1е Тимофею 4

Иқлъыңалӷӣт Апыҳтуӷистыт

1Аглыӷналӷӣк Таӷныӷак хўатыҳлъюўа̄қ пӣк киңулиӷни аӷныӷни иляңита югыт пыхлъықа̄т ухпықилъыҳтың Христосыкун. Таўатын пилъықут қаюҳлъяк қа̄ткылъықыхкаңит иқлъыңалӷӣт туӷныӷа̄т, апыҳтӯсӣтлъю. 2Таўатылңӯт апыҳтӯсят иқлъыңалӷӣның пиңӯт. Иқлъыңиқылъытың а̄пҳақӣт ипапихсюгниҳқылъюки. Наганъаниқақӣт умьюгатың лӣсимакилӷӣт ылъқуӷутңалъыӷмыңлъю, анахутңалъыӷмыңлъю. 3Таўатылңӯт югыт ныңуӷутыснаниӷӣқут, иляңилъю нықым ныӷыснаниӷақӣт. Иўырңа Кияӷныӷым улима̄қӣ қамахлъюки нықыт ныӷьяҳқа̄люки игамсиқаягутақлъюки. Ухпықат лӣсимакилӷӣт ипапилъыӷмың лӣсимакӣт тама̄кут. 4Кияӷныӷым улима̄ӷи қамахлъютың пинилӷӣңӯт. Ынка̄м иҳсяксяҳқа̄нӷитут тугуклъӣмакумың игамсиқаягулъюки. 5Акузитаңакун Кияӷныӷым, юӷакунлъю а̄фтыка̄гут аглыӷнаӷлюки.

Пинилӷӣ Қыпҳаҳтыңа Христос Иисусым

6Тама̄кут апыҳтӯсят лӣгикыстыңъўа̄қуфки ухпықа̄лгутыхпынун, пинилӷӣңулъықутын қыпҳаҳтыңа Христос Иисусым. Ухпықилъҳын икнақуҳлъықа̄ лӣсимаңинақуфки ипапилъҳыт ухпықат ухпықақыхкаңит, пинилӷӣтлъю апыҳтӯсят қа̄ткыхкаҳтын. 7Нагатыхпынаки сясӣнӷилңӯт уңипаӷа̄тыт тыңвимун аюқылӷӣт Кияӷныӷым ипапилъҳанун. Йыӷлыги пыҳқихся̄ткигу Кияӷныӷмун аюқылӷӣ кияҳта̄лъық. 8Югусим уляпылъҳа пиниҳтуқ, иўырңа кияҳтылъыҳпут Кияӷныӷым пиюкылъҳатун аюқылӷӣ пиниӷатаӷаҳтуқ. Каюсӣсяҳқақӣлъю хўани уңувалъымнъи, тӯңлиҳа̄нилъю уңувалъҳым. 9Та̄на пилъық ипаңӯқ, ынка̄м қамахтыңъўа̄ӷлюни ухпықсяҳқа̄гуқ. 10Тама̄кын апалъюқлъюку қыпҳаҳлъягӯкутлъю, сягиқлъӣҳтыңъӯкутлъю югнун ухпықысқылъюку ипапилъық. Таўатын пӣкут қаюҳлъяк ныӷьюкаҳпут уңувалӷӣ Кияӷнық, Югулиӷистыңат қамахлъютың югыт, кияң тама̄кут ухпылӷӣт лъңакун.

11Қылыҳқи апыҳтуҳқи тама̄кын. 12Китумун алңунак паляқыстыхпына̄н аңлинҳа̄малъҳын. Иўырңа ухпықанун успута̄ўи акузилъыҳпыгун, сялъыҳпыгун, пиниқылъыҳпыгун, ухпықилъыҳпыгун, пылюңилъютын кияҳтылъыҳпыгун. 13Ка̄тылъымнун кынляңа, ухпықат қырңуӷунъыӷата атиҳтӯтақики Акузитның Игақыхканың, уңипақитақики, апыҳтуӷақики. 14Атуқақигу таӷныӷагныкун тунусяқ илюхпынилңуқ. Та̄на тунусяқ тӯныхка̄гуқ лъпынун ӯкналиқылъыҳқун Пресвитерыт ӣхтиӷақңатын. 15Пинақылъҳын қамахлъюку пӣқики қылӷутканка. Таўатын югыт лӣлъықа̄т пилъхӯҳлъыҳӣтын. 16Пира̄мсиңўа̄ӷлютын кияҳта̄лъыҳпынилъю, апыҳтуӷилъыҳпынилъю. Таўатын пикувык лъпынун югулилъықутын, тама̄кутлъю нагатыстытын.

Currently Selected:

1е Тимофею 4: ess2

Highlight

Compare

Copy