1е Коринфянам 10

Иудеит Успутақлъюки Кылыңася̄тыт

1Ухпықа̄лгутымни, сюмыҳтаӷа̄ткысқысюганка Иудеит, малихся̄ӷикат Моисейемың. Египетмың аӷуляқақңамың қамахлъютың малихтыкақа̄т қиляўа̄қ, маӷьяҳқуӷилӷӣ тӯмкаҳқӣтхун. Ка̄сята Кавилңуӷмун Кылъӣмун, Кияӷныӷым пылъыҳтыкақыхкаңа мық аӷвӣсқылъюки яйўа̄сың. 2Қамахлъютың крестиӷқа̄лӷӣт қиляўа̄ҳқунлъю, Кавилңуҳқунлъю Кылъӣкун малихся̄ҳтыңулютың Моисейемун. 3Қамахлъютың ныӷыхка̄гут маннамың, 4мыӷыхка̄гут ата̄симың та̄хкын мыӷмың Кияӷныӷым Таӷныӷахкынка тӯныхка̄ның. Мыӷыхкақа̄т мық ма̄қыхкақ уйӷагмың. Та̄м уйӷагым малихся̄қақыхкаңи Кияӷныӷым Таӷныӷахкынкун. Уйӷак та̄на Христосыңӯқ. 5Таўатын Кияӷныӷым афлъыңакыхкақыӷңӣстың, паниның алъюлъютың ыфқуҳсимаңилъкаңат лъңа. Ынка̄м тумаңани Кияӷныӷым туқустақлъюки югусиҳқўа̄ӷит миңитка̄лӷӣт килга̄ни.

6Тама̄на қамахлъюни пилъҳат хўаңкунъун успута̄гуқ, кылыңася̄ӷӣлъю лъңистун пиюкыфқа̄н сыӷлық писқылъюку. 7Манигуҳтыңуҳтыхпынаси кияӷныңлъяқанун иляңистун. Акузитни Игақыхкани игақыхка̄гуқ: «Югытлъю, аӷнатлъю ныӷақут, мыӷақут та̄хкын аӷуля̄қут». Таўатын манигӯтка̄гут золотамың улима̄ӷмун каумӷаӷмун. 8Блудыфқамта иляңистун. Алъхыӷныӷа сыӷлыҳқылъҳита 23,000 ю̄к туқуляӷа̄тка̄гуқ ата̄сими аӷныӷми. 9Нанӷӣқунақыфқа̄мтыху Атанӷым нуқынъыҳтулъҳа пилътыху, иляңистун. Нымыӷьят туқуқуқақӣт иляңи сивуныпут қаюҳлъяк нанӷӣқукақыхкаңат Атанық. 10Акузилгаҳпынаси иляңистун. Яқулгым туқустикаюгым туқуқуқақӣ иляңи сивуныпут қаюҳлъяк акузилга̄ткақыхкаңат Кияӷнық.

11Қамахлъюки тама̄кут сивунымта атуқыхкӣт, успутаҳқа̄ка̄гут хўаңкунъун. Игақыхка̄гут кылыңася̄тңулютың хўаңкунъун кияҳлъыҳӣнун киңулиӷни аӷныӷни, лъңистун пифқа̄мта писқылъюта. 12Ынка̄м кина алңунак сюмыӷмини пикуми ухпылъыни аӷулӣнъилюку, кылыңали лю̄рақ сыӷлыҳқыся̄ҳтуқ. 13Қамахлъютың нанӷӣқулъыси алъяка̄ягунӷитут югнун. Иўырңа Кияӷнық ата̄сӣӷмытуқ, нанӷӣқулъыӷмун қа̄сҳутысяҳқақынӷитӣ икнақылъыси, икнақылъылитақна̄ӷӣси нуқытусиҳқамың. Ынка̄м иқитақылъықуси та̄хкын нанӷӣқулъыӷмың.

Пилӣтыстыка̄куфси Христосымун Туӷныӷа̄т Малихна̄нӷитаси

14Пиниқыхкамни, манигӯтыхпынаси кияӷныңлъяқанун. 15Алыҳқуӷамси сюмыӷнылгулюси, сюмыҳтаӷа̄ткынъакыси сямың пилъқа. 16Игамсиқаягунъымтыху қаю̄симылңуқ вино Атанӷым Нықынӷаҳқылъҳани, ныңиӷақукут Христосым а̄ўаның. Ӣхымнъың а̄вгуӷлюку нықыкшаңлъяқ нынымтыху, ныңиӷақукут Христосым югусӣның. 17Нықыкшаңлъяқ а̄вгуқа̄ӷңа̄ӷми ата̄сӣгуқ. Угляҳлъягьяӷңа̄мта, ата̄симың та̄хкын ныӷақукут. Ынка̄м кылгутақа̄ налиӷнықуӷнилюта ата̄симун югусимун.

18Сюмыҳтаӷа̄ткаҳтыкиқун Израилыӷмӣт; ныныӷмыхни аҳтуткыхкамың, илятақут манигӯлъҳӣнун Кияӷныӷмун аҳқыфигыгни. 19Сюмыҳпысинӣ кияӷныңлъяқат кияӷныпиўа̄т? Нықытлъю аҳқуткыхкат кияӷныңлъяқанун, манигӯсипиўа̄қа̄т? 20Нака̄! Налъюкилӷӣт Кияӷныӷмың аҳқыша̄ӷақут туӷныӷаӷнун, нака̄н Кияӷныӷмун. Илятңастысюнӷитамси туӷныӷаӷнун. 21Христосымун пилӣтыстыка̄куфси туӷныӷа̄т малихна̄нӷитаси. Тама̄кын апалъюқлъюку Атанӷым қаю̄сӣның мыӷыхкуфси, туӷныӷа̄тлъю қаю̄сӣтның мыӷна̄нӷитуси. Таўатыҳпигақ Атанӷым Нықынӷаҳқылъҳани ныӷыхкаюгукуфси нықыкшаңлъямың Атанӷым қаюӷвигани, туӷныӷа̄тлъю қаюӷвигитни ныӷна̄нӷитуси нықмың. 22Хўаңкута Христосым пилӣткӣтни туӷныӷа̄т малихнақыхкумтыки, Кияӷнық қуңьяҳтыслъықаҳпут. Нықамиклъюку лъңа икнақыҳлъяхтуқ хўаңкунъың.

23Иляси пика̄гут: «Итагнаҳтуқ сяңўа̄ пиюкылъқа пияӷңа̄мкун». Иўырңа хўаңа пӣмси, иляңи сялъыси пининӷитут. А̄а, ынтақун: «Итагнаҳтуқ сяңўа̄ пиюкылъқа пияӷңа̄мкун», иўырңа иляңан сялъыҳпыси каю̄сӣнъа̄нӷитӣ ухпылъыси. 24Кина алңунак лъңина̄юхтыфқа̄ми пӣқлъи, йыӷлыги иляңилъю сюмыҳтаӷа̄ткақлъюки.

25Сяңўа̄ алңунак кымыкшак тукфиқаҳси акилъпыгаӷвигмың ныӷақитыху сюмыҳтаӷа̄ткыхпына̄н аҳқуткыхка̄таңа кияӷныңлъяқанун. 26Қаюҳлъяк игақыхка̄гуқ Акузитни Игақыхкани: «Нуна, сяңўа̄тлъю қамахтыңъўа̄ӷлюки таўанлыңӯт Атанӷым пикӣ».

27Ухпықа̄нӷилңӯм ныӷьяҳтӣсқыхкаңиси пиюкуфси пилӷа̄си. Сяңўа̄ алңунак кытфаҳтуқа̄т ныӷақитыху сюмыҳтаӷа̄ткыхпына̄н аҳқуткыхка̄таңа кияӷныңлъяқанун. 28,29Иўырңа китум пикаңиси: «Та̄на аҳқуткыхка̄гуқ кияӷныңлъяқанун», ныӷыхпына̄н, уңипа̄тистыхпыси ухпылъҳа кая̄лиснаюкафсигу, қаюҳлъяк лъңани анахутңалӷӣңӯқ.

Ынтақун сюмыҳтаӷаӷнаялӷӣси: «Сяңаматуқ пиюкылъымтун пияҳқа̄нӷисиңа? Сяңаматуқ китум иныҳқуӷаӷақаңа алъятун сюмыҳтаӷақаюгым хўаңамның? 30Игамсиқаюгвикыхкумкун Кияӷнық ныӷьяҳқамның, сяңанңам китум сыӷлықӯҳлъықаңа ныӷыхкума игамсиқаюгуткыхкамның?»

31Ынка̄м қамахлъюку сялъыҳси қӯлва̄сиқақитыху Кияӷныӷмун, талўа ныӷылъысилъю, мыӷылъысилъю. 32Сяхпынаси сыӷлыҳқыстияҳқамың Иудеянун, язычнигнун, ухпықанунлъю. 33Ыфқуҳнақуткақанка юлгутынка сялъымкун алңунак. Хўаңаңинамнун пинилъыҳқақ пиңигатақа, иўырңа пиниҳқылъыҳқӣтнунлъю юлгутма пӣқуңа, углялӷӣ югулилъыңысқылъюку.

Currently Selected:

1е Коринфянам 10: ess2

Highlight

Compare

Copy