1е Петра 5

Афлъыңакылъыҳқӣт Кияӷныӷым Юги

1Сямың пӣҳсюганка Пынъиниҳат юӷаӷвихпысинилңӯт. Хўаңалъю пынъиниҳагуңа, ысҳапакақыхкыхкалъю Христосым икфиқылъҳа, илясяҳқа̄гуңалъю Христосым а̄ңылъыҳлъяганун Кияӷныӷым алӣҳтыкагу. 2Ынка̄м қылыӷьюгамси Пынъиниҳатыни хўатын: Пынъӣӷнӣҳтыңутык Кияӷныӷым пынъӣӷитнун; ныӷьюкуткақӣ лъпысинун афлъыңакысқылъюки. Афлъыңакитыки қаюҳлъяк афлъыңаксюкыси, нака̄н қаюҳлъяк пияҳқа̄тыхпысиның. Кияӷныӷым таўатын писқысюгӣси. Афлъыңакитыки нака̄н акилыҳтӯсяңыпигыснаӷналюси, иўырңа қаюҳлъяк каюсиӷьюкыси. 3Агӷиткақыхпынаки афлъыңакыхкаси, иўырңа малихсюгнаҳқитык лъңитнун. 4Ынка̄м Иглыӷутистыңат Пынъӣӷнӣҳтыт тагикан алъхыӷулъықуси пиниӷнапихлъыҳӣмың қаҳпамың қылмыӷӣсяҳқа̄нӷилңуӷмың.

5Таўатыҳпигақ лъпыси уюқлъиӷни малиҳқутақлъюси сӣванлъыӷнун. Қамахлъюси қусывгутулъюси қаюҳлъяк Акузитыт Игақыхкат пика̄гут:

«Кияӷныӷым кипулъыгмун аюқӣ қука̄югныӷыт,

иўырңа каюсиӷақӣ қусывыгңалӷӣт».

6Ынка̄ңам лъпысиның катам қусывыгңатык Кияӷныӷмун аҳтуӷьяҳқа̄нӷитыҳлъягмун. Та̄хкын қӯлваҳлъықӣси накмикыхкамини аӷныӷми. 7Қамахлъюки сюмыӷьялиткыхкаси пыхтыки лъңанун, қаюҳлъяк афлъыңакңўӣси.

8Лӣсималюси, кылыңалюси. Аңуяхси Туӷныӷақ иглыӷаңӯқ угинилӷӣтун левытун, иваӷӣқуқ кина на̄фқынъалюку. 9Аяклъиҳтыху Туӷныӷақ айыпсюгилңуҳқун ухпықилъыҳпысигун, лӣсимаклъюки ухпықа̄лгутыси нунатаҳа̄нилңӯт таўатын лъңитлъю икфиқңӯт. 10Иўырңа натыңӣҳақ икфиқылъыҳпыси киңуңаның, Кияӷныӷым пиниқиңаҳлъягым тамаңанун, лъңан катам налъҳуся̄лъықӣси сямың тамаҳа̄ның. Ухпықилъыси икнақуҳсяҳлъықӣ, айыпсюгиҳсяҳлъықӣ, аӷулӣҳтыслъықӣ. Кияӷныӷым накмикыхкақӣси Христосыкун илятысқылъюси кынлыңилңуӷмун а̄ңылъыҳлъягминун. 11Қамахлъюку аҳтуӷьяҳқа̄нӷилъық лъңан пика̄ қӯнпырухлъяк! Аминь.

Петырым Та̄қнӣтаңи Акузитыт

12Сила ата̄сӣӷмылңӯгуқ ухпықа̄лгута; ига̄тақа̄ңа такыста̄ҳаҳтыхун посланиямкун лъпысинун. Посланиянка Кияӷныӷым пиниқылъыпӣганың аюқут. Уңипа̄тамсилъю, кайымамсилъю кияҳтыкыстӣсқылъюси пиниқылъҳани.

13Ухпықа̄лгутыси Вавилонымылңӯт, лъпысистун Кияӷныӷым накмикыхкақӣ. Лъңитлъю, иӷныӷмалъю Маркым пиниқӣсиңут. 14Қуякутақитык на̄лъыҳқун Христосым пиниқылъҳакун.

Ныкыхмылъық тамаҳаҳпысинилъи Христосым пилӣткӣтни.

Currently Selected:

1е Петра 5: ess2

Highlight

Compare

Copy