1е Коринфянам 9

Павел Лъминың Успутақылӷӣ

1Итымңа̄ңа, пиюкылъымтун пияҳқа̄гуңа. Апостолыңӯңа ысҳа̄ткақ Иисусымың Атанымнъың. Қыпҳа̄тылъымкун лъңанун ухпықа̄гуси лъпыси. 2Талўа иляңита апостолыпигунӷинъиӷңа̄тңа лъпыси лӣсимакаҳпысиңа апостолыпӣгӯңа Атаныҳқун, қаюҳлъяк кияҳта̄лъыҳпыси Христосымун кылгускаңа. 3Та̄куста а̄пҳақыхкынка сыӷлықистымнун.

4Варнавалъю хўаңкутуң туңсиӷна̄нӷитӯкуң ныӷьяҳқамыңлъю, мыӷьяҳқамыңлъю лъпысиның апыҳтуқамсини? 5Навык пинымтуң кылъқыпагниңитапут ухпықат нулӣпут иляңистун апостолытун, Атанӷым аңлыгутаңистунлъю, Петырытунлъю? 6Варнавалъю хўаңкутуң лъңинаҳа̄мтуң қыпҳа̄симаңинаӷьяҳқақыстыху нықыкаҳқаҳпут? 7Пилъюўаҳтым тукфиӷьяҳқақынӷитӣ сяӷьяни пилъюўаҳтыңилъюни. Таўатыҳпигақ виноградымың пӣтысиӷаҳтым ныӷыхкаюгӣ иляңи пӣтыстыкани. Пынъӣӷнӣҳтымлъю пынъӣӷми мама̄н иляңа пикаюга̄.

8Та̄кут успутат югым апыҳтӯсяқӣ, иўырңа Кияӷныӷым Лӣлиҳтуся̄нилъю апыҳтӯсят таўатытут. 9Игақыхка̄гуқ Лӣлиҳтӯсяни, Кияӷныӷым тӯныхка̄кун Моисейемун: «Сюгругӣталиҳпынан вол пшеницат тутмаҳтысныҳпысики қантӣт сигиқысқылъюки». Кияӷныӷым сюмыӷмикынӷитагӯ вол? 10Сяңами Кияӷнық таўатын пӣ? Волыңинаҳа̄қ сю̄мқагӯ? Нака̄, хўаңкуталъю сю̄мқақӣнкут. Ипапыста̄қ хўаңкунъунлъю игақыхка̄гуқ, қаюҳлъяк пӣтысиӷаӷвигмың ята̄ҳқистынунлъю, сяӷнастынунлъю ныӷьюкыхкаюга̄пут ныңиҳқапут. 11Кияӷныӷым акузитаңи пӣсяҳқастун аюқут. Хўаңкутуң пӣтысиӷаӷвикыхкақамси, ынка̄м таӷныӷаси қуястыка̄гут.

Туңсипахлъықыстӯң туңсиӷвикыхкумси аклъюкыхкамтыгның? 12Апыҳтуӷистым иляңи лъпысиның алъхыӷутңуката аклъюкыхкамыхның, хўаңкутуң ўатақа̄ӷақ пияҳқаҳпига̄яҳтукуң. Йыӷлыги қыпҳаӷьюка̄гукуң маниңырыгаӷналютуң аклъюкыхкамтыгның алъхыӷунъалютуң. Иляңани манипагитақукуң. Талўа тама̄ни а̄псюгигатамси акилыҳтӣсқылъютуң. Уната апалъюқа, китумун алңунак хўатын писюнӷитукуң: «Павел уңипақӣқуқ Пинилӷӣның Уңипаның акилыҳтӯсяңыпигыснаӷналюни». 13Лӣсимакаси Храмым қыпҳаҳтыңи ныӷыхкаюгыт нықмың Храмымун тӯныхкамың. Аҳқыфигымлъю қыпҳаҳтыңи ныңиқаюгӯт аҳқуткаҳқамың. 14Таўатытуқ Атанӷым қылӷуся̄: Уңипаҳтытлъю Пинилӷӣның Уңипаның аклъюкыхкатың алъхыҳсяҳқақӣт тама̄куның ухпықиканың Пинилӷӣның Уңипаның.

