1е Коринфянам 7

А̄пқуӷа̄лъҳыт Ныңуӷутылъыӷмың

1А̄птыкақаҳпысиңа ныңуӷутылъыӷмың письмохпысигун. Укуста кӣмсӣтынка. Пиниҳтуқ ю̄к нулӣңунани. 2Иўырңа ю̄к тамаҳаӷми нулӣлгуяҳқа̄гуқ, аӷнақ тамаҳаӷми угилгуяҳқа̄гуқ, қаюҳлъяк нанӷӣқулъыңнаюкафси блудылъыӷмун. 3Югым ыфқуҳсяҳқақа̄ нулӣни. Таўатыҳпигақ аӷнам ыфқусяҳқақа̄ угини атуқутылъыӷмыгни. 4Аӷнам лъңинаӷми югусини пикынӷита̄, угиңанлъю пика̄. Таўатыҳпигақ югым лъңинаӷми югусини пикынӷита̄, нулиҳанлъю пика̄. 5Ныңуҳсимакуфси иҳсякутыхпынаси. Ўыткуқун итагнақулъюси атуқусяҳқа̄фқа̄фси қафсинат унугыт юӷаӷатаӷаӷналюси. Та̄хкын атуқунъықихлъыҳа̄си нанӷӣқулъыңнаюкафси Туӷныӷаӷмың қаюҳлъяк нуқысяҳқа̄наниқа̄лӷӣси.

6Қылӷунӷитамси нулиҳтӣсқылъюси налиӷмың угӣӷысқылъюси. Иўырңа пиюкуфси пилӷа̄си. 7Хўаңамтун нулиҳтуфқа̄фси, аӷнанилъю угӣфқа̄фси. Иўырңа алъякутукут. Кияӷныӷым нулӣлгустыкаюгӣ иляңи югыт, угилгустыкаюгӣ иляңи аӷнат. Иўырңа итагнаҳтыстыкаюгӣ иляңи югыт нулӣңунаки, аӷнатлъю угиңунаки. Кияӷныӷым алъякулъҳӣ тунусяқ тӯныхкаюўа̄ югнунлъю, аӷнанунлъю.

8Уната пикыхка нулиҳтӯмаңилңуӷнун, угӣӷумаңилңуӷнунлъю, угиңиӷанунлъю: Пиниӷнаяҳтуси нулиҳтунӷисяқуфси хўаңамтун, аӷнанилъю угӣнӷисяқуфси. 9Иўырңа ю̄к пиниӷатаӷаӷнаяҳтуқ нулиҳтуӷлюни нуқытыпагниңилңуқ аӷнаӷьюлъыӷминың. Аӷнақлъю пиниӷатаӷаӷнаяҳтуқ угӣӷлюни нуқытыпагныңилңуқ югьюлъыӷминың. Пиниӷатаӷаӷнаяҳтуси ныңуҳлъюси нанӷӣқулъыңылъыҳқаҳпысиның блудамун.

10Укут акузитыт хўаңамның пиңунӷитут, қылӷуся̄гут Атаныӷмың ныңуҳтыканун. Аӷнақ иқисяҳқа̄нӷитуқ угиминың. 11Иўырңа иқискуми, алъяның угӣӷьяҳқа̄нӷитуқ налиӷмың угиминун лъӣнқихлъи. Югымлъю иқитысяҳқақынӷита̄ нулӣни.

12Уна қылӷусяқ хўаңамның пиңӯқ иляңитнун. (Атанӷым сямың пӣҳсимаңита̄.) Ю̄к ухпықақ ухпықа̄нӷилңуӷмың нулӣлгукуми лъңанисюлӷӣмың, иқитысныӷилъигу. 13Аӷнақлъю ухпықақ ухпықа̄нӷилңуӷмың угилгукуми лъңанисюлӷӣмың, иқинъыӷилъи. 14Инқун ю̄к ухпықа̄нӷилңуқ а̄фтыңъўа̄қа̄гуқ Кияӷныӷмун қаюҳлъяк нулиҳа ухпықа̄лӷӣ. Аӷнақлъю ухпықа̄нӷилңуқ а̄фтыңъўа̄қа̄гуқ Кияӷныӷмун қаюҳлъяк угиңа ухпықа̄лӷӣ. Тама̄кын апалъюқлъюку таӷнуҳа̄т пылюңитутлъю, а̄фтыңъўа̄қа̄гутлъю. 15Иўырңа налиқ ухпықа̄нӷилңуқ иқисюкуми, иқилъи. Та̄хкын ухпықақ ю̄к налиӷмың аӷнақ итымли таўатылңуӷмың ныңуҳтылъыӷминың. Кияӷныӷым ныкыхмылъюси кияҳтысқысюгақӣси. 16Ухпықами аӷнами, угихпынискувык каюсӣтақся̄ӷан югулилъыӷмун. Налиӷмың ухпықами югми, нулӣҳпынискувык каюсӣтақся̄ӷан югулилъыӷмун.

