Hebreo 2

Jĩrak'aua p'anat'ɨ Cristo itu bɨdaemaapa

1Mãɨpuru jĩrak'aua p'anat'ɨ tachia chi piarãpẽa pedea ũrinaanat'a minachia ũrinai p'anɨma mãɨnepema ãyá wãnaemaapa. 2Chi Tachi Ak'õrepa naena jara bɨeda pedea ichia ɨt'aripa peedaɨrãnepa teasima. Mãɨ pedea ẽpẽrarãpa ãarea oodai p'anasidama. Chi ãarea oowẽa be mãɨnepa chi mãɨ pedea ũriwẽa be Tachi Ak'õrepa arí ɨtɨapachima. 3Ara mãɨ jĩra chi Tachi Ak'õrepa tachi minachia k'aripaidepema tachia itu bɨdaipɨra, ¿Ichia ɨtɨaidepema sãmaasã́ tachi mĩrunaima? Mãɨ pedea Tachi Chipari Jesupa naa jarateasima. Chi ũrinaanapa tachiá mãɨ piarãane asidama. 4Mãɨ awara Tachi Ak'õrepa ẽpẽerãpa ne p'ue oodak'apɨ́ minachia wawaria oopisima. Ichia k'ɨ̃ria bada jĩra ichi Jaorepa oopi bɨt'a ichidirãcha teasima. Jõma mãɨnepa mãɨ pedea piarãt'a k'awapisima.

Jesucristo ara tachi jĩra bada

5Chi ĩjũa chiwidi chei bɨt'a, chi mãɨ k'orea taipa jara p'anɨt'a#2:5 Chi mãɨ k'orea taipa jara p'anɨt'a. Hebreo 1:10-12. Tachi Ak'õrepa ichia ɨt'aripa peedaɨrã juade mãɨ bɨé pasima. 6Mãɨpari Tachi Ak'õre pedeade nãɨya bɨ bɨma:

«Tachi Ak'õre, ẽpẽra ¿k'ãrema pɨa mãɨ k'orea k'ɨ̃risiai k'orea?

Ẽpẽra#2:6 Ẽpẽra. Griego pedeade nãɨya bɨ bɨma: ẽpẽra warra. ¿k'ãrema, pɨa mãɨ ak'ɨi k'orea?

7Pɨa ichi chi Tachi Ak'õrepa ɨt'aripa peedaɨrã k'aepẽra k'aepe bɨsima.

Ichi pia bɨsima mãɨnepa chi minachia k'awa bɨ bɨsima».#2:7 Griego pedeade chi eda waapẽarã k'art'ade nãɨ sida bɨ bɨma: Ichi bɨsima ne ãarea pɨa ooda chiparirã p'ananamẽrá.

8Pɨa ne ãarea ichi juade bɨsima.

Tachi Ak'õrepa ne ãarea ichi juade bɨda pẽra, ichi juade ne ãpia pida bɨwẽa bɨt'a newẽma. Waidi ununawẽma ne ãarea ichi juade bet'a. 9Maamina Jesú k'orea k'awa p'anɨma.#2:9 Jesú k'orea k'awa p'anɨma. Griego pedeade nãɨya bɨ bɨma: Tachia Jesú unu p'anɨma. Tachi Ak'õrepa ichit'u nãɨ ĩjũane k'aepe bɨsima chi ɨt'aripa peedaɨrã k'aepẽra. Tachi Ak'õrepa ichi sõpiadepa mãɨya oosima Jesú jõmãɨrã k'orea piumẽrá. Minachia mĩak'ari piuda pẽra Tachi Ak'õrepa ichi pia bɨsima mãɨnepa chi atepe bɨsima.

10Tachi Ak'õrepa ne ãarea oosima. Ichidepa ne ãarea bɨma. Tachi Ak'õremá pia basima Jesú minachia mĩapiit'a. Mãɨya chi ichi ẽpẽrarã K'aripaparí arí bɨsima. Ichidepa Tachi Ak'õrepa ichi warrarã chok'ará p'anɨ jɨrɨ atasima, ichi pia bɨdepema jitadamẽrá. 11Jesupa ẽpẽerã Tachi Ak'õre pae pia bɨparima. Ichia, mãɨnepa mãɨ ẽpẽerã pida ãchi Ak'õre ara aba bɨt'a uru p'anɨma. Mãɨ k'orea Jesú p'erak'ama ãchi ichi ũpẽarãane ai k'orea. 12Tachi Ak'õre pedeade nãɨya bɨ bɨma:

«Mɨa pɨ k'orea mɨ ũpẽarã́ pedeaipɨ. Ãareaɨrã ará p'anɨne mɨa pɨá pia pedeaipɨ».#Salmo 22:22.

13Mãɨnepa nãɨya bɨ bɨma:

«Mɨa ichide ĩjãa baipɨ».#Isaía 8:17.

Mãɨnepa nãɨ sida bɨ bɨma:

«Mɨ nãma bɨma, mãɨnepa warrarã Tachi Ak'õrepa mɨá teada mɨ ome ará p'anɨma».#Isaía 8:18.

14Mãɨ warrarã k'ak'ua pará mãɨnepa oa pará ooda pẽra Jesú sida abarik'a basima ichi piudadepa tiore p'uei k'orea. Mãɨ tiorepa tachi piudai p'anɨ ichi juade uru bɨma. 15Jesupa tiore p'ueda pẽra, chi piudai k'orea wap'ea beada ichia ãarea k'aripasima. Ewaricha piudai wap'ea p'anɨnepa ãchi piawẽa p'anasidama chipari pae pari mimiapataɨrã jĩra. 16Piarã Jesú chi Tachi Ak'õrepa ɨt'aripa peedaɨrã k'aripade cheé pasima, mãɨpari Abrahán jĩra Tachi Ak'õrene ĩjãa bet'a k'aripade chesima.#2:16 Griego pedeade nãɨya bɨ bɨma: Abrahán ẽpẽrarã k'aripade chesima. 17Ichi cheside ne ãareaɨne tachi jĩra basima waapẽarã k'ĩra chupuriaparí p'aare minachia k'awa bɨ pai k'orea.#2:17 Tachi jĩra. Griego pedeade nãɨya bɨ bɨma: ichi ũpẽarã jĩra. Piarã Tachi Ak'õre k'ĩrari p'aare minachia k'awa bɨ jõma chi arí ooparí beesima. Mãɨpa ara ichi itu peapisima ẽpẽerãpa nemietá oopataɨ Tachi Ak'õrepa k'ɨ̃risia atuamẽrá. 18Tiorepa waa mĩesa jara baside Jesú minachia mĩasima. Mãɨpuru tiorepa tachiá waa mĩesa jara bɨde, Jesupa tachi sãmaasã́ k'aripai k'awa bɨma.

Currently Selected:

Hebreo 2: tdc

Highlight

Copy

Compare