1е Коринфянам 12

Тунусят Аглыӷналӷӣгның Таӷныӷагның

1Ухпықа̄лгутымни, лӣтысюгамси Аглыӷналӷӣм Таӷныӷам тунуся̄мың. 2Нықамикаҳси сялин ухпылъҳилъюси манигӯтыста̄тақақыхкаңиси кияӷныңлъяқанун акузиңигалңуӷнун. А̄ҳқутақыстыка̄лӷӣси. 3Тама̄кын апалъюқлъюку лӣгикысюгамси кина алңунак хўатын пилӷӣ: «Иисус сыӷлыӷӯқ», Аглыӷналӷӣм Таӷныӷам акузистыңъунӷита̄ таўатын. Иўырңа кина алңунак хўатын пилӷӣ: «Иисус Атанӷӯқ», Аглыӷналӷӣм Таӷныӷам акузистыңъўа̄ таўатын.

4Аглыӷналӷӣм Таӷныӷам тунусӣ алъяҳӣна̄гут, иўырңа тунусят қамахлъюки та̄м ата̄сим Таӷныӷам тунусяқӣ. 5Угляпихтуқ алъя̄ҳӣнақ қыпҳа̄тилъыҳқақ илямун, иўырңа та̄на ата̄сиқ Атанық қыпҳа̄тылъыңақуқ. 6Угля̄пихтуқ алъякулъҳӣ Кияӷныӷым қыпҳақа̄, иўырңа та̄м ата̄сим Кияӷныӷым пистақӣ хўаңкунъун. 7Аглыӷналӷӣм Таӷныӷам лӣтыстыкаюга̄ аҳтуӷьяҳқа̄нӷилъыни ухпықатхун тунусялиткамикун. Тунусят китумун алңунак пиниҳқусиҳқа̄гут. 8Та̄м ата̄сим Таӷныӷам югым иляңи акузистақӣ пыҳқинылъыӷмикун, иляңи лӣсималъыӷмикун. 9Та̄м ата̄сим Таӷныӷам ухпықилъылитаӷақақӣ иляңи югыт, иляңи аҳтуӷьяҳқа̄нӷилъылитақӣ на̄лъҳутияҳқа̄люки ақниӷныӷның. 10Таӷныӷам тӯныхкақӣ иляңи югыт алъя̄ҳлъюхўаҳтисиҳқамың. Иляңан югым тугуклъиқақа̄ уңипақилъыҳқақ Кияӷныӷым уңипа̄мың. Иляңан югым тугуклъиқақа̄ лӣгикилъыҳқақ Аглыӷналӷӣм Таӷныӷам налиӷмың туӷныӷа̄т иглыӷутңутаңа кина. Аглыӷналӷӣм Таӷныӷам акузистақӣ иляңи югыт алъя̄ҳӣнакун улюкун. Ынка̄м иляңитнун мумиҳқуҳтыстақӣ акузилъҳыт. 11Қамахлъютың тама̄кут тунусят ата̄сикаҳтаҳаӷмың та̄хкын ата̄сигның Таӷныӷагның пиңӯт. Тӯньюкани тама̄кут налӣтның тунусяҳқами тӯнақӣ.

Ата̄сиқ Югусиқ Налиӷныҳтуқақ

12Катам югусиқ ата̄сиқ налиӷныҳтуҳлъяк, қамахлъютың налиӷныӷыт югусим пикыхкаңи. Қайўа угляӷңа̄ӷмың ата̄сӣгуқ югусиқ, Христосылъю таўатытуқ. 13Қамахлъюки ухпықат налиӷнықуӷӣ Христосым югусӣн. Иляпут Иудеяңӯт, иляңи язычнигыт, иляңи қыпҳаҳтыля̄ӷыт, иляңи қыпҳаҳтыля̄ӷунӷитут. Иўырңа қамахлъюта крестиӷыка̄гукут та̄хун ата̄сикун Аглыӷналӷӣгныкун Таӷныӷагныкун, Христосымун югусилӣтысқылъюта. Қамахлъюта тугуклъиқақахпут ата̄сик Таӷныӷак.

