1е Петра 4

Кияҳтык Кияӷныӷмун

1Икфиқыхка̄таңаның Христос югусимикун лъпысилъю ята̄ҳқитык икфиқсяҳқа̄люси Христосытун, қаюҳлъяк кина алңунак югусимикун икфиқылӷӣ сыӷлыҳқысюгнанӣма̄қ. 2Ынка̄м хўакын кынлыклъюку уңувалъыҳпыси тахталңатун малиҳқутақыхпынаси югусиҳпыси пиюкылъҳанун, иўырңа атуқитыху Кияӷныӷым пиюкылъҳа. 3Сивунӷани сыӷлытун кияҳтылъқинаҳтуси қа̄ткусигалңуӷыстун Кияӷныӷмун. Хўатын пика̄гуси: сыӷлыӷнапихлъюку атуқуткаюгуяҳтуси, қилӣқутақлъюси, сю̄мӯтақлъюси, қырңуӷутулъюси угляпыста̄ӷыт сыӷлыӷыт атуқақлъюки, нықынӷаҳқылъюси, мыӷӯтыҳлъяглюси ынка̄м алңунасыӷаҳлъягуҳтақуси, манигуқақасилъю ӣнӷуткат кияӷныңлъяқат. 4Кияҳнанилӷӣси ухпықа̄нӷилңуӷыстун, лӣгикигата̄т сяңан илянъанӣӷыстык сыӷлытун кияҳта̄лъыӷмыхнун, ынка̄м сыӷлықӯӷақӣси. 5Иўырңа сялъытың лъңитның катам апыӷьяҳқақӣт Кияӷныӷмун, нанқихтияқлъыхӣнаӷмун уңувалӷӣныңлъю, туқуканыңлъю. 6Тама̄кын апалъюқлъюку Пинилӷӣт Уңипат уңипақыхка̄гут талўа туқуканун. Тама̄кут нанқихтыка̄гут уңуваңулютың нунами хўани. Иўырңа Пинилӷӣт Уңипат уңипақыхка̄гут лъңитнун, ынка̄м таӷныӷӣт кияҳсяҳқа̄ҳлъықут катам Кияӷныӷым кияҳтылъҳатун.

Кияӷныӷым Тунусӣ

7Сяңўа̄ қамахлъюни кынлытҳӯсяҳтуҳтуқ. Тама̄кын апалъюқлъюку хўатыҳлъюўа̄ӷулюки умьюгаси, нуқынъыҳтулюси юӷаӷьяҳқа̄люси юӷалъыҳқаҳпысистун. 8Мыгнуналъыҳпига̄гуқ уна: пиниқутыпӣглюси қаюҳлъяк пиниқылъҳым сыӷывутыстақӣ сыӷлыҳқылъылӷутыҳлъягыт. 9Упуӷанӷулюси қикыҳқуфқа̄фси. 10Тамаҳаҳпыси алъхыӷутка̄гуси тунусяның атуҳқамың иляхпысинун. Алъя̄ҳӣна̄т тунусят Кияӷныӷмың писи атуқақитыки пинитун. 11Тунусялгыт акузимун акузилит Кияӷныӷым акузитаңаның. Тунусялгыт қыпҳга̄тимун қыпҳга̄тилит икнақылъылиӷлютың Кияӷныӷым тӯныхка̄ның. Ынка̄м сялъыҳпысигун тамаҳа̄кун Кияӷнық усюқылъыңылъықуқ Иисус Христосыкун. Лъңан пика̄т ниӷуҳқылъықлъю, аҳтуӷьяҳқа̄нӷилъықлъю қӯнпырухлъяк кынлыңуна̄н. Аминь.

Ухпықат Икфиқылъҳат

12Пиниқыхкамни илякумта̄мни, қӯвьюхпынаси сыӷлылӣӷрукута̄ҳлъягыт ка̄скаңиси нанӷӣҳсяӷаӷналюси. Нанӷӣҳсяӷалъыси алъяка̄ягунӷитут. 13Итупилъ қуятык илялъҳӣси Христосым икфиқылъҳанун қуяңаҳлъягысқылъюси ниӷуҳқылъҳа алӣҳтыкан. 14Сыӷлықӯқаңиси апалъюқлъюку малихся̄ҳтыңумалъыҳси Христосымун, қуястылъылгӯси қаюҳлъяк Кияӷныӷым Таӷныӷакык ниӷуҳқыңъалӷӣк кияҳтыңӯқ лъпысини. 15Икфиқсяҳқа̄куфси, икфиқыхпынаси юхтаҳтыңулюси, тыглыгнӣҳтыңулюси, сыӷлытун пистыңулюси, налиӷмың янутқустыңулюси. 16Нақамынрақ икфиқсяҳқа̄куфси Христианиныңутыхпысиның, кайңуюхпынаси иўырңа усюқнакыси Кияӷнық атиқаңиси Христосым а̄тҳаның.

17Нанқихтилъыҳқақ ка̄туқ, сивуклъюни пӣнлиҳлъықуқ Кияӷныӷым ныңлъюгутаңакун. Пӣнлиӷнақңукан хўаңкутхун, сялъықанңам қа̄ткусигалңӯт Кияӷныӷым Пинилӷӣнун Уңипа̄нун? 18Акузитыт Игақыхкат пилъҳистун:

«Ылъқуӷутңалӷӣт пыгным югулика̄куйың,

авылӷасиңўа̄лӷӣт Кияӷныӷмың,

сыӷлыҳқыстытлъю натынңам югулилъыңылъықат?»

19Ынка̄ңам тама̄кут икфиқылӷӣт апалъюқлъюку Кияӷныӷым пиюкылъҳа, ылъқуӷулъютың пилъықут, ныӷьюкулъықӣтлъю уңуваситың ата̄сӣӷмылңуӷмун Улимаӷистымун.

Currently Selected:

1е Петра 4: ess2

Highlight

Compare

Copy