1е Коринфянам 11

1Ынка̄м хўаңамтун пӣқитык, катам хўаңа малихтылъымтун Христос.

Аӷнат Насқуӷӣтиӷлютың Манигӯсяҳқа̄гут

2Усюқамси нықамикыхкыфсиңа, атуқыхкысилъю апыҳтӯсянка. 3Иўырңа лӣгикысюгамси Христос на̄сқӯтиңӯқ тамаҳа̄нун югнун, югӯқлъю на̄сқӯтилӷӣ нулӣӷминың. 4Насқуӷӣтиӷлюни ю̄к юӷақуми налиӷмың уңипақуми Кияӷныӷым уңипа̄мың юӷаӷвигми, қӯлваӷьяҳқақынӷита̄ на̄сқӯтилӷӣ. 5Ынка̄м аӷнақ насқуӷӣтиҳпынани юӷақуми налиӷмың уңипақуми Кияӷныӷым уңипа̄мың, қӯлваӷьяҳқақынӷита̄ на̄сқӯтилӷӣ. Таўатын пикуми қигуӷўа̄қастун мықыслъюни аюқылъықуқ. 6Аӷнақ насқуӷӣтиӷьюнӷилъкуми, кыпуӷли нуйӣӷулъюни. Иўырңа аӷнани кайңуналӷӣңӯқ қигулъықлъю, нуйӣӷулъюнилъю кыпулъық, ынка̄м насқуӷӣтиӷңали. 7Ю̄к насқуӷӣтиӷьяҳқа̄нӷитуқ манигӯскуми қаюҳлъяк Кияӷныӷым наңаӷныӷатун улима̄ӷӯқ, Кияӷныӷым а̄ңылъҳа ысҳӣсқылъюку. Иўырңа аӷнақ улима̄ӷӯқ югым а̄ңылъҳа ысҳӣсқылъюку. 8Лӣсимакыхкыси ю̄к аӷнамың улима̄ӷунӷилңуқ, иўырңа аӷнақ югмың улима̄ӷулӷӣ. 9Ю̄к улима̄ӷунӷитуқлъю аӷнамун иўырңа аӷнақ улима̄ӷӯқ югмун. 10Та̄на апалъюқлъюку аӷнақ насқуӷӣтиӷьяҳқа̄гуқ, ынка̄м яқулгыт лӣгиклъитху ю̄к аӷнамун на̄сқӯтиңутаңа. 11Иўырңа нықамикитыху Атанӷым успықылъҳа, югылъю, аӷна̄млъю аклъюкутңа̄к. 12Аӷнақсюха̄қ югмың улима̄ӷуӷңа̄н, та̄хкын кынляңа ю̄к қамахлъюни алъхықа̄гуқ аӷнамың, иўырңа аӷнатлъю, югытлъю қамахлъютың Кияӷныӷмың пиңӯт.

13Сюмыҳтаӷа̄ткаҳтыхуқун: ипа анахутңа̄ аӷнам насқуӷӣтаңунани юӷалъҳа Кияӷныӷмун? 14Югыт қӯнпың ухпықақа̄т нуйӣҳтыкаӷңуқ ю̄к укаваҳтақуқ лъңаның, 15иўырңа аӷнам нуяҳлъяни қӯлва̄сиқа̄. Насқуӷӣтаҳқа̄люни лъңанун пика̄гуқ. 16Паниның кина а̄ҳтӣра̄ӷьюгукуми насқуӷӣтамың, уңипа̄нъықихтаҳлъякун та̄ната апостолыни апыҳтӯсяқақыхкыфут, Кияӷныӷым юган атуқақа̄т апыҳтӯсяқ на̄нсяӷңа̄ӷмың.

Атанӷым Ныӷыстилъҳа

17Хўакын апыҳтуӷьюгамси қырңуӷутақылъыҳпысиның манигӯтылъыӷмун. Усюқыпагниңитамси қырңуӷутақылъыҳпысинун қаюҳлъяк ақниҳқӯтаӷаӷақуси пиниҳқутыхпынаси. 18Уңипа̄тақа̄тңа қырңуӷунъыҳпысиниңуқ иляси а̄фқымыра̄ӷутақут, ата̄систун пихпынатың. Ухпықыкыстаӷлюку лъӣӷақа. 19Ынтақун а̄фқӯтылъыҳпысигун лӣгиксяҳқақаси налиси ипа қа̄ткутңатаңи Атаныӷмун.

