Hebreo 1

Tachi Ak'õre Warra chi atepe bɨma

1Naenaena Tachi Ak'õrepa tachi chõarãenapemarã́ bari k'ak'o minachia wawariadepa pedeapachima. Chi ichi pari pedeapataɨrãnepa mãɨya oosima. 2Maamina nãɨ k'aadeapema ewaride ichi Warradepa tachiá pedeasima. Ichi Warradepa Tachi Ak'õrepa ne ãarea oosima mãɨnepa ichi bɨsima ne ãarea uru bamẽrá. 3Ichi Warrapa Tachi Ak'õre k'ĩrawãrea achiterrea unupiparima. Ichiapuru Tachi Ak'õre sãmaasã́ bɨt'a k'awapiparima. Ichi pedea jua chaarea bɨdepa ne ãarea ooda ichi juade ara mãɨya uru bɨma.

Ichia tachi nemietá oodada sɨɨk'ari Tachi Ak'õre chi auk'ará bɨ juaraari pajãne suak'abari beesima. 4Mãɨya Tachi Ak'õrepa ichi chi ɨt'aripa peedaɨrã k'aepẽra atepe bɨsima. Tachi Ak'õrepa ichi t'ɨ̃ bɨda mãɨ ãchi t'ɨ̃ bɨda k'aepẽra atepe piipará bɨsima. 5Chi ichia ɨt'aripa peeda abaɨa nãɨya jaraé pasima:

«Pɨ mɨ Warrapɨ. Idi pɨ mɨ Warraade aruma».#1:5 Salmo 2:7 Idi pɨ mɨ Warraade aruma. Griego pedeade nãɨya bɨ bɨma: Idi mɨa pɨ unusima wa Idi mɨ pɨ ak'õre pasima.

Mãɨnepa ãchi k'orea nãɨya jaraé pasima:

«Mɨ ichi ak'õre paipɨ, mãɨnepa ichi mɨ warra paipɨ».#2 Samuel 7:14.

6Mãɨ awara Tachi Ak'õrepa ichi Warra aba bɨt'a nãɨ ĩjũanea peeside nãɨya jarasima:

«Ãarea Tachi Pajãnepema Ak'õrepa ɨt'aripa peedaɨrãpa ichiá pia pedeadai p'anɨma».

7Tachi Ak'õrepa ɨt'aripa peedaɨrã k'orea ichi pedeade nãɨya bɨ bɨma:

«Tachi Ak'õrepa ichi ɨt'aripa peedaɨrã oosima nãu jĩra p'ananamẽrá.#1:7 Griego pedeade pneumata jara k'ɨ̃ria bɨma «nãu» mãɨnepa «jaore». Mãɨ k'orea chi eda waapẽarã k'art'ade mãɨ versiculode nãɨya bɨ bɨma: Tachi Ak'õrepa ichi ɨt'aripa peedaɨrã oosima jaore p'ananamẽrá.

Ãchi oosima t'ɨpɨ urua jĩra p'ananamẽrá».#Salmo 104:4.

8Maamina ichi Warra k'oreapuru Tachi Ak'õrepa nãɨya jarasima:

«Tachi Ak'õre, pɨ ewaricha ne ãareaɨrã chiparipɨ. Pɨ p'uuru jĩp'a bapiparima.

9Pɨa k'ɨ̃riaparima ẽpẽerã jĩp'a p'ananait'a. Nemietá unuemaaparima.

Mãɨpuru Tachi Ak'õre, pɨ Ak'õrepa ãarea pɨ ome p'anɨ k'aepẽra pɨt'a chi atepe bɨsima. Mãɨya pɨ minachia arapaapisima».#Salmo 45:6-7.

10Mãɨnepa nãɨya jarasima:

«Tachi Chipari, naenaena pɨa nãɨ ĩjũa oosima mãɨnepa pɨchi juadepa pajã oosima.

11Jõma mãɨ jõipɨ maamina pɨ ara mãɨya baipɨ. Jõma mãɨ chota paipɨ p'aru sore papari jĩra.

12P'aru sore ẽrak'ari chiwidi jɨ̃pari jĩra pɨa jõma mãɨ ãyá bɨk'ari chiwidi ooipɨ.

Maamina pɨ ara pɨchit'u bɨma. Pɨ piuk'ama».#Salmo 102:25-27.

13Tachi Ak'õrepa mi ãpia pida Ichia ɨt'aripa peedá jaraé pasima:

«Mɨ juaraari suak'abari beese aba mɨa pɨchi nek'ĩramá pɨchi juade bɨrudea».#1:13 Pɨchi juade bɨrudea. Griego pedeade nãɨya bɨ bɨma: pɨ jĩru ek'ari bɨrudea. Salmo 110:1.

14Mãɨyara ¿Tachi Ak'õrepa ɨt'aripa peedaɨrã k'airãma? Mãɨrã ãarea Tachi Ak'õre pae p'anɨẽra, ãchi peeparima chi ichia k'aripai bɨɨrã mãɨrã ak'ɨ p'ananamẽrá.

Currently Selected:

Hebreo 1: tdc

Highlight

Copy

Compare