2е Коринфянам 11

Павелылъю, Апостолысиӷўа̄ӷытлъю

1Сиӷимакамси ныкыхмытутысқылъюңа акузикума тымңитхўалӷӣстун натыңӣҳақ. Ныкыхмытутықаҳтыңъа. 2Қуңьяӷақуңа Кияӷныӷым қуңьяқылъҳатун лъпыси, қаюҳлъяк тӯнума̄мси Христосымун. Пылюңилңуӷыстун угӣӷнақылӷӣстун а̄ңӷусима̄мси лъңанун, угикысқылъюку лъңина̄. 3Иўырңа алиңуткақамси аңуягым пӯҳнаюкаңиси, катам таўатын нымыӷьям пыҳқиниқуткылъюку пӯҳтылъҳатун Ева. Ынка̄м лъпыси пиниқнаниӷўа̄ӷнаюкафсигу Христос. 4Уңипақақңамтыки Пинилӷӣт Уңипат лъпысинун, ухпықыхкақаҳси Иисус, тугуклъиӷахсилъю Аглыӷналӷӣк Таӷныӷак. Иўырңа нагасюкыстаӷлюки аюқыхкақаси уңипақияҳтулӷӣт иляңаның Иисусымың. Тугуклъиӷиюхтусилъю иляңаның таӷныӷам, ухпықсюкақасилъю иляңи пинилӷӣт уңипат.

5Тама̄кут уңипақистыт апостолыңунилютың пӣқут. Сюмыӷмыхни а̄ңўа̄ӷунӣқут апостолыт. Иўырңа лӣсимаканка а̄ңўа̄ӷунӷитут хўаңамның. 6Акузилъхитыӷңа̄ӷма, лӣсимаҳлъяхтуңа. Угляӷңа̄н лӣгикыстақамси лӣсималъымның.

7Лъпысинун акилыҳтуҳсяқумаңитуңа уңипақақңамки Пинилӷӣт Уңипӣ Кияӷныӷым. Таўатын пика̄гуңа қусывыхлъюңа қӯлваӷналюси. Сыӷлыҳқысиңа̄а таўатын пилюңа? 8Ухпықат иляңитнилңӯт юӷаӷвигыт акилыҳтуқақа̄тңа лъпысинилъюңа. Ўаяқалъҳӯӷанка маниңитның каюсӣнъалюси. 9Лъпысинитақңама уӷлыӷӣҳтылъҳитамси каюсӣтысқылъюңа аклъюкыхкамның. Ухпықа̄лгутыт Македониямың тагиткақа̄тңа сямың тамаҳа̄ның аклъюкыхкамның. Ынка̄м а̄пфикылъҳитамси аклъюкыхкамның, а̄пфикна̄нӷитамси. 10Китум алңунак Ахаиями аӷулӣҳна̄нӷита̄ қука̄юхтылъқа та̄хкын. Таўатын пӣңа Христосым ипапиҳқылъҳакун хўаңамнилңуҳқун. 11Каютыңлъянӷитутымның лъпысинун, сюмыҳпысинӣи пиниқынӷинъилюси пӣқыстык хўаңамнун? Кияӷныӷым лӣсимака̄ пиниқилъқа лъпысинун.

12Та̄ўа иҳсякӣвикумаңинаӷнақамси манихпысиның. Таўатын пӣқуңа қука̄юхнанӣсқылъюки апостолысиӷўа̄ӷыт хўаңкутыстун қыпҳаӷнилӷӣт акилыҳтӯсяңунатың. 13Тама̄кут югыт апостолысиӷўа̄ӷӯт пӯҳтилӷӣт югның иқлъыңиқылъыӷмыхтыхун. Югнун сюмыҳтаӷа̄ткыстақут Христосымун апостолыпӣкнилютың. 14Та̄мыңхўақун. Талўа Туӷныӷақ алъяңуҳтақуқ лъңаның катам алӣӷьяҳқа̄люни кӯкхутңалӷӣтун яқулыхтун. 15Ынка̄м сяӷӣӷанӣтут Туӷныӷа̄м қыпҳаҳтыңи таўатын пикумың. Югнун сюмыҳтаӷа̄ткыстақут ылъқуӷутңалӷӣңунилютың қыпҳаҳтыңи Кияӷныӷым. Иўырңа кынлыми Кияӷныӷым аӷью̄ҳлъықӣ ылъқуӷутңалӷӣмың аӷью̄лъыӷмың анахутылъҳитнун.

