2 Tesalonicense 3
3
Pablopa idida ichi pari ɨt'aa chiididamẽrá
1Mãɨ awara ũpẽarã, tai k'orea Tachi Ak'õrea ɨt'aa chiidit'ɨ Tachi Chipari pedea tuacha isapea wãmẽrá mãɨnepa ẽpẽrarãpa mãɨ k'orea pia jaradamẽrá mãra t'ãena mãɨyana jĩra. 2Tachi Ak'õrea ɨt'aa chiidit'ɨ tai ẽpẽra k'achia berãpa piawẽa oo k'ɨ̃ria p'anɨnepema k'aripamẽrá, Cristode ĩjãa k'ɨ̃riawẽa berã sida paara p'anɨ pẽra. 3Maamina Tachi Chiparipa ooipɨ ichia jara bɨ jĩra. Ichia mãra k'aripa baipɨ choa p'ananamẽrá mãɨnepa k'achiadepema ak'ɨ baipɨ.#3:3 K'achiadepema ak'ɨ baipɨ. Griego pedeade ichiaba jara bɨma: «Chi k'achia bɨ juadepema k'aripa baipɨ». 4Tachi Chiparidepa k'awa p'anɨma taipa jarateadada mãrapa piarã oo p'anɨ mãɨnepa oopododaipɨ. 5Taipa k'ɨ̃ria p'anɨma Tachi Chiparipa k'awapimẽrá mãra k'ɨ̃ria bɨt'a. Mãɨnepa k'ɨ̃ria p'anɨma ichia mãra k'aripamẽrá Cristopa choada jĩra choadamẽrá.
K'oawẽa mimianai k'orea
6Ũpẽarã, Tachi Chipari Jesucristo t'ɨ̃nepa taipa mãrá jara peeutama ũpẽarã k'oa be ome ará p'anapidaemaapa. Jãɨrãpa taipa jarateadada jĩra oodak'ama. 7Mãrapa k'awa p'anɨma tai nipadada jĩra mãra nipadai p'anɨ. Mãra t'ãena p'anasidaɨde tai k'oa pará p'ananaé pasima. 8Taipa mãrané pari k'odaé pasima, mãɨpari ãst'á mãɨnepa teamasi ɨ̃apaadawẽa ne awara mimia p'anasidama mãranepema abaɨ pida taiyá ne pari teapiemaapa.#Hecho 18:2,3. 9Piarã mãrapa k'aripadamẽrá taipa p'ue ne ididai p'anasidamina, ididaé pasima. Mãɨpari tai mimiasidama k'awapidai k'orea mãrapa abarik'a oodai p'anɨ. 10Mãra t'ãena p'anasidaɨde taipa nãɨ jarasidama: «Chi mimia k'ɨ̃riawẽa bɨa nek'opirãt'ɨ». 11Taipa ũri p'anɨma ara machi ũpẽarã paara, eda chi k'oa pará be p'anɨ. Ãchi mimianak'ama mãɨpari chĩara nepɨrade p'anapatama. 12Mãɨ ũpẽarã́ taipa Tachi Chipari Jesucristodepa chichupuria idiutama ne k'ɨ̃risiawẽa mimianamẽrá nek'odai uru p'ananamẽrá.
13Maamina ũpẽarã, pia oo p'anɨnepa sẽrãt'ɨ. 14Taipa nãɨ k'art'ade jarateadada abaɨ pida ĩjãaepɨra, jõmãɨrã́ k'awapit'ɨ piawẽa oo bɨt'a. Ichi ome ará p'anarãt'ɨ p'eramẽrá. 15Maamina ichi mãra ome chi nek'ĩramá jĩra uru p'anarãt'ɨ, mãɨpari mãra ũpẽa pẽra jarat'ɨ jĩp'a oomẽrá.
Pablopa k'aadea bɨda
16Taipa k'ɨ̃ria p'anɨma Tachi Chipari ne k'ɨ̃risiawẽa p'anapiparipa mãrá ewaricha ne k'ɨ̃risiadawẽa ne ãareaɨne p'anapimẽrá. K'ɨ̃ria p'anɨma Tachi Chipari mãra ome bamẽrá. 17Mɨ Pablopɨ. Nãɨ pedea mɨ juapa bɨruma. Jõma mɨ k'art'ade nãɨya bɨparima k'awapii k'orea mɨapuru bɨruma. Nãɨya bɨ baparima. 18Mɨa k'ɨ̃ria bɨma Tachi Chipari Jesucristopa ichi sõpiadepa mãra k'aripa bait'a.
Currently Selected:
2 Tesalonicense 3: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