14Югусиқ ата̄сӣнӷитуқ налиӷнық, налиӷныҳтупихтуқ. 15Итыгат хўатын пиӷңа̄ӷмың: «Ӣхыңунӷилңӯңа, югусим пикынӷита̄ңа». Та̄қна̄нӷитңўа̄ҳтут югусимынъыӷмың. 16Сигута хўатын пиӷңа̄ӷми: «Ӣйңунӷитуңа, югусим пикынӷита̄ңа». Та̄қна̄нӷитңўа̄ҳтуқ югусимынъыӷмың. 17Югусиқ ийыра̄ӷина̄яқуми, натынңам нагақуӷнаяҳта? Налиӷмың сигутыра̄ӷина̄яқуми, натынңам на̄ӷунъаяҳта сяпагнимың? 18Иўырңа Кияӷныӷым улимамаңитӣ югусипут таўатылъюки. Накмикыхкаминың налиӷнылиҳтуқақӣ. 19Югусиқ ата̄сӣяқуми налиӷнық югусӣнаянӷитуқ. 20Ипапыста̄қ югусиқ налиӷныҳтупихтуқ.

21Тама̄кын апалъюқлъюку ийым пина̄нӷитӣ ӣхыт: «Аклъюкынӷитамси». Таўатыҳпигақ на̄сқум пина̄нӷитӣ итыгат: «Аклъюкынӷитамси». 22Ипапыста̄қ югусимта натаңи кая̄тысюгнилңӯт мыгнунапихтут. 23Югусимта натаңи сюмымни мыгнунапагилңӯт, ынңа̄талъ афлъыңакақапут. Югусимта натаңи ысҳаҳтысюгигалъкыпут пилюгугңа̄қапут, 24иляңи тама̄кут ысҳаӷьяӷңа̄ӷмың аюқылӷӣт пилюгугигатапут. Кияӷныӷым улима̄қңамигу югусиқ, мыгнунаӷатаӷаҳтыстыкақӣ мыгнунапагитысюгнилңӯт. 25Ынка̄м югусиқ қыпҳақаюгӯқ қырңаӷми. Налиӷныӷым қамахлъютың афлъыңакақӣт илятың таўатыңўа̄қ. 26Ата̄сиқ ақнинӷани қамахлъютың ақниқаюгӯт. Ата̄сиқ усюқылъыңынӷани қамахлъютың қуякаюгӯт.

27Қамахлъюси ухпықани Христосым югусиқӣси, налиӷнықуӷӣси. 28Кияӷныӷым ухпықанун накмикыхкақӣ сивуклъюки апостолыт а̄ңылъыҳпига̄люки, тӯңлиҳӣ ӯкналиқистыт (уңипақилӷӣт Кияӷныӷым уңипа̄мың) пиңайӣ апыҳтуӷистыт, та̄хкын алъя̄ҳлъюхўаҳтистыт, тама̄кутлъю аҳтуӷьяҳқа̄нӷилъылиткат на̄лъҳутимун, каюсиӷияҳқат илямыхның, пинилӷӣт иглыӷутистыт, тама̄кутлъю алъя̄ҳӣна̄стун акузикаюгыт. Кияӷныӷым тӯньюкани тама̄кут налӣтның тунусяҳқами тӯнақӣ. 29Қамахлъюси апостолыңустык, ӯкналиқыстыңустык, апыҳтуӷистыңустык? Қамахлъюси аҳтуӷьяҳқа̄нӷилъылистык алъя̄ҳлъюхўаҳтисиҳқамың, 30на̄лъҳутикаюгустык? Қамахлъюси алъя̄ҳӣна̄стун акузикаюгустык мумиҳқуқаюгустыклъю алъя̄ҳӣнаӷның акузилъыӷның? Нака̄! 31Иўырңа пиюкитыки а̄ңатаӷалӷӣт Аглыӷналӷӣм Таӷныӷам тунусӣ.

Хўа̄ ма̄тын апыӷнақақа пиниӷатаӷалӷӣ та̄куның.

Currently Selected:

1е Коринфянам 12: ess2

Highlight

Compare

Copy