1е Коринфянам 16

Мани Тӯньяҳқақ Ухпықанун Иудеямылңуӷнун

1Укут ысҳа лъпысинун қылӷусянка манимың тӯньяҳқаҳпысиның ухпықанун Иудеямылңуӷнун. Уңипа̄тылъымтун Галатияӷмӣт ухпықӣт, лъпысилъю лъңистун пикатык. 2Сивулиҳпигаӷми Сянтилъҳым аӷныӷани қамахлъюси а̄фтӣқитык манимың алъхыӷныҳпысиның. Тӯньяҳқаҳпыси аңталяңа алъхыӷныҳпыси аңталяңаның ӣклъюку тӯньяҳқа̄гуқ. Ынка̄м лъпысинун пикума қырңуҳтифқа̄фси манимың пилӷа̄си. 3Ка̄скума каяхлъықанка тама̄кут накмикыхкаси посланиятхун агля̄тысқылъюку тунусяҳси Иерусалимымун. 4Сюмыҳтаӷалъымни хўаңалъю пилъыҳқақа пиниӷьяҳқа̄кан, малихнакаңатңа.

Павел Ля̄лиҳсюлӷӣ Коринфымун

5Лъпысинун ля̄лиҳнақыхкума сивуклъюңа Македониякун а̄хлъықуңа. 6Ынтақун лъпысинитаӷақаҳлъықуңа ўалъю̄млъю уксюлъқусиқ. Та̄хкын навык пинақыхкума ята̄ҳқылгусиқаӷнакыфсиңа. 7Атанӷым пиюкылъқыхкагу ма̄тын пикума лъпысинитаӷаӷьюгақуңа, а̄ӷвикаӷыснаӷьюнӷитамси.

8Иўырңа Ефесымылъықуңа кынляңа Пятидесятницам аӷныӷанун, 9қаюҳлъяк мыгнуналӷӣ, а̄нылӷӣ қыпҳалъыҳқақа Атаныӷмун пӣқыфтуқ. Ма̄нлъықуңа қайўа угляпихлъыҳӣм аңуяксяӷңа̄тңа.

10Тимофей лъпысинун пикан, ынңа̄талъ упуӷанъакыси, қаюҳлъяк қыпҳа̄гуқ Атаныӷмун хўаңамтун. 11Қамахлъюси аситңина̄ҳпына̄н, ынка̄м қуяңа̄н каяхнакыси хўаңамнун. Утақа̄қақа малигулъюку ухпықа̄лгутнун.

12Уңипа̄таҳлъямси ухпықа̄лгутымнъың Аполлосымың. Ынңа̄талъ қылъқақсяӷақа ля̄лиҳфикысқылъюси малихлъюки иляңи ухпықа̄лгутыт. Иўырңа ма̄тын пиюнӷитуқ. Ля̄лиҳфикна̄ӷӣси пилъыҳқаңыхкуми.

13Кылыңатык, ухпықилъыҳпысини аӷулӣтык, илютутык, икнақитык. 14Пиниқылъыҳқун пӣқитыху сяңўа̄ тамаҳа̄н.

15Ухпықа̄лгутымни, лӣсимакаси Стефановолъю ныңлъюгуткулъҳӣт, ухпықақсюхўа̄ӷулӷӣт Ахаиями. Атаныӷмун тӯныхка̄гут лъңит, ухпықат иляңи каюсӣнъалюки. 16Қылӷамси қа̄ткумаңинӣсқылъюки лӣлиҳтулъҳит таўатылңӯт югыт, иляңилъю қыпҳалгутаңит.

17Қуя̄ңа Стефанамыңлъю, Фортунамыңлъю, Ахаикамыңлъю ка̄лъҳӣт қаюҳлъяк каюсӣтңўа̄тңа авӣлъыҳпысини. 18Қуястыңъўа̄тңа қуястылъыӷмыгыстун лъпыси. Каюсӣтилъҳитнун игамсиқаюгвикылъыҳпысиның лӣсимакыстыңъўа̄ӷнакыси.

19Ухпықат Асиямылңӯт сю̄мқақӣсиңуқ. Акиламлъю, Прискилламлъю сю̄мқыҳлъягӣсиңуқ Атаныҳқун, қамахлъютыңлъю ухпықат қырңуӷуткаюгның ылъкыхкынка мыңтыӷӣтни. 20Қамахлъютың ухпықа̄лгутыт хўаңамнилңӯт сю̄мқақӣсиңуқ. Қуякутақитык на̄ӷлюки Кияӷныӷым пиниқылъҳакун.

21Хўаңа катам ӣхымның уна игақақа: Сю̄мқамси. Павел.

22Китум алңунак пиниқынӷилъкумигу Атанық, на̄фқылъылгӯқ. «Маранафа», хўатын писӣгуқ, Атаныҳпут, таги!

23Наңлъыхталъҳа Атанӷым Иисусым лъпысинилъи.

24Пиниқамси қамахлъюси Христос Иисусыкун. Аминь.

Currently Selected:

1е Коринфянам 16: ess2

Highlight

Compare

Copy