1е Коринфянам 13

Пиниқылъық

1Акузикаюгуяӷңа̄ӷма югытлъю, яқулгытлъю акузилъҳистун, тымңи тыңъа̄хтаҳлъықуңа налиӷмың лыңа̄ҳтаҳлъықуңа пиниқинӷилъкума. 2Ӯкналиқыхкаюгуӷңа̄ӷма, лӣгикыхкаюгуӷңа̄мки алӣнъыӷилңӯт қамахлъюки, лӣсималъық қамахтыкақсяӷңа̄мкун, ухпықилъылгуӷңа̄ӷма на̄йӷанун нӯхтисиҳқамың, пикатңуна̄нӷитуңа пиниқинӷилъкума. 3Тӯньяӷңа̄мки қамахлъюки сянка аклъюмалӷӣнун, налиӷмың паныҳтысяӷңа̄ӷма уңипақилъқа Пинилӷӣның Уңипаның апалъюқлъюку, алъхыӷунъа̄нӷитуңа пиниқинӷилъкума.

4Пиниқылъық нуқынъыҳтӯқлъю, наңлъыхтаҳтуқлъю; пиниқылъық ақинаңитуқ, налиӷмың ямшаңитуқ, налиӷмың а̄ңа̄югныӷитуқ. 5Пиниқылъық сыӷлыӷьюгутңитуқ, налиӷмың лъңина̄югныӷитуқ. Пиниқылъық сягиқигатуқ пиюкылъыӷмитун пиналюни, қикыҳқуңигатуқ, налиӷмың нықамикиңигатуқ анахутылъыӷмың. 6Пиниқылъҳым қуясиқигата̄ сыӷлық, йыӷлыги қуясиқақа̄ ипапилъық. 7Пиниқылъық ата̄сӣӷмытуқ сяңўа̄ сяяӷңа̄н. Ӣўлың ухпықиңа̄қ, ӣўлың ныӷьюкиңа̄қ, ӣўлың нуқынъыҳтӯқ.

8Пиниқылъық кынлыңилңуқ. Ӯкналиқылъҳыт кынлытҳӯсяҳқа̄гут; алъястун акузилъҳыт та̄қсяҳқа̄гут; лӣсималъық кынлытҳӯсяҳқа̄гуқ. 9Қаюҳлъяк тунусяхпут лӣсималъықлъю, ӯкналиқылъықлъю ӣӷўинъыӷилңӯк. 10Иўырңа ӣӷўилңуқ ка̄скан, қамахлъютың ӣӷўинъыӷилңӯт авӣӷуҳсяҳқа̄гут.

11Таӷнуҳа̄люңа акузикаюгуяҳтуңа, сюмыҳтаӷақаюгуяҳтуңа, лӣгикыхкаюгуяҳтуңа таӷнуҳаӷыстун, иўырңа югуҳсялӷӣңа таӷнуҳаӷыстун пинаниҳтуңа. 12Лӣгикылъыҳпут Кияӷныӷмың ӣӷўинъыӷитуқ, катам таўатытуқ ысҳалӷӣстун таӷныӷаҳқӯтылюхкун. Қакуқа̄қун лӣгикңўа̄ӷьяҳқаҳпут Кияӷнық қаюҳлъяк ысҳаҳлъықаҳпут хинасяҳқуӷлюку. Ма̄тын лӣсималъқа ӣӷўинъыӷитуқ. Иляңани аӷныӷым лӣсималъқа ӣӷўиӷьяҳқа̄гуқ катам таўатын Кияӷныӷым лӣсимакңўа̄қаңаңа ӣӷўиӷма.

13Ынка̄ңам укут пиңают кынлытҳӯнъа̄нӷитут: ухпылъық, сиӷималъық, пиниқылъық; иўырңа пиниқылъҳӯқ аңылъыҳпигақ.

Currently Selected:

1е Коринфянам 13: ess2

Highlight

Compare

Copy