1е Коринфянам 6

Ухпықа̄нӷилңуӷнун Нанқихтысқыхпынаки Ухпықат

1Налиҳси а̄ҳтӣра̄ныӷмини ухпықа̄лгутминың, сяңан агля̄тақагу нанқихтивигмун? Кайңуюгигастык ухпықа̄нӷилңуӷнун нанқихтысныҳпысини лъпыси ухпықани? Ухпықат ухпықа̄лгутмыхнун таклъяӷутысяҳқа̄яҳтут а̄ҳтӣра̄ӷутылъыӷмыхның. 2Лӣсимакынӷистыхӯ Кияӷныӷым юган нанқихсяҳқӣ ухпықа̄нӷилңӯт иляңани аӷныӷым? Нанқихсяҳқақңукуфсики, натын пияқнаҳтуткалъықыфтат лъпысинун нанқихтылъыҳқӣ пияқнӣлңӯт? 3Лӣсимакынӷистыкӣ нанқихсяҳқақыкыпут яқулгыт? Ынка̄м таклъяҳқулъҳыт а̄ҳтира̄ӷутылъыӷның хўани уңувалъыӷми пияқнӣсяҳқа̄яҳтут. 4А̄ҳтӣра̄ӷунъыҳпысини сяңафсиңам ухпықа̄нӷилңуӷнун пӣқыстык нанқихтысқылъюси? 5Кайңунаҳалык лъпыси! Лӣсимакақа акулыхпысини лӣсималӷӣмың таклъяӷутистыкаҳқалгӯт ухпықа̄лгутыт а̄ҳтӣра̄ӷулъҳӣт. 6Йыӷлыги ухпықам ухпықа̄лгутни агля̄тақа̄ ухпықа̄нӷилңуӷнун нанқихтистынун, агӷиткысқылъюки а̄ҳтӣра̄ӷутылъытынь. 7Таўатытылъыҳпысигун ухпықа̄нӷилңуӷыстун кияҳта̄ӷӯси. Ухпықа̄лгутыси агля̄тыхпынаки нанқихтивигмун. Ныпӣӷутақитыки анахтыӷңӣси, пӯҳтыӷңӣси. 8Итупилъ лъпыси катам ухпықа̄лгутыси анахтақасилъю, пӯҳтақасилъю.

9Ипапыста̄қ лӣсимаксяҳқақсяӷаҳси сыӷлытун пистыт ныкаҳқӣлңӯт Атаныҳпагулъҳани Кияӷныӷым. Пӯҳтыстыхпынаси китумун алңунак. Кияӷныӷым Атаныҳпагулъҳани ныкаҳқӣтут: блудникыт, манигӯткаюгыт кияӷныңлъяқанун, гылгаӷнӣҳтыт, аӷна̄сит, югыт юлгутмыхның атуқикаюгыт, аӷнат аӷна̄лгутмыхның атуқикаюгыт. 10Тама̄кутлъю тыглыңалӷӣт, пакигныӷыт, мықаюгыт, сыӷлықӯҳтыт югның, ўаяӷнӣҳтыт, ныкаҳқӣтут Атаныҳпагулъҳани Кияӷныӷым. 11Иляси таўатысялӷӣт сялин ухпықилъҳилъютың Христосымың. Иўырңа ма̄тын Кияӷныӷым Таӷныӷахкынка уӷвуҳқыхкақӣси сыӷлыҳқылъыҳпысиның, а̄фтыкақӣси Кияӷныӷмун, сыӷлыҳқумаңилңуӷыстунлъю лъӣҳтыка̄гуси қаюҳлъяк ухпықилӷӣси Атаныҳқун Иисус Христосыкун.

Югусиси Қӯлва̄сиҳқақаси Кияӷныӷмун

12Иляси пика̄гут: «Итагнаҳтуқ сяңўа̄ пиюкылъқа пияӷңа̄мкун». Иўырңа хўаңа пӣмси, иляңан сялъыҳпыси каю̄сӣнъа̄нӷитӣ ухпылъыси. А̄, ынтақун: «Итагнаҳтуқ сяңўа̄ пиюкылъқа пияӷңа̄мкун». Иўырңа сюмыҳтаӷаӷьялӷӣңа сыӷлыӷмун айӷипахлъягнаюкама пина̄нӷитуңа. 13Киналъю пинаялӷӣ: «Нықа улима̄ӷӯқ ақсяқумун, ақсяқуқ нықмун». А̄, иўырңа иляңани аӷныӷым Кияӷныӷым на̄фқысяҳқақа̄к қамахлъюкык ақсяқуқлъю, нықалъю. Югусиқ блудыӷқанҳисаӷтуқ қаюҳлъяк югусиқ Атаныӷмун пиңӯқ, Атанық югусимнъун пиңӯқ. 14Иляңани аӷныӷым Кияӷныӷым макысяҳқақӣ югусипут туқулъыӷмың аҳтуӷьяҳқа̄нӷилъыӷмикун, таўатыҳпигақ макытылъыӷмитун Атанық Иисус Христос туқулъыӷмың.

15Лӣсимакынӷистыхӯ югусиси налиӷнықыхкаңи Христосым югусӣн? Югусиқа Христосым пилӣтка̄ атуқысна̄яҳсикӯн аӷнамун акикикаюгмың югусиминың? Нака̄! Пина̄нӷитақа. 16Нықамиклъюку, югым атуқыхкумигу аӷнақ акикилӷӣ югусиминың ата̄сӣҳтыкаюгык югусӣк. Қаюҳлъяк игақңа̄қ Акузитни Игақыхкани: «Ма̄лӷук югусӣк ата̄сиҳсяҳқа̄гук». 17Иўырңа Атаныӷмун лъӣқувык, ата̄сӣгутык таӷныӷакун.

18-20Лӣсимакынӷистыхӯ югусиси Кияӷныӷым Храмкыхкаңи, Аглыӷналӷӣм Таӷныӷахкынка кияҳфиги? Кияӷныӷым тӯныхкақисӣ Аглыӷналӷӣгның Таӷныӷаӷминың, ынка̄м ма̄тын Кияӷныӷым пилӣткақӣси. Лъпысиның пикынӷитуси. Тама̄кын апалъюқлъюку блудыгпынаси. Блудыӷкуфси, нукыхнаҳқылӷӣстун Кияӷныӷым Храмыңа пилъықаҳси. Иляңи сыӷлыҳқылъҳыт таўатынъыӷитут. Кияӷныӷым тукфиқақӣси акитупихлъюку. Тама̄кын апалъюқлъюку қӯлваҳтыху Кияӷнық югусиҳпысигун.

Currently Selected:

1е Коринфянам 6: ess2

Highlight

Compare

Copy