20Ынка̄м қырңуӷунъыҳпысини Атанӷым Ныӷыстилъҳанун, ныӷьяҳтӯнӷитақаҳси. 21Ныӷӯнъыҳпысини тамаҳаҳпыси нырахкӣӷақуси нықыхпысиның, иляси утақахпынаки. Ынка̄м иляси игатаӷақут, иляси сю̄мақут. 22Ныӷигастык, мыӷигастык ныныхпысини? Налиӷмың угумикыстыкӣ Кияӷныӷым юги? Кайңусяӷа̄тыснақуткақыстыкӣ аваңилңӯт? Сямың пилямси? Усюқлъямсӣ? Нака̄, усюқна̄нӷитамси!

23Сяңўа̄ лӣткақа Атаныӷмың апыҳтӯсяқақақа лъпысинун. Атанӷым Иисусым иӷивгаӷми таўани увыҳпагутылъыҳқамини тугука̄ нықыкшаңлъяқ. 24Игамсиқаюгвиксямигу Кияӷнық, а̄вгуӷлюку, пикақ: «Уна югусиқақа лъпысинун пиңӯқ. Ныӷақитыху нықамикусӣлюку хўаңамның».

25Ныныӷмың та̄қсямың, таўатыҳпигақ тугулюку қаю̄сиқ виноӷраӷаӷмың ималык, пикақ: «Уна қаю̄сиқ Кияӷныӷым нутаӷа̄гуқ акықуся̄ а̄мкун. Аўын мыӷақитыху нықамикусӣлюку хўаңамның». 26Ынка̄м қӯнпың ныныҳпысини та̄хкын нықыкшаңлъямың, мыныҳпысинилъю та̄хкын қаю̄симың, кылгутңўа̄қаҳси Атанӷым туқулъҳа кынляңа алъя тагилъыҳқа̄нун.

27Кина алңунак тымңи ныӷыхкуми Атанӷым нықыкшаңлъя̄ның, мыӷыхкумилъю Атанӷым қаю̄сӣның, қӯлваӷна̄нӷита̄ Атанӷым югусӣлъю а̄ўалъю. 28Тама̄кын апалъюқлъюку сивуклъюни югым авутыҳқуткылъики сыӷлыҳқылъыни алъя пияҳқа̄фқӣта пиналюки. Ынка̄м ныӷылӷа̄қ нықыкшаңлъямың, мыӷылӷа̄қлъю қаю̄симың. 29Кина алңунак ныӷылӷӣ нықыкшаңлъямың, мыӷылӷӣлъю қаю̄симың, Атанӷым югусӣ лӣгикнақыхпына̄н сямың писӣтаңа нанқихтылъыңьяҳқа̄қуқ Атаныӷмың. 30Та̄на апалъюқлъюку угляҳтуси кая̄лңуӷнилъю, қинуюгңалӷӣнилъю ынка̄м қафсинат туқуляӷа̄тка̄гут. 31Иўырңа ипапиҳқылъюта нанқихтыкумта хўаңкунъың катам ынка̄м авутыҳқуткыхкумтыки сыӷлыҳқылъыпут, Атанӷым нанқихна̄нӷитӣлъю таўатын пикумта. 32Иўырңа Атанӷым апыҳтуӷьюныӷминикут натын кияҳтылъыҳқамың, нанқихтақӣлъю. Аӷью̄ӷьяҳқа̄фқа̄мта пиналюта нанқихтикуми ухпықиңигалңуӷның.

33Ынка̄м ухпықа̄лгутымни қырңуӷунъыҳпысини ныӷналюси Атанӷым Нықынӷаҳқылъҳаның ныӷаӷаҳтаҳпынаси, утақатутақлъюси. 34Игаталӷӣт тама̄кут нымыхни ныӷлит ынка̄ңам Атанӷым нанқихныӷилъики. Агляқума лъпысинун иляңи а̄птыкаси кӣмсиӷна̄ӷанка.

Currently Selected:

1е Коринфянам 11: ess2

Highlight

Compare

Copy