1е Петра 2
2
Атанық Уңувалӷӣңӯқ Уйӷак
1Ынка̄м та̄қитыху алъя̄ҳӣнақ сыӷлық атуқыхкаҳси. Иқлъыңиқнаниҳтык, пинӣюхнаниҳтык, ақинананиҳтык, сыӷлықӯӷунъаниҳтыклъю. 2Алъхынҳаҳа̄т қӯнпың мамаӷьюгақут. Лъңистун қӯнпың мамаӷьюхтык пылюңилңуӷмың таӷныӷам мама̄ның. Аңтанӣтыслъықа̄ югулилъыҳси, 3қаюҳлъяк на̄сӣӷаҳси Атанӷым наңлъыхталъҳа.
4Тагитык Атаныӷмун, лъңа уңувалӷӣңӯқ уйӷак. Югыт иҳсякыхка̄т сясӣнӷилңуӷыстун, иўырңа Кияӷныӷым накмикыхкақа̄ мыгнунаӷлюку. 5Лъпысилъю уңувалӷӣстун уйӷагыстун аюқуси, ынка̄м Аглыӷналӷӣм Таӷныӷам ныкыфтусиқлъиси Кияӷныӷым мыңтыӷа̄нун. Қыпҳа̄лъықаҳси а̄фтыка̄люси священнигыт тӯнилӷӣт аҳтутмың Кияӷныӷмун. Лъңан тугуклъиҳлъықӣ аҳтутыт Иисус Христосыкун. 6Игақыхка̄лӷӣ Акузитни Игақыхкани хўатын:
«Сиоными ныкыхтақақа мыгнуналӷӣ уйӷак;
каңиӷам уйӷака̄ накмикыхкақа̄.
Кина алңунак ухпықилӷӣ лъңаның кайңумиқна̄нӷитуқ».
7Та̄на уйӷак мыгнунапихтуқ лъпысинун ухпықилӷӣнун. Иўырңа ухпықиңигалңуӷнун хўатылңӯгуқ:
«Та̄на уйӷак мыңтыӷаңлъяҳтыт иҳсякыхка̄т,
каңиӷам уйӷака̄ҳсимакаңа».
8Амалъықа:
«Та̄м уйӷагым югыт на̄хтыстақӣ, иқустақӣлъю».
На̄хтақут қаюҳлъяк қа̄ткусигалңӯт Кияӷныӷым акузитаңанун. Таўатын Кияӷныӷым успықыхкақӣ.
9Иўырңа лъпыси югни накмикыхка̄гуси, умӣлгым священнигакӣси, а̄фтыка̄гуси югни, Кияӷныӷым лъңан катам юкӣси. Накмикыхка̄гуси а̄пҳысқылъюки алъя̄ҳлъюхўа̄т аныӷныҳқилъҳи Кияӷныӷым, тахсиӷикақ лъпысиның мамлыхлъягмың лъми катам алъя̄ҳлъюхўаӷмун ниӷугминун. 10Сивунӷани Кияӷныӷым юкынӷисяӷӣси, иўырңа ма̄тын юлӣсимӣси. Сивунӷани налъюксяӷаҳси Кияӷныӷым наңлъыхталъҳа, иўырңа ма̄тын алъхыҳсима̄ҳси наңлъыхталъҳа.
Кияӷныӷым Қыпҳаҳтыкӣси
11Илякумта̄мни, нуната̄гусилъю, алъяныҳта̄гусилъю нунами хўани. Ынка̄м кайымамси иляпхатыхпынаси югусиҳпыси пиюкылъҳанун, қаюҳлъяк югусим пиюкылъҳан пилъюўа̄ңўа̄ уңувасиҳси. 12Пинитун кияҳтык акулңитни ухпықа̄нӷилңӯт, лю̄рақ лъңита сыӷлытун пистыңунинаюкаңиси. Ысҳақумыхтыки аныӷныҳқилъыси усюқылъықа̄т Кияӷнық Аӷныӷани Христосым тагилъҳан.
13Атанық апалъюқлъюку малиҳқутақлъюси кияҳтык тамаҳӣтнун кавымым иглыӷутистыңитнун. Қа̄ткулъюси умӣлыгмун; лъңаңӯқ аңылъыҳпигақ иглыӷутиста. 14Қа̄ткылъюкилъю иглыӷутистыт; умӣлгым аӷью̄ӷияқлъыгуҳтыстақӣ сыӷлытун пистынун, усюқияқлъыӷуҳтыстыкақӣлъю пинитун пистынун. 15Кияӷныӷым Пиюкылъқақа пинитун пилъыҳпысигун ныпӣҳтысқылъюки налъю̄қат тымңитхўамың акузилъҳӣт. 16Кияҳтык итымңалӷӣстун иўырңа итымңалъыҳси атуқыфқа̄н сыӷлыӷмун. Кияҳтык қыпҳаҳтыля̄ӷулюси Кияӷныӷмун. 17Қӯлваӷлюку тамаҳа̄ ю̄к, пиниқлъюки ухпықа̄лгутыси, аликлъюку Кияӷнық, қӯлваӷлюкулъю умӣлык.
Христосым Икфиқылъҳа Успутақаҳпут
18Лъпыси қыпҳаҳтыля̄ӷни қа̄ткутык пилӣтыстыхпысинун сӣвакылъылиӷлюси. Қа̄ткыхпынаки наңлъыхтаҳӣна̄тлъю, умьюгақыхтаҳӣна̄тлъю, иўырңа қа̄ткақитыкилъю амьюқыталӷӣт. 19Кияӷныӷым ыфқуқақӣси сюмыӷмикныҳпысигу лъңа икфиқңулюси сямың сяпихлъыҳӣстун. 20Иўырңа сюфлъюҳсимакуфсики қывутқулъыси, сыӷлытун пилъыси апалъюқлъюки, китум алңунак усюқна̄нӷитӣси. Нақамынрақ сюфлъюҳсимакуфсигу икфиқылъық пинитун пилъыҳпысинун, та̄ўа Кияӷныӷым ыфқуқылъықӣси. 21Кияӷныӷым накмикыхкақӣси сюфлъюҳтысқылъюки икфиқылъҳыт қаюҳлъяк Христосым икфиқуткыхкақӣси. Икфиқылъҳа успута̄гуқ лъпысинун малихтысқылъюку. 22Лъңа сыӷлыҳқигатуқ, иқлъыңиқигатуқ. 23Сыӷлықӯлъыңақңами акисимаңитӣ. Икфиқақңами акықсяхсимаңитӣ. Итупилъ ныӷьюкутка̄гуқ лъңаның нанқихтикаюгмун ылъқуӷаҳлъюку. 24Христосым лъминың катам агля̄ткақӣ сыӷлыҳқылъыпут югусиӷмиклъюки қақӯрамун. Таўатын пика̄гуқ туқумасқылъюта сыӷлыҳқылъыӷмун уңувасқылъюта ылъқуӷутңалъыӷмун. Кӣтиқулъҳакун на̄лъҳутка̄гуси. 25Пынъӣӷыстун аӷуляқа̄талӷӣстун аюқсяҳтуси. Иўырңа ма̄тын утыӷнӣма̄си Пынъӣӷнӣҳтымун Кылыңакистыңанун уңувасиҳпыси.
Currently Selected:
1е Петра 2: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
