2е Коринфянам 1

1Укут посланият Павелымың пиңӯт, апостолаңаның Христос Иисусым Кияӷныӷым пиюкылъҳакун, Тимофейемыңлъю пиңӯт ухпықа̄лгутымнъың.

Кияӷныӷым югитнун қырңуӷуткаюгнун юӷаӷвигани Коринфым, тамаҳӣтнунлъю Кияӷныӷым югитнун ӣңунаҳа̄ни Ахаиям.

2Йықай Кияӷныӷым Атамта, Атанымталъю Иисус Христосым тӯнлиси қуястылъыӷмыңлъю, ныкыхмылъыӷмыңлъю.

Павел Игамсиқаюлӷӣ Кияӷныӷмун

3Усюқылътыху Кияӷнық Атаңа Атанымта Иисус Христосым, наңлъыхтапихлъыҳӣ Ата, Кияӷныӷмың тагӣқуқ қамахлъюни каюткаҳқақ! 4Каюсиӷақӣлъю қамахлъюта сыӷлылӣлъымнъи, ынка̄м хўаңкуталъю каюсиӷьяқлъыгўа̄пут тама̄кут алъя̄ҳӣнаӷмың сыӷлылӣлӷӣт, атуқлъюку ата̄сиқ та̄на каюсилъық алъхыҳтыкаҳпут Кияӷныӷмың. 5Катам илятңалъымтыстун Христосым угля̄пихлъыҳӣнун икфиқылъҳанун, ынка̄м Христосыкун илятңалъықукут Кияӷныӷым каюсилъыҳлъяганун. 6Икфиқыхкумта каюсилъыҳпысинунлъю, югулилъыҳпысинунлъю пилъҳӯқ; каюсилъыңыхкумта та̄ўа лъпысилъю каюсилъыңылъықуси ынка̄м тӯнылъыңылъықуси ныкыхмылъылиӷлюси сюфлъюҳсяҳқа̄люки тама̄кут ата̄сит икфиқылъҳыт сюфлъюҳтыкапут. 7Ынка̄м сиӷимакилъыҳпут лъпысинун аӷулӣтуқ; лӣсимакаҳпут та̄на катам илятңалъыҳпысигун икфиқылъымнъун, лъпысилъю илятңа̄си каюсилъыӷмун алъхыҳтыкамнъун.

8Ухпықа̄лгутымнъи, налъюкысюнӷитамси сыӷлылӣлъыӷмың нанӷӣқамнъың Асиями. Ынңа̄талъ сыӷлыҳлъягӯқ уқихтупихтыка̄гуқ, рыпалъ сиӷимананиқа̄гукут кияҳтылъыҳқамнъың. 9Ипапыста̄қ туқунақнилюта пияҳтукут. Иўырңа таўатын аныҳтукут хўаңкунъың сиӷимакыфқа̄мта писқылъюта, та̄ўаңинаҳақ Кияӷнық сиӷимакысқылъюку уңуваҳтыстикаюк туқуканың. 10Ынңа̄талъ сыӷлыпыста̄ӷмың туқум тывныӷаның югулӣлъи, югулилъықӣсилъю. Ынка̄м лъңакун сиӷимаңӯкут лъңан югулилъя̄таҳлъықӣлъю, 11лъпыси каюсӣсималюта юӷалъыҳпысигун. Юӷа̄ткилъыҳлъяхси хўаңкунъың кӣмсилъыңылъықут, ынка̄м Кияӷныӷым қуяслъықӣлъю; угляпихлъыҳӣтлъю игляхтуҳлъютың игамсиқаюгвикылъықа̄т хўаңкунъың.

Павелым Алъяңуҳтыкаңа Қакиқниқылъыни

12Уна ысҳа қука̄югусиҳпут, сюмыҳтаӷалъымта уңипа̄тӣлъю кияҳта̄лъыҳпут хўани нунами ипапиҳқыңъа̄қлъю, пиниқиңа̄қлъю, кияң лъпысинун. Таўатын пӣқукут Кияӷныӷым пиниқиңалӷӣкун каюсилъҳакун, нака̄н югым пыҳқинылъҳакун. 13Қамахлъютың посланияпут лъпысинун пияқнӣтут атиҳтуӷьяҳқа̄лютыңлъю, лӣгиксяҳқа̄лютыңлъю. Сиӷимакақамси лӣгикңўа̄ӷысқылъюку 14сяңўа̄ ма̄тын лӣгикыхкаҳпыси налиӷныҳӣна̄, ынка̄м Аӷныӷани Атанӷым Иисусым лъпыси қука̄югуткылъықаҳпысикут катам хўаңкута қука̄югуткылъымтыстун лъпыси.

15Қаюҳлъяк ипапиҳқуткыхкақақа қамахлъюку тама̄на, сивуклъюңа лъпысинун ля̄лиҳналюңа пика̄яҳтуңа, қуястылъыңнаюкафси малӷуҳқыңъа̄н. 16Ля̄лиҳфиксюкақамси агля̄ткылъюку Македониямун, утыӷнӣткылъюкулъю тама̄кын, каютыңналюңа лъпысиның иглыӷалъыҳқамнун Иудеямун. 17Сюмыҳпысинӣ таўатын қакиқниқылъымни ата̄сӣӷныӷисиңа̄? Сюмыҳпысинӣ қакиқниқылъқа нунам югатун аюқа̄, таўаниңинақ пияҳқақ: «А̄а», «Нака̄»? 18Ипапыста̄қ Кияӷнық ата̄сӣӷмытуқ, акықусяқа лъпысинун «А̄ңӷунӷитуқлъю», «Нака̄ңунӷитуқлъю». 19Кияӷныӷым Иӷныӷа, Иисус Христос уңипақыхкаҳпут лъпысинун Силуанамлъю, Тимофеймлъю, хўаңалъю: «А̄ңӷунӷитуқлъю», «Нака̄ӷунӷитуқлъю»; иўырңа лъңани қӯнпың «А̄ңӷӯқ». 20Лъңаңӯқ «Аңылъық» тамаҳӣтнун Кияӷныӷым акықусӣтнун. Тама̄кын апалъюқлъюку хўаңкута «Аминақукут» лъңакун усюқнымтыху Кияӷнық. 21Кияӷныӷым айыпсюгиҳсяӷӣлъю, малигулъюта лъпысинун Христосыкун; Кияӷныӷым лъңан катам а̄фтӣлъю; 22налъюнӣӷӣлъю лъңанун пиңулюта, тӯна̄клъю Таӷныӷагни илюмнъун налъяңӣся̄люкык тамаҳа̄нун акықусяқыхкаминун хўаңкунъун.

23Туқлъюӷақа Кияӷнық лӣсимакистыңулюку қаюҳлъяк лӣсимакыхкаңа қа̄мна илюка! Коринфысюгунӷитуңа сыӷлылӣҳқыснаюкамси. 24Иглыӷунъақуткыңъунӷитаҳпут ухпықилъыҳси; қыпҳалгусиӷьюгамси қуямасқылъюси, қаюҳлъяк аӷулӣтуси ухпықилъыҳпысигун.

Currently Selected:

2е Коринфянам 1: ess2

Highlight

Compare

Copy