2е Коринфянам 12

Павелым Ысҳаӷўа̄лъҳа

1Қука̄юхсяҳқа̄гуңа, аныӷныҳқусӣнӷитыӷңа̄н. Паниның уңипа̄нъақамси ысҳаӷўа̄лъымның, Атанӷымлъю алӣҳқуқа̄ның хўаңамнун. 2Лӣсимакақа ю̄к Христосымылңуқ. Қуля стамат сӣпнықлъюки аюмиқулъыӷни агани наӷуҳтыкани Кияӷныӷым маю̄тқаҳтыкақа̄ пиңая̄нун қилягым. Налъюкңўа̄ӷақа ю̄к югусиминитутаңа налиӷмың югусиминың а̄нңака̄таңа, иўырңа Кияӷныӷым лӣсимака̄. 3Лӣсимакақа та̄на ю̄к Кияӷныӷым маю̄тқаҳтыкақа̄ Райемун. Налъюкңўа̄ӷақа ю̄к югусиминитутаңа налиӷмың югусиминың а̄нңака̄таңа, иўырңа Кияӷныӷым лӣсимака̄. 4Таўани нагаткақӣ сяңўа̄т апыӷьяҳқа̄нӷилңӯт. Тама̄кут ӣнӷутка̄гут югмун акузиткысяҳқа̄лютың. 5Қука̄югуткынъақақа та̄на ю̄к, иўырңа қука̄югуткынъақынӷитуңа хўаңамның иўырңақун кая̄лъиқусиқыхкаҳӣнамның. 6Қука̄югуткысюкума хўаңамның, тымңиңуна̄нӷитуңа қаюҳлъяк апыҳлъықақа ипапилъық. Иўырңа қука̄югуткынъанӷитуңа хўаңамның, қаюҳлъяк югнун сюмыҳтаӷа̄ткысюхтуңа ылъқуҳлъюңа ысҳапалъҳитхунлъю, нагатылъҳитхунлъю хўаңа.

7Кияӷныӷым алӣҳтыкақыӷңа̄ки хўаңамнун угля̄пихлъыӷӣт сяңўа̄т қилягми, қука̄юхтыстысюнӷита̄ңа. Ынка̄м Кияӷныӷым қусывыхтысқылъюңа сикуҳлъюңыста̄ңа югусимкун. Та̄на сикуҳлъюк уңипаҳтыңӯқ Туӷныӷаӷмың. Та̄м икфиқыста̄ңа қусывыгңасқылъюңа. 8Пиңаюның кытўылъ Атаныӷмун юӷаӷақуңа иқитысқылъюку. 9Иўырңа пӣңа: «Каюсилъқа на̄ма̄қ лъпынун сюфлъюҳтысқылъюку та̄на икфиқылъық қаюҳлъяк аҳтуӷьяҳқа̄нӷилъқа икнақылъыҳпига̄гўақуқ кая̄лъиқныҳпыни». Ынка̄м қуякусиқлъюку қука̄юхтақуңа кая̄лъиқусимның хўаңамнитысқылъюку Христосым аҳтуӷьяҳқа̄нӷилъҳа. 10Та̄на апалъюқлъюку қуя̄қуңа кая̄лъиқңанымни, сыӷлықӯлъыңнымни, пияқлъӣнымни, амью̄ткылъыңнымни, алъя̄ҳӣнаӷмыңлъю сыӷлылӣнымни Христос апалъюқлъюку. Қаюҳлъяк кая̄лъиқңанымни та̄ўа икнақақуңа.

