путамың ся̄пңа̄қут. 16Иўырңа ю̄к қӣвныӷмини Атаныӷмун ся̄пута̄ иқитақуқ. 17Ма̄тын Атанық Таӷныӷа̄лӷӣ, кина алңунак Атанӷым Таӷныӷахкының пилгукуми, итымңалъылгӯқ. 18Қамахтыңъўа̄ӷлюта ся̄путаңунаки хинапут ысҳаҳлъықаҳпут ниӷуҳқылъҳа Атанӷым. Та̄на ата̄сиқ ниӷуҳқылъық тагилӷӣ Атаныӷмың Таӷныӷа̄гуқ, алъяңуҳтӣлъю лъңасюгниҳтысқылъюта а̄ңатаӷаӷлюку ниӷуҳқылъыӷмың.

Currently Selected:

2е Коринфянам 3: ess2

Highlight

Compare

Copy