Павелым Уңипақыхкаңи Икфиқылъыни

16Алъя пӣмси, китум алңунак сюмыҳтаӷа̄ткынӷилъиңа тымңитхўаңулюңа. Иўырңа таўатын сюмыҳтаӷа̄ткыңъукуфсиңа, тугуклъиқаҳтыңъа тымңитхўаңулюңа. Та̄хкын хўаңалъю қука̄юхтывлыӷаҳлъықуңа. 17Қука̄югуткылъқа хўаңамның Атаныӷмың пиңунӷитуқ. Итупилъ акузиңӯңа тымңи пилӷӣстун. 18Углялӷӣт ухпықа̄нӷилңуӷыстун қука̄юхтақут қыпҳақамыхның, ынка̄м хўаңалъю таўатын қука̄юхлъықуңа. 19Сюмыҳпысини пыҳқиныпихнилюси пӣқуси. Ынка̄м қуякусиқлъюку нагатақаси тымңитхўалӷӣт. 20Тугуклъиӷақаси қылылъҳит никимқун лъпыси қыпҳаҳтыля̄ӷыт лъңитнун. Кагукақыстақуси, тыглыгвикыстақуси, укалиқыстақусилъю, талўа хинаҳпысигун қасяҳтыстақлъюси. 21Кайңуюхтуңа кая̄тыпихтукут таўатын пилъыҳқамнъың лъпысинун тама̄кустун апостолсиӷўа̄ӷыстун.

Кина алңунак қука̄юхсяҳқа̄кан, хўаңалъю қука̄юхлъықуңа. Иўырңа таўатын пилъыҳқақ тымңитхўаңӯқ. 22Та̄кут апостолсиӷўа̄ӷыт, Еврейеңўа̄т? Хўаңалъю Еврейеңӯңа. Израилыӷмӣңўа̄т? Хўаңалъю Израилыӷмӣңӯңа. Авраамым киңунқакӣ? Хўаңалъю киңунқа̄ңа. 23Христосым қыпҳаҳтыкакӣ? Иўырңа хўаңа пиниӷатаӷаҳтуңа қыпҳаҳта лъңитның. Та̄ўа акузӣңа налъыкаӷнилңуӷыстун. Қыпҳаӷатаӷақа̄гуңа лъңитның, анусимиңляӷвигмыта̄ӷақа̄гуңалъю лъңитның. Кахсягмилъыңыхка̄гуңа кыстыка̄нӷилңуӷмың, угляӷңа̄н туқувзиӷа̄тақа̄гуңа. 24Талъимагьягның Иудеит иглыӷутистыңита кахсягмихтыста̄таӷа̄тңа. (Ю̄к ма̄лӷук қуля стаманың иңлюлык сӣпнықлъюкуңўа̄қут ата̄сит кахсягмилъҳыт.) 25Римыӷмӣт умӣлўа̄ӷита пиңаюның анагулыҳтыстыкақа̄тңа. Ата̄симың иляңита югыт милюҳпага̄таӷа̄тңа. Пиңаюның аңьяӷиӷутутақа̄ңа ынка̄м ата̄симың унулъқусиқ, аӷнылъқусиқ ӯҳуткақа̄ңа кылъӣни. 26Угля̄пихлъыҳӣми иглыӷалъымни ынңа̄талъ якуӷнӣҳтуңа кӣгўигни, ўаяӷнӣҳтының, талўа юлгутымныңлъю, язычнигныңлъю. Якуӷнӣҳтуңалъю ныҳлъягни, килга̄ни, кылъӣнилъю. Талўа якуӷнӣҳтуңа ухпықа̄лгутысиӷўа̄ӷның. 27Уӷлыӷӣҳлъяка̄гуңа, пияқлъӣӷақлъюңа. Иляңани қаваҳпынаңа, игатаӷңа̄ӷмалъю, мықсюгңа̄ӷмалъю. Аўын нықңитақлъюңа, азигутӣтақлъюңа, ҳӯтақлъюңалъю а̄ткӣтым. 28Тама̄кут ся̄ӷўитхун, аҳутаңа тамаҳа̄н сюмыӷьялиткыхкақанка ухпықа̄лгутыт тамаҳӣтни юӷаӷвигни. 29Ухпықа̄лгутым ухпықилъҳа кая̄нъыӷани, хўаңалъю кая̄тақуңа. Ухпықа̄лгута китум сыӷлыҳқысныӷагу, сякшитақуңа.

30Қука̄юхнақңукума, қука̄юхлъықуңа кая̄лъиқусимның. 31Кияӷныӷым лӣсимака̄ңа иқлъыңиқна̄нӷитуңа. Лъңа Атака̄ Атанӷым Иисусым, усюқсяҳқақ қӯнпырухлъяк. 32Дамаскымылъюңа, правителым тугустысюкақа̄ңа. (Умӣлгым Аретам правителыңуҳтыстыкам.) Ынка̄м тугусқылъюңа пилъюўаҳтыни кылыңакистыкақӣ ныҳлъягым амихлъягитни. 33Иўырңа илякумта̄ӷма укихтыкақа̄тңа корзинагныкун миңлъютым қыргысыхкынкун ынка̄м анака̄гуңа правителымың.

Currently Selected:

2е Коринфянам 11: ess2

Highlight

Compare

Copy