Павелым Сюмыӷьялиткыхкаңи Коринфыӷмӣт Ухпықӣт

11Акузиңӯңа тымңитхўастун, иўырңа лъпыси таўатын пистаҳпысиңа. Лъпыси пинитун акузиткысяҳқақсяӷаҳпысиңа иляхпысинун. Қайўа сясӣнӷитыӷңа̄ӷма, тама̄кут «а̄ңўа̄ӷыт апостолыт» а̄ңўа̄ӷунӷитут хўаңамның. 12Лъпысинилъюңа ныкыхлъюўа̄н угля̄пихлъыӷӣт алъя̄ҳӣна̄т алъя̄ҳлъюхўаҳтилъҳыт пикақанка. Тама̄кут ипапиҳқа̄тңа апостолыпӣгутка. 13Сякақсиңи ухпықат иляңитнилңӯт юӷаӷвигми лъпысинун пимаңилъкымның? Ата̄сиҳӣнақ алъяңӯқ, акилгуқумаңитамси. Сыӷывутаҳтыңъа анахсимакумси! 14Ля̄лиҳфикнақақамси пиңайӣткун, иўырңа уӷлыӷӣӷуткыстысюнӷитуңа лъпысинун. Лъпыси сюмыӷмикақамси, нака̄н сяӷьяси. Таӷнуҳақылӷӣстун аюқамси. Таӷнуҳа̄т афлъыңакияҳқа̄нӷитут аңаюқамыхның, иўырңа аңаюқат афлъыңаксяҳқақӣт таӷнуҳатың. 15Тӯньяҳқа̄ҳтамси сямың тамаҳа̄ның хўаңа пимның, талўа хўаңамның тӯнылъықуңа лъпысинун. Пиниқатаӷанымси, лъяңақа лъпыси пиниқыпагигатаҳпысиңа.

16Лъпысилъю, хўаңалъю лӣсимакаҳпут уӷлыӷӣҳтысимаңитамси. Иўырңа иляхпыси анахусиманӣтңа. Пӣқут пӯҳнилюси иқлъыңиқылъымкун. 17Натын таўатын пистымси? Сякыңыхка̄зиңа лъпысиның каяхтақңамки югыт лъпысинун? 18Каяхтыкақақа Тит лъпысинун писқылъюку, ухпықа̄лгутфутлъю малигутысқақа. Титым пӯҳсимисӣ? Нака̄, Титымлъю, хўаңалъю қыпҳақаҳпут ата̄сӣгуқ, ата̄сикун таӷныӷакун.

19Сюмыҳпысинӣи лъпысинун ипапиҳқынъақуткыстыху анахусиманилютуң? Нака̄! Кияӷныӷым нагақӯманӷани, акузӣқукут Христосым акузисқылъҳатун. Пиниқыхкамни, сяңўа̄ қамахлъюку пӣқаҳпут икнақуҳсяӷналюку ухпылъыҳси. 20Сюмыӷьялиткақамси лъпысинун ка̄скума ысҳақумси алъякнаюкамси хўаңа сиӷимакылъымның. Лъпысилъю хўаңа ысҳақуфсиңа алъякнаюкафсиңа сиӷимакылъыҳпысиның. Сюмыӷьялиткақамси аӷиватңунаюкафси, ақинакутңунаюкафси, сякша̄тутңунаюкафси, лъңина̄югутңунаюкафси, сыӷлықӯӷутңунаюкафси, йӣлъхитңунаюкафси, қука̄югутңунаюкафси, сю̄хлъиқутңунаюкафси. 21Сюмыӷьялӣқуңа алъя такукумси Кияӷныӷма кайңуся̄кнаюкаңаңа сивухпысини апалъюқлъюки сыӷлыҳқылъыси. Ынка̄м қивӷуҳлъяхлъықуңа қаюҳлъяк углялӷӣни лъпыси сыӷлыҳқумаңина̄гуси авутыҳқыхпынаси. Паниның сюмыҳтаӷаӷақуси нечистотамың пылюңинъыӷилңуӷмың, блуда атуқақаҳси, алңунасыӷат анагңалӷӣт нуқытусигатаси.

Currently Selected:

2е Коринфянам 12: ess2

Highlight

Compare

Copy