Кияҳтык Кияӷныӷым Кияҳтысқысюлъҳатун

17Кияӷныӷым ата̄сикаҳтаҳпыси ухпықистақңиси Христосымың, ныңуҳтыка̄стык налиӷмың ныңуҳсимаңистык? Обрезанияка̄стык налиӷмың пимаңистык? Қыпҳаҳтыля̄ӷуяӷыстык налиӷмың қыпҳаҳтыля̄ӷунӷистык? Алмысиқлъюси таўатын нагныҳтык қаюҳлъяк Атанӷым таўатытыстыкақӣси. Қамахлъюки ухпықат та̄хкын апыҳтуӷақанка. 18Ю̄к обрезаниякақ ухпыӷақңами, алъяңуҳтыфқа̄ми пилӷа̄қ. Обрезаниямаңилңуқлъю ухпықақ, обрезанияқыфқа̄ми пилӷа̄қ. 19Обрезаниялъықлъю, обрезаниянӷитылъықлъю пикатңунӷитук. Питңуяҳқақта та̄на қа̄ткылъюки Кияӷныӷым Лӣлиҳтӯсӣ. 20Ата̄сикаҳтаҳпыси ухпықӣқңафси, натытылъыҳпысистун алмысиқитыху. 21Қыпҳаҳтыля̄ӷуяҳсӣн Кияӷныӷым туқлъюӷақңатын? Сюмыҳтаӷа̄ткыхпына̄н. Иўырңа қыпҳаҳтыля̄ӷунаниӷнақңукувык, ся̄қсин лыган таўатын пилӷа̄тын. 22Қыпҳаҳтыля̄қ накмикыхка̄ Атанӷым, лъңан итымңалӷӣка̄. Таўатыҳпигақ қыпҳаҳтыля̄ӷунӷилңуқ ю̄к накмикыхка̄ Христосым, лъңан қыпҳаҳтыля̄қа̄. 23Кияӷныӷым тукфиҳпакақӣси, ынка̄м қыпҳаҳтыля̄ӷуҳтыхпынаси югнун. 24Ухпықа̄лгутымни, тамаҳаҳпыси аӷулӣсяҳқа̄гуси илятңалъыҳпысигун Кияӷныӷмун алмысиқлъюси таўатын туқлъюлъҳатун.

Апыҳтӯсяқ Ныңуҳсимаңилңуӷнун

25А̄птақаҳпысиңа натын сюмыҳтаӷа̄ткақутаңи угӣӷумаңилңӯтлъю, нулиҳтӯмаңилңӯтлъю. Атанӷым уңипа̄симаңита̄ңа Лӣлиҳтӯсямың тама̄кунун югнун, иўырңа уңипа̄нъақамси сюмыҳтаӷалъымның. Кияӷныӷым наңлъыхталъҳакун апостолыңуҳтыка̄гуңа. Тама̄кын апалъюқлъюку ныӷьюкнакыфсиңа.

26Сыӷлылӣҳлъягуҳтуқ нуна ма̄тын. Сюмымни хўаңа итагнаӷьяҳқа̄гуқ ю̄к алмысиқлъюни. 27Нулиҳтӯмазӣн? Иқитыстыхпына̄н нулиҳын. Нулиҳтӯмаңилъкувык, нулиҳтуӷнақыхпынаң. 28Иўырңа нулиҳтуқувык сыӷлыҳқыңъунӷитутын. Угӣӷумаңилңуқ угӣқуми, сыӷлыҳқыңъунӷитуқ. Иўырңа нулиҳтуқуфси, аӷнатлъю угӣқумың пияқлъӣӷатаӷаӷьяҳқа̄гуси хўани кияҳта̄лъыӷми. Пияқлъӣҳтысюнӷитыпихтамси таўатын.