15Лъпысиның сямың алңунак алъхыӷусигатуңа пикаҳқақсяқымның. Сюмыҳтаӷа̄ткыхпынаңа сямың алңунак туңсиӷнилюңа ма̄тын. Қуя̄қуңа акилыҳтӣсқигалңӯңа лъпысинун уңипақинымни Пинилӷӣның Уңипаның. Уңипақинақңӯңа акилыҳтӯсӣтыӷңа̄ӷма талўа паныӷьяӷңа̄ӷма. Ынка̄м китум алңунак пина̄нӷита̄ңа: «Павел уңипақӣқуқ Пинилӷӣның Уңипаның акилыҳтӯсяңыпигыснаӷналюни». 16Иўырңа а̄ңа̄югусиҳқӣтуңа уңипақинымни Пинилӷӣның Уңипаның, қаюҳлъяк Кияӷныӷым қылъқақа̄ңа уңипақисқылъюңа. Сыӷлыӷўа̄ӷунаяҳтуңа қа̄ткынӷисяқумкун Кияӷнық. 17Накмикыхкақсяқумкун уна қыпҳақақ хўаңамның акилыҳтӯсяҳқалгунилюңа пинаяҳтуңа, иўырңа Кияӷныӷым накмикыхкақутаңаның пияҳқақақа акилыҳтӯсӣтыӷңа̄ӷма. Алъя натын пилъыҳқӣтуңа. 18Сяңа̄ўа акилыҳтӯсяқа? Акилыҳтӯсяқақа уна, қуяпихтақуңа акилыҳтӯсяңунаңа уңипақинымни Пинилӷӣның Уңипаның, қайўа акилыҳтуӷьяҳқақсяӷңа̄ҳпысиңа.

19Қыпҳаҳтыля̄ӷунӷисяӷңа̄ӷма, хўаңамның катам қыпҳаҳтыля̄ӷуҳтыка̄гуңа китумун алңунак, югмун углялӷӣмун ухпықысқылъюку Христос. 20Иудеянинъымни кияҳтақуңа лъңистун, ухпықысқылъюку Христос. Кияҳнымни язычнигни Лӣлиҳтӯсятхун кияҳта̄ӷни, лъңистун кияҳтақуңа лӣсимакыӷңа̄мкун қа̄ткутылъымкун Лӣлиҳтӯсятхун югулилъыңьяҳқа̄нӷитыӷңа̄ӷма, ухпықысқылъюку Христос. 21Язычнигнинъымни налъюкилӷӣни Лӣлиҳтӯсяның, лъңистун кияҳтақуңа налъюкылӷӣстун Лӣлиҳтӯсят, ухпықысқылъюку Христос. Қа̄ткыңъунӷинъилюки пиңунӷитанка Кияӷныӷым Лӣлиҳтӯсӣ, иўырңа қа̄ткыңъўа̄нка Христосым Лӣлиҳтӯсӣ. 22Кая̄лңуӷни кияҳнымни лъңистун лъӣӷақуңа, ухпықысқылъюку Христос. Ынка̄ңам кинкустун алңунак кияҳтақуңа натысяӷңа̄та, натын алңунак югулилъыңысқылъюки. 23Таўатын пӣқуңа нагақӣсқықыҳлъюки Пинилӷӣның Уңипаның, қаюҳлъяк қуястылъыңақылӷӣңалъю ухпықынӷатху Христос.

24Қамахлъютың кытанқустыт сивулӣюкаюгӯт, иўырңа ата̄сиҳақ кая̄лъқӣкаюгӯқ. Кияҳта̄лъыҳпысини Христосымун, кытанқустыстун кая̄лъқӣнақақитык. 25Кытанқустыт уляпақут югуситың икнақуҳналюки қаюҳлъяк қаҳпаңьюгақылӷӣт аваямың қуқуңалыгмың. Тама̄кут палиӷьяҳқа̄гут. Иўырңа қаҳпа ухпықат алъхыҳсяҳқа̄т қӯнпыкаҳқа̄гуқ. 26Кытанқустыстун таклъяӷрукытун кытанқўа̄қуңа ка̄нъалюңа кынлымун. Налиӷмың тыңлюхтыстун, тыңлюхпага̄таӷақуңа кая̄лъқӣналюңа. 27Уңипақӣқуңа натын кияҳтылъыҳқамың Христосымун. Хўаңалъю Кияҳтыңӯт лъңанун ынка̄м югусимнун қа̄ткыстақуңа, лю̄рақ пинӷилъкума Кияӷныӷым иқинъаюкаңаңа лъңаның.

Currently Selected:

1е Коринфянам 9: ess2

Highlight

Compare

Copy