1е Петра 3

Нулиҳқулъҳӣтлъю, Угикулъҳӣтлъю

1Лъпыси угӣқани, кияҳтык қа̄ткулъюси угихпысинун. Иляңи нулӣлгыт ухпықиңигалңӯгут Кияӷныӷым акузитаңаның. Иўырңа таўатын кияҳтылъыҳпысигун ухпықа̄ҳнаюката сямың пинӷитыӷңа̄ҳпысики, 2қаюҳлъяк ысҳапакаңат пылюңитун кияҳта̄лъыҳси, аликилъыҳсилъю Кияӷныӷмун. 3Нуяқыхсялъҳым, улъңақылъҳым золотамың, а̄шалъҳым пиниӷнаҳсӣгатӣ илюси. 4Итупилъ пиниӷнаҳтык илюхпысигун қусывыхлъылиӷлюси, ныкыхмылъылиӷлюсилъю. Таўатылңуқ пиниӷналъық қӯнпыкаҳқа̄гуқ, мыгнунаҳлъяхтуқ Кияӷныӷмун. 5Сивунӷани агани, аӷнат манигӯткаюгыт Кияӷныӷмун пиниӷнаҳсяқаюгӯт илюмыхтыхун, қусывыхлъылиӷлютың, ныкыхмылъылиӷлютыңлъю. Ныӷьюкыхкақа̄т Кияӷнық, қа̄ткыхкақӣтлъю угитың. 6Сарра таўатытка̄гуқ! Қа̄ткыхкақа̄ Авраам, атанқынъикақа̄лъю. Ынка̄м лъпыси паникӣси пинитун пимакуфси, алиңигалъкуфсилъю сямың алңунак.

7Лъпысилъю нулиҳтуқани кияӷутыки нулӣси лӣгиклъюки натытуляңи қаюҳлъяк кая̄таӷаҳтут лъпысиның. Қӯлваӷлюки нулӣси қаюҳлъяк атуным алъхыҳсяҳқақаҳси Кияӷныӷым тунуся̄ кынлыңилңуқ уңувалъық. Таўатын пикуфси ся̄м алңунак пилъхилъиқна̄нӷитӣ юӷалъыси.

Икфиқылъық Пинитун Пилъыӷмун

8Та̄қмиӷнақанка сямың пилъҳынка хўатын: қамахлъюси ата̄систун сюмыӷнылгутык, ақниқутутык, пиниқутык аңлыгуткулъҳӣстун, наңлъыкутутык, қусывгутутык. 9Югыт сыӷлытун пикаңиси акитыхпынаки сыӷлытун, налиӷмың сыӷлықӯқаңиси акитыхпынаки сыӷлықӯӷмың. Итупилъ акитыки қуястылъыӷмың, қаюҳлъяк Кияӷныӷым накмикыхкақӣси таўатын писқылъюси лъпысинун алъхыҳтысқылъюку қуястилъыни. 10Акузитыт Игақыхкат пилъҳистун:

«Кина алңунак қуяңалӷӣмың уңувалъылгуюкуми,

қуямалӷӣныңлъю аӷнылгуюкуми,

сыӷлытун акузиныӷмың та̄қлъи, иқлъыңиқнаниӷлилъю.

11Сыӷлытун пинаниӷлюни, пинитун пили.

Ныкыхмынъақлъюнилъю кияҳлъи,

12қаюҳлъяк Атанӷым ысҳапаўӣ ылъқуӷутңалӷӣт,

нагатақӣлъю юӷалъҳит.

Иўырңа Атанӷым тыңвимун аюқӣ сыӷлытун пилӷӣт».

13Китумңам ақниҳлъықиси сягиқңукуфси пинитун пилъыӷмун? 14Иўырңа икфиқыӷңа̄ҳпыси пинитун пилъыӷмун қуястылъыңылъықуси. Аликыхпынаки югыт, талўа сюмыӷьялихпынаси. 15Иўырңа илюхпысигун манигуӷақитыху Христос Атанӷулюку. Китум алңунак а̄птыкаңиси сиӷималъыӷмың илюхпысинилңуӷмың қӯнпың лӣгикнатун кӣмсиӷьяқлъыхӣна̄ўақитыки. 16Иўырңа кӣмсиӷақитыки қусывыхлъылиӷлюси, сӣвакилъылиӷлюси. Сыӷлыҳқынӷилъкуфси умьюгаси сыӷлыӷнина̄нӷитут. Ынка̄м югыт сыӷлықӯқаңиси пинитун кияҳтылъыҳпысиның Христосыкун, кайңуюхлъықут таўатын акузилъыӷмыхның. 17Иўырңа Кияӷныӷым пиюкылъқыңъукагу икфиқысқылъюси пинитун пилъыӷмун, та̄на итагнаӷатаӷаҳтуқ икфиқылъыҳқаҳпысиның сыӷлытун пилъыӷмун. 18Христос туқука̄гуқ ата̄сиҳаӷмың апалъюқлъюки югыт сыӷлыҳқылъҳит. Сыӷлыҳқумаңитуқ, иўырңа туқуматкыхкақӣ сыӷлыҳқыстыт тагинъалюки Кияӷныӷмун. Югусӣ туқутка̄гуқ иўырңа таӷныӷакык уңуваҳтыка̄гук. 19Ынка̄м таӷныӷа̄люни уңипаӷьяҳтуқа̄гуқ таӷныӷанун анусимиңлъяӷвигмылңуӷнун. 20Та̄куңӯт қа̄ткусимаңилңӯт Кияӷныӷмун ныӷиӷлюку Ной кияҳтыңъулюку. Ной ковчегыңлъя̄люку Кияӷнық қыляныҳпынани утақӣка̄гуқ қа̄ткусимаңилңуӷнун авутыҳқысқылъюки. Пиңаюның иңлюлъхӣна̄т югыт итыӷлютың ковчегымун югулика̄гут мыҳқун. 21Та̄наңӯқ мық успутақ крестиӷылъыӷмун югулиӷилӷӣ лъпысиның ма̄тын уңуваҳтылъҳакун Иисус Христос. Крестиӷылъық иқаңӣсӣнӷитуқ югусимун. Итупилъ крестиӷылъыҳқун акықӣкут Кияӷныӷмун умьюгамнъың сыӷлыӷниңилңуӷмың. 22Иисус Христос қилягмун маюӷлюни аӷынқигныӷанитуқ Кияӷныӷым. Ынка̄м иглыӷутңўӣ қамахлъюки яқулгыт, қилягым иглыӷутистыңи, аҳтуӷьяҳқа̄нӷилъҳытлъю.

Currently Selected:

1е Петра 3: ess2

Highlight

Compare

Copy