29Ухпықа̄лгутымни, уната пикыхка: Атаныҳпут тагияҳтуңыстаҳтуқ. Та̄на апалъюқлъюку ныңуҳтыкат қыпҳа̄лъитху Атанық ныңуҳсимаңилңуӷыстун. 30Қивӷулӷӣтлъю қыпҳа̄лъитху қивӷунӷилңуӷыстун. Қуяңалӷӣтлъю қыпҳа̄лъитху қуянӷилңуӷыстун. Тама̄кутлъю тукфиҳтуҳлъякаюгыт қыпҳа̄лъитху аваңилңуӷыстун. 31Кияҳтыңъулюси нунами хўани, мыгнукатаӷаҳпына̄н нунам сянқутаңа. Қаюҳлъяк нуна алмысиқлъюни авӣӷусяҳқа̄гуқ.

32Кияҳта̄лъыӷмыңтуқ хўакын сюмыҳтаӷа̄ткыхкӣлңӯси. Нулиҳтӯмаңилңуқ қыпҳалъыҳқаҳта̄ӷаҳтуқ Атанӷым қыпҳақа̄ның қаюҳлъяк ыфқуҳсюгақыхкаңа. 33Нулӣлык қыпҳаӷатаӷақаюгӯқ кияҳта̄лъҳым қыпҳақа̄ның қаюҳлъяк ыфқуҳсюгақыхкаңа нулӣни. Ынка̄м сюмыҳтаӷалъҳа малӷуҳқыңъўа̄қуқ. 34Таўатыҳпигақ аӷнатлъю аюқут. Аӷнат угиңӣткат, угӣӷумаңилңӯтлъю қыпҳалъыҳқаҳта̄ӷатут Атанӷым қыпҳақа̄ның, қаюҳлъяк югуситыңлъю, таӷныӷатыңлъю тӯньюгақӣт ӣңунӣта Атаныӷмун. Иўырңа угилык қыпҳаӷатаӷақаюгӯқ кияҳта̄лъҳым қыпҳақа̄ның қаюҳлъяк ыфқуҳсюгақыхкаңа угини. Лъңанлъю сюмыҳтаӷалъҳа малӷуҳқыңъа̄қ. 35Таўатын пӣмси каюсӣнъалюси. Ныңуҳтыснанинӷитамси. Иўырңа накмикысюгақа пинилъыҳпигақ лъпысинун қыпҳа̄тысқылъюку Атанық угляфқусиңунаси.

36Нулӣҳқалгым атуқсюгьягускумигу нулӣҳқани, ныңуҳлъик. Ынка̄м ныңуҳтыкумык сыӷлыҳқыңъуна̄нӷитук. 37Иўырңа югым лӣсимакңўа̄қумигу натын пилъыҳқани, нуқытутңукумигулъю атуқсюлъыӷминың нулӣҳқани, пинитун пиңӯқ. Китум алңунак нулиҳтӣсқуӷа̄нӷилъкумигу, нулиҳтуӷьюнӷилъкуми пинитун пиңӯқ. 38Нулӣҳқалык ныңуҳлъюни пинитун пиңӯқ, иўырңа нулӣҳқалык ныңуҳныӷилъкуми пиниӷатаӷатун пиңӯқ.

39Аӷнақ алъяның угӣӷьяҳқа̄нӷитуқ угини кияҳлъюку. Иўырңа угини туқукан, пиюкылъыӷминың угӣӷьяӷңа̄ӷми итагнаҳтуқ, та̄ўаңинақ ухпықаҳӣнаӷмың. 40Иўырңа қуяңа̄ӷатаӷаӷьяҳқа̄гуқ угӣнқихныӷилъкуни. Та̄куста сюмыҳтаӷалъҳынка. Ухпықақа Кияӷныӷым Таӷныӷакык хўаңамнитуқ.

Currently Selected:

1е Коринфянам 7: ess2

Highlight

Compare

Copy