1е Коринфянам 8

А̄пқуга̄лъҳыт Аҳқуткыхканың Нықның

1Кӣмсиӷьюганка а̄пқуӷа̄лъыҳси нықның аҳқуткыхканың кияӷныңлъяқанун. Ипаңӯқ хўатын пилъыҳси: «Лӣсималъылгӯкут қамахлъюта». Таўатылңуқ лӣсималъық а̄ңа̄юхтыстикаюгӯқ, иўырңа пиниқылъҳым икнақуҳтыңъўа̄ ухпылъыҳпут. 2Ю̄к пилъхуюгнық, ысҳаҳу та̄на паниның лӣсяҳқаҳтуқақ. 3Иўырңа Кияӷныӷым пиниқистыни хўатын пияҳқақӣ: «Хўаңа пиканка».

4Ынка̄м ныӷылъықыста̄ аҳтуткыхкамың кияӷныңлъяқанун? Лӣсимакапут кияӷныңлъяқат кияӷныӷунӷитут. Ата̄сиҳа̄гуқ Кияӷнық, алъя кияӷныӷитуқ. 5Иляңита югыт ухпықақа̄т кияӷныҳтунилюку, атаныҳтунилюку қиляклъю, нуналъю. 6Иўырңа хўаңкута лӣсимакаҳпут ата̄сиҳа̄гуқ Кияӷнық, лъңа Атанӷӯқ. Сяңўа̄ қамахлъюни лъңаның пиңӯқ, кияҳтыңъӯкут лъңанун. Лӣсимакаҳпутлъю ата̄сиҳа̄гуқ Атанық, Иисус Христосыңӯқ. Лъңакун сяңўа̄ қамахлъюни улимака̄гуқ, уңуваңӯкутлъю лъңакун.

7Иляңита ухпықат налъюкӣт кияӷныңлъяқат кияӷныпигунӷитуляңи. Тама̄кын апалъюқлъюку ухпықақӣт нықыт аҳқуткақнилюки кияӷныпигнун. Ынка̄м ныныӷмыхни аҳтуткыхкамың сюмыҳтаӷаӷақут: «Сыӷлыҳқуңа». 8Иўырңа нықа пикатңунӷитуқ. Кияӷныӷым усюқатаӷаӷна̄нӷитӣси ныӷылъыҳпысигун нықмың. Аҳқуткыхкамың ныӷынӷилъкумта сяңўа̄ алңунак ифлъяна̄нӷитаҳпут Кияӷныӷмың аюқылӷӣ. Талўа ныӷыӷңа̄мта алъхыӷунъанӷитукут лъңаның.

9Ухпықаҳлъягни лъпыси, пиюкылъыҳпысистун пияҳқа̄лӷӣси, лӣгикңатыхпысиның та̄на ипапиҳқылъық апыҳтӯсяқыхкақа. Иўырңа кылыңалюси кая̄лңӯт ухпылъҳит аюқнӣҳқыхпынаки лъңита сюмыҳтаӷалъҳитни анахутңалӷӣмың. 10Налӣта ысҳақунитын ныӷумалютын кияӷныңлъяқат храмыңитни, лъңалъю ныӷьюҳтуқ сюмыҳтаӷалъыӷмини анахутңаяӷңа̄н. 11Ынка̄м лӣсималъыҳпык сыӷлыҳқыстыся̄ӷа̄ кая̄лңуқ ухпылъҳа ифлъяслъюку, ухпықа̄лгуткан Христосым туқуткыхка̄. 12Ынка̄ңам аюқнӣҳқыхкуфсики сюмыҳтаӷалъҳитни анахутңалӷӣмың, сыӷлыҳқылъықуси лъңитнунлъю, Христосымунлъю. 13Ынка̄м ныӷылъымкун аҳқутқыхкамың сыӷлыҳқыснаюкамкун ухпықа̄лгутка, алъямыңлъю ныӷна̄нӷитуңа сямың тама̄кын.

Currently Selected:

1е Коринфянам 8: ess2

Highlight

Compare

Copy