1е Тимофею 3
3
Иглыӷутистыңит Ухпықат
1Хўатын пилъық ипаңӯқ: Кина алңунак иглыӷутистыңуюкуми ухпықанун та̄на қыпҳақақ пиюкыхка̄ пинӣпихтуқ. 2Иглыӷутиста авутңисяҳқа̄гуқ, ата̄симың нулӣлгуяҳқа̄гуқ, нуқынъыҳтуяҳқа̄гуқ, сюмыҳтаӷақыхсяҳқа̄гуқ, юпӣнӷуяҳқа̄гуқ, упуӷанӷуяҳқа̄гуқ, апыҳтуӷияқлъыгӯқлъю. 3Сю̄мыстыңуяҳқа̄нӷитуқ, сю̄хлъюгуяҳқа̄нӷитуқ иўырңа наңлъыҳтаӷьяҳқа̄гуқ, қаныңнақигасяҳқа̄гуқ, маниюныҳтуяҳқа̄нӷитуқ. 4Иглыӷутистым иглыӷутңўа̄ӷьяҳқақӣ мыңтыӷаӷмӣни, авақутанилъю апыҳтуӷьяҳқақӣ выӷусна̄тыфқа̄ми қа̄ткысқылъюни. 5Иглыӷутиста иглыӷутилъхискуми лъми катам ныңлъюгутминың, натынңам афлъыңакылъықаки ухпықистыңи Кияӷныӷым? 6Иглыӷутиста ухпынҳа̄нӷисяҳқа̄гуқ, лю̄рақ қука̄юхтыпагнаюкан ынка̄м нанқихтылъыңылъықуқ аӷью̄ӷьяҳқа̄люни Туӷныӷаҳтун. 7Иглыӷутиста пинитун кияҳсяҳқа̄гуқ ухпықа̄нӷилңуӷнун акузиткысқылъюку итагнаӷлюку. Ынка̄м сыӷлықӯҳпагниңилъықа̄т, Туӷныӷа̄млъю кая̄лъқыпагниңилъықа̄.
Диаконыт Каюткӣт Ухпықат
8Таўатыҳпигақ Диаконытлъю пиниӷлюки акузиткысяҳқа̄гут, ипапиҳқыңъаяҳқа̄гут, виномың мыӷыпагьяҳқа̄нӷитут, пакигныӷуяҳқа̄нӷитутлъю манимың. 9Пыхсяҳқақынӷитӣт апыҳтӯсят Кияӷныӷым қайвиҳқыхкӣ, умьюгӣтлъю сыӷлыӷьюгисяҳқа̄гут. 10Иглыӷутистыт накмӣӷвагилгамың диаконкаҳқамың қыпҳақалилъюки лӣгикнакаңит пинӣтаңи югыт. Та̄хкын диаконыңуҳтыснакаңит. 11Таўатыҳпигақ аӷнатлъю пиниӷлюки акузиткысяҳқа̄гут, йӣлъхияҳқа̄нӷитут, иўырңа нуқынъыҳтуяҳқа̄гут, ата̄сӣӷмысяҳқа̄гутлъю сякун тамаҳа̄кун. 12Диаконыт ата̄симың нулӣлгуяҳқа̄гут, иглыӷутңўа̄ӷьяҳқақӣт авақутатыңлъю, мыңтыӷаӷмӣтыңлъю. 13Тама̄кут диаконыт қыпҳақыхтат қӯлвалъыңьяҳқа̄гут, налъюнықсюкна̄нӷита̄тлъю ухпықилъыҳтың Христос Иисусыкун.
Натын Ухпықат Кияҳтылъыҳқӣт
14Сюнаңуқ қантаӷақун лъпынун пиляңа, иўырңа ма̄тын лъпынун письмотканка тама̄кут апыҳтӯсят. 15Ынка̄м кима̄ўимакума посланияма лӣсимакыслъықа̄тын натын ухпықат кияҳсяҳқа̄таңи Кияӷныӷым ныңлъюгутаңанилңӯт. Лъңитңут ухпықистыңи уңувалӷӣм Кияӷныӷым, аӷвыӷақыта̄гут, тумыңутлъю ипапилъыӷмун. 16Налъюнықнаҳаңунаки ухпықапут апыҳтӯсят Кияӷныӷым қайвиҳтыкӣ сыӷлыҳлъягӯтлъю, ипапыста̄ӷӯтлъю:
Христос алъхықа̄гуқ югусипигулюни,
Кияӷныӷым Таӷныӷахкынка лӣсимакыстӣ тама̄кут лъңан пикӣ ылъқуӷутңатаңи,
яқулгытлъю ысҳақақа̄т.
Уңипақыхка̄гуқ нунатаҳа̄ни тамаҳа̄ни,
ухпықыхкақа̄т нунатаҳа̄ни тамаҳа̄ни,
та̄хкын қилягмун маю̄ткагуқ.
Currently Selected:
1е Тимофею